Azərbaycanda
KİV-in inkişafı üçün
hər cür şərait
yaradılıb
Milli Mətbuat Günü münasibətilə
dünən Yeni Azərbaycan Partiyasında bir qrup jurnalistin
iştirakı ilə tədbir keçirildi. YAP-ın sədr
müavini - icra katibi, Milli Məclisin deputatı Əli Əhmədov
tədbiri açaraq jurnalistləri Azərbaycan mətbuatının
yaranmasının 136-cı ildönümü münasibətilə
təbrik etdi.
Hