Limonun faydası

Vətəni Hindistan sayılan limon bu gün dünya xalqlarının süfrəsinin bəzəyidir. Bəzən də onun faydasından çox görünüşündən, gözəlliyindən zövq almaq məqsədilə istifadə edilir. Əslində isə limon insan səhhəti üçün çox faydalıdır. Loğmanlar təsdiqləyirlər ki, limon təbiətin ən böyük möcüzələrindəndir. Tibb elminə məlum olan 500-dən çox virusun 45-nə limon birbaşa təsir edir. Hətta xərçəng virusuna qarşı da limondan istifadə olunur.

Dünyanın bir çox alimləri, təbiətşünaslar, həkimlər limonun insan orqanizminə göstərdiyi müxtəlif təsirlər haqqında dəfələrlə yazıblar. Bütün bunlarla bərabər limonun hamıya geniş məlum olmayan müalicəvi keyfiyyətlərindən danışmaq istəyirik. Doğrudur, hələ qədimdən Azərbaycanda bir sıra xəstəliklərdə, eləcə də soyuqdəymədə limonun şəfalı təsirindən istifadə edilib. Amma onun hansı müalicəvi xüsusiyyətlərə malik olduğu haqqında bir o qədər də ətraflı danışılmayıb. Daxili xəstəliklərə limonun təsiri çox böyükdür. Hətta müxtəlif üsullarla xaric ediləsi mümkün olmayan zərərli maddələr limon şirəsi vasitəsilə əridilərək parçalanır, maddələr mübadiləsinin normallaşmasına kömək edir. Bir məsələ də maraqlıdır ki, limondan yaşından asılı olmayaraq, hamı istifadə edə bilər. Həm daxilə, həm xaricə dərman vasitəsi kimi təsir göstərən limonu həşəratların, məsələn, ağcaqanadın, birənin, taxtabitinin dişlədiyi yerə sürtdükdə qızartı sorulur, ağrı gedir.

Bu gün tibb elmi də limonun insan immunitetini möhkəmlədən vasitə olduğunu təsdiqləyir. Bir çox dünya xalqlarının təbabətində əsas yerlərdən birini tutan limon müalicə vasitəsi kimi istifadə olunur.

Suya qatılmış limon şirəsi vasitəsilə burun qanaxmalarının qarşısını almaq, dərini göbələk, eləcə də infeksion xəstəliklərindən müalicə etmək mümkündür. Hətta müasir kosmetoloqlar da insan dərisində olan bir sıra xalları, çilləri yox etmək üçün limonun möcüzəli xüsusiyyətlərindən bacarıqla istifadə edirlər.

Ürək-damar xəstəlikləri, hipertoniya, stenokardiya, mədə-bağırsaq, öd daşı, böyrək, şəkər xəstəliklərində limon çox faydalıdır. Bu gün çox insana əziyyət verən diabetdən qurtulmağın bir yolu da limondan müntəzəm istifadəyə yönəlir. Dünya səhiyyəsində təsdiqlənib ki, nəinki limonun özü, hətta təzə dərilmiş yarpaqları, meyvəsinin qabığından hazırlanmış şirə belə şəkər xəstəliyində öz faydasını göstərir. Diabetə tutulmuş insanlar limondan belə istifadə edə bilərlər: limon qabığını (miqdarından asılı olaraq - 2 xörək qaşığı çəkilmiş limon qabığına 2 stəkan su tökürlər) 30 dəqiqə qaynadırlar. 10 dəqiqə saxladıqdan sonra süzürlər. Yeməkdən əvvəl gündə 3 dəfə həmin mayeni içmək olar. Qaraciyərin təmizlənməsində də limon əvəzsiz vasitədir. 200 qram zeytun yağı və 200 milliqram limon şirəsi gərəkdir. Amma burada müəyyən bir sistemə əməl edilməlidir. Birinci gün ac qalmaq gərəkdir, ancaq ürəyin istədiyi qədər alma şirəsi qəbul etmək olar. İkinci gün də bunu təkrar etmək lazım gəlir. Üçüncü gün isə yalnız gündüz saatlarına qədər alma şirəsi içmək olar. Növbəti günlərdə isə yatağa uzanaraq hər 15 dəqiqədən bir aşağıdakı qayda ilə zeytun yağı və limon şirəsi içilməlidir: 3 xörək qaşığı zeytun yağı və onu içən kimi eyni miqdarda limon şirəsini qəbul edirsiniz. Adətən, şlaklardan qurtulmaq sutkada üç dəfə baş verir. Bu müalicəni həyata keçirən zaman bir həftə ərzində ət məhsullarından tamamilə imtina edilməlidir. Qaraciyərin təmizlənməsi dörd aydan bir həyata keçirilməlidir. Bir il ərzində bu iş başa çata bilər.

