Rumıniyalı qonaqlar Qobustan Milli Tarix-Bədii Qoruğunda olmuşlar

 

Buxarest şəhərinin ikinci sektorunun meri, Rumıniya Bələdiyyələr Assosiasiyası sədrinin müavini Nekulay Ontsanunun başçılıq etdiyi hakim Demokrat Liberal Partiyasının nümayəndə heyəti Azərbaycana səfəri çərçivəsində iyulun 15-də Qobustan Milli Tarix-Bədii Qoruğunda olmuşdur.

Qonaqlara məlumat verilmişdir ki, Bakıdan 65 kilometr məsafədə yerləşən Qobustan Azərbaycanın qədim tarixinin yadigarlarından biridir. Qoruq bu ərazinin üst paleolit mezolit dövrlərinin ilk ovçu qəbilələrinin, neolit dövrünün ilk maldarlarının məskəni olmasını sübut edən abidədir. Ərazidə aparılmış tədqiqatlar nəticəsində mindən çox qayanın üzərində altı mindən artıq təsvir qeydə alınmışdır. Burada 40-dan artıq kurqan aşkar olunmuş 105 mindən çox maddi-mədəniyyət nümunəsi tapılmışdır. Qobustan qayalarında insan, heyvan, kollektiv əmək, qayıq şəkilləri, döyüş ov səhnələri təsvir edilmişdir. Oyma, sürtmə, çapma cızma üsulları ilə çəkilmiş təsvirlərin ən qədimləri eramızdan əvvəl VIII minilliyə aiddir.

Diqqətə çatdırılmışdır ki, buradakı qavaldaş daş dövründə yaşamış insanların istifadə etdikləri musiqi alətidir. Qobustan qayalarında qədim Azərbaycanın "Yallı" rəqs səhnələri təsvir olunmuşdur. Bu rəqsin uğurlu ov üçün ovsun mərasimi olduğu vurğulanmışdır. Qayalardakı Roma yazısı eramızın 81-96-cı illərinə aiddir və altı sətirdən ibarətdir. Bu, Roma imperatoru Domisianın dövründə 12-ci Roma legionunun burada olduğunu göstərir.

Rumıniyalı qonaqların diqqətinə çatdırılmışdır ki, 4 min hektardan artıq ərazidə yerləşən, dünya əhəmiyyətli tarixi abidə olan Qobustan qoruğu 2007-ci ildə YUNESKO-nun maddi-mədəni irs siyahısına daxil edilmişdir. Qeyd edilmişdir ki, Qobustan Milli Tarix-Bədii Qoruğundakı nadir qayaüstü rəsmlərin geniş təbliğinin xüsusi əhəmiyyətini nəzərə alan dövlətimizin başçısı İlham Əliyev martın 4-də qoruq muzeyinin yeni binasının tikilməsi üçün Prezidentin Ehtiyat Fondundan vəsait ayrılması ilə bağlı Sərəncam imzalamışdır.

Qədim insan məskəni ilə tanışlıqdan məmnun qalan rumıniyalı qonaqlar ərazidə aparılmış tədqiqat işləri tarixi eksponatlarla maraqlanmışlar.

Rumıniyanın hakim Demokrat Liberal Partiyasının nümayəndə heyəti Qobustan Milli Tarix-Bədii Qoruğundan xoş təəssüratla ayrılmışdır.

 

 

AzərTAc

 

Azərbaycan.-2011.-16 iyul.-S.2.