Moskvada Azərbaycan və Rusiya XİN başçılarının görüşü olmuşdur

Azərbaycanın xarici işlər naziri Elmar Məmmədyarov Rusiyanın xarici işlər naziri Sergey Lavrovun dəvəti ilə iyulun 17-dən 18-dək Rusiya paytaxtında rəsmi səfərdə olmuşdur.

Səfərin əvvəlində Kreml kompleksinin Aleksandr bağında Naməlum əsgər məzarının önünə əklil qoyulmuşdur.

Sonra RF XİN iqamətgahında iki ölkənin xarici siyasət idarələrinin rəhbərləri arasında geniş tərkibdə danışıqlar olmuşdur. RF XİN-in başçısı Sergey Lavrov ikitərəfli əlaqələrin indiki səviyyəsini yüksək qiymətləndirərək qeyd etmişdir ki, Azərbaycan ilə Rusiya arasında münasibətlər strateji xarakter daşıyır. Azərbaycan XİN-in başçısı Elmar Məmmədyarov öz növbəsində dövlətlərarası münasibətlərin dinamik inkişafından razı qaldığını bildirərək vurğulamışdır ki, bu münasibətlərin ahəngini prezidentlər İlham Əliyev və Dmitri Medvedev müəyyən edirlər.

Danışıqlar başa çatandan sonra Azərbaycanın və Rusiyanın xarici işlər nazirləri 2011-ci ilin ikinci yarısında və 2012-ci ildə RF XİN və AR XİN arasında Məsləhətləşmələrin Planını və Rusiya Federasiyası ilə Azərbaycan Respublikası arasında dövlət sərhədi haqqında 3 sentyabr 2010-cu il tarixli müqavilənin ratifikasiya sənədlərinin mübadiləsi haqqında Protokolu imzalamışlar.

Azərbaycan XİN-in başçısı Elmar Məmmədyarov Moskvaya rəsmi səfəri zamanı Rusiyanın xarici işlər naziri Sergey Lavrovun iyulun 8-də Azərbaycan Prezidenti İlham Əliyevə çatdırdığı Rusiya Prezidenti Dmitri Medvedevin Dağlıq Qarabağa dair təkliflərinə Azərbaycan Prezidenti İlham Əliyevin cavab məktubunu çatdırmışdır. Rusiya Prezidenti Dmitri Medvedevin təklifləri və məktubu Ermənistan Prezidenti Serj Sarkisyana da çatdırılmışdır.

Sonra keçirilmiş birgə yekun mətbuat konfransında Sergey Lavrov bildirmişdir ki, tərəflər arasında Rusiya-Azərbaycan münasibətlərinin bütün spektrlərinə dair intensiv danışıqlar aparılmışdır. Bütün sahələrdə əlaqələrin yüksək sürətlə inkişaf etməsi qeyd edilmiş, bu əlaqələrin ahənginin iki dövlətin prezidentləri tərəfindən müəyyən edilməsi vurğulanmışdır. 2010-cu ilin sentyabrında RF Prezidenti D.Medvedevin Bakıya rəsmi səfəri zamanı əldə edilmiş razılaşmaların və qəbul edilmiş qərarların yerinə yetirilməsinə xüsusi əhəmiyyət verilmişdir. S.Lavrov imzalanmış sənədlərin xüsusi əhəmiyyətini vurğulayaraq bildirmişdir ki, Rusiya-Azərbaycan sərhədinin delimitasiyası prosesi başa çatmışdır. Rusiyalı nazir iqtisadi və investisiya əlaqələrinin yüksək sürətindən məmnun olduğunu bildirərək qeyd etmişdir ki, tərəflər arasında ticari mübadilələrin böhrandan əvvəlki səviyyəsi bərpa olunmuşdur. Nazir demişdir: "Bu il əmtəə dövriyyəsinin həcminin 2 milyard dollardan çox olacağını gözləyirik".

Sergey Lavrov Qarabağ münaqişəsinin tənzimlənməsi mövzusuna toxunaraq demişdir ki, Rusiya bu münaqişənin ATƏT çərçivəsində həlli yollarını tapmaqda ABŞ və Fransa ilə birlikdə dövlətlərə kömək edir. "Dağlıq Qarabağ münaqişəsinin tənzimlənməsi Rusiya üçün prioritet məsələdir" deyən nazirin sözlərinə görə, hazırda baza prinsiplərinin layihəsi üzərində iş gedir. Bu prinsiplər tərəflərin sülh sazişi üzərində işləmək niyyətindən başlanır. O demişdir: "Biz həm də ATƏT-in Minsk qrupunun həmsədr ölkəsi kimi hər iki tərəflə bizim münasibətlərimiz kontekstində səylərimizi davam etdiririk".

Elmar Məmmədyarov da cavab nitqində ikitərəfli münasibətlərin səviyyəsindən çox razı olduğunu bildirmişdir. Nazir demişdir: "Münasibətlər yaxşılaşmaqdadır, xüsusən ticari münasibətlərdə əmtəə dövriyyəsinin artırılması üçün real imkanlar vardır. Biz qarşılıqlı əlaqələrin energetika ilə bağlı tərkib hissəsi məsələlərinə, o cümlədən Bakı-Novorossiysk boru kəməri vasitəsilə əlavə neft nəql edilməsi və Azərbaycandan nəql edilən qazın həcminin artırılması məsələlərinə toxunduq". E.Məmmədyarov Ermənistan-Azərbaycan münaqişəsinin tənzimlənməsinə dair Prezident İlham Əliyevin cavab məktubunu çatdırdığını qeyd edərək demişdir ki, danışıqlar prosesində heç də hər şey Azərbaycandan asılı deyildir. O vurğulamışdır: "Biz Ermənistanın həmin təkliflərə cavabını gözləməliyik, lakin hesab edirik ki, danışıqlarda irəliləyiş vardır. Biz tədricən elə bir həddə yaxınlaşırıq ki, hamı başa düşəcəkdir: indiki vəziyyət heç kəsi, o cümlədən bizim qonşularımızı da qane etmir". O xüsusi vurğulamışdır ki, sabitlik bütün region üçün, ilk növbədə Azərbaycan və Ermənistan üçün vacibdir. Azərbaycan XİN-in başçısı demişdir ki, üç prezidentin Kazanda görüşü irəliyə doğru bir addım olmuşdur və bəzi problemlər üzrə yaxınlaşma hiss olunur. Nazir demişdir: "Ümumiyyətlə, biz hesab edirik ki, hələlik razılaşdırılmamış mövzular üzrə müzakirələri davam etdirməliyik. Biz hüquqi sazişin - sülh müqaviləsinin müzakirəsinə nail olmalıyıq və bunun vaxtı çatmışdır. Sülh müqaviləsi danışıqların final mərhələsinə çatması barədə ciddi siqnal olacaqdır".

Azərbaycan və Rusiya xarici işlər nazirləri Rusiya və Azərbaycan jurnalistlərinin suallarına cavab vermişlər.

Görüşdə xarici işlər nazirinin müavini Xələf Xələfov, Azərbaycanın Rusiyadakı səfiri Polad Bülbüloğlu və Rusiyanın Azərbaycandakı səfiri Vladimir Doroxin iştirak etmişdir.

Asya HACIZADƏ,

AzərTAc-ın xüsusi müxbiri

Azərbaycan.- 2011.- 19 iyul.- S.2.