Hətta görmə və eşitmə qabiliyyətinin yaxşılaşdırılmasına, eləcə də yaddaşa limonun müsbət təsiri var. Dişlərin təmizlənməsində limon şirəsindən istifadə olunur. Ağızdan gələn pis iyi də aradan götürmək və iştahanı artırmaq üçün gündə sürtkəcdən keçirilmiş (bir çay qaşığı həcmində) quru limon qabığını şəkərlə, ya da bal ilə qarışdırıb qəbul edirlər.

Son dövrdə az qala əsrin bəlasına çevrilmiş hepatit xəstəliyinin də müalicəsində sınanmış üsullardan biri də məhz limondan istifadədir. İki qabığı soyulmuş və iki qabıqlı limonu ət maşınından keçirdərək ona 1 kiloqram bal və 200 milliqram zeytun yağı qarışdıraraq qapalı şəkildə soyuducuda saxlamaq lazımdır. Alınan qarışığı yeməkdən yarım saat əvvəl gündə üç dəfə bir xörək qaşığı qəbul etmək lazımdır.

Təzə limonun qabığının ağ hissəsindən təmizləyərək nəm hissəsi ilə gicgaha sürtməklə başağrısını kəsmək olar. Əgər həmin yerdə qaşınma və isitmə hiss olunarsa, bu, limonun müsbət təsirini göstərir.

Dərinin tərləməməsi üçün limon şirəsindən də istifadə edilir. Məsələn, yatmazdan əvvəl ayaq barmaqlarını ilıq suda yuyub limon kəsikləri ilə sürtmək və quruyanadək gözləmək lazımdır. Bir həftə bu cür etdikdə heç vaxt ayaqda tər olmur. Saçların tökülməməsi üçün də limon şirəsindən istifadə edilir. O cümlədən saça düşmüş kəpəkdən də xilas olmaq üçün limon çox gərəkli vasitədir. Bu "sarı gözəl"in dilimlərini saçın dibinə sürtmək olar. O, həm də qaşınmanı aradan götürəcək. Gündə bir dəfə 1 litr ilıq suya 2 çay qaşığı limon şirəsini qatıb saçları bir neçə dəfə yaxalayırsan. Hətta dırnaqların möhkəmləndirilməsində də limondan istifadə olunur. Fincana bir qədər bitki yağı töküb ona 3 damcı limon şirəsi əlavə edib qarışdırılır. Sonra barmaqları onun içinə salıb beş dəqiqə saxlayırlar. Çıxardıqdan sonra mütləq salfetlə silmək lazımdır. Bir neçə saat ərzində bunu təkrarlamaq yetər, amma bu müddət ərzində əlləri yumaq olmaz.

Ümumiyyətlə, limon süfrədən əskik olmamalıdır. Təkcə xəstələr yox, sağlam insanlar da limondan istifadə etməlidirlər. Bəzən belə gileylər də eşidirsən ki, mən limon qəbul edə bilmirəm, təzyiqim aşağı düşür. Limon şirəsi ilə əlaqədar yarana bilən fəsadları həkimlər də istisna etmir. Adətən, öskürək, ifraz funksiyalarının pozulması zamanı insan öz orqanizminin hansı vəziyyətdə olduğunu dəqiq müəyyən etməlidir. O şəxslərin ki, mədələrində normadan artıq turşuluq və orqanizmlərində turşu reaksiyası müşahidə olunur, gərəkdir ki, onlar əvvəlcə tərəvəz şirələrindən yetərincə istifadə etsinlər. Ondan sonra limona keçmək olar.

Maraqlıdır ki, limon ağacını ev şəraitində də dibçək gülləri kimi becərmək mümkündür. Ən azından yaşıl yarpaqların arasında "sarı gəlin" kimi nazlanan limondan duyduğumuz zövq həm də bizə xoş ovqat gətirəcək. Doğrudur, bu bağlar gözəlini qəfəsə salmaq, yəni evdə becərmək, ona qulluq etmək o qədər də asan deyil. Amma elə çətinliyi də yoxdur. Çalışıb "dilini" tapmaq gərəkdir. Limon ağacı rütubəti sevir. Vaxtında suyunu verməsən quruyar, yaxud da çiçək açıb bar verməz. Həddən artıq su versən çürüyər. Şirin "çay"ı da (qaynanmamış soyuq suya bir qədər şəkər qatmaq gərəkdir) çox sevir limon. Bütün canlılar belədir. Diqqət, qayğı, məhəbbət, rəğbət, hətta arada zümzümə ilə əzizləmək olarsa, mütləq bəhrəsini göstərəcək. Günəşi xatırladan limon insanın dostudur. Gəlin, ondan müntəzəm istifadə edək! O, insana təkcə sağlamlıq deyil, həm də gözəllik, yüksək ovqat bəxş etmək qüdrətinə malikdir!

Flora XƏLİLZADƏ

Azərbaycan.-2011.-17 iyul.- S.6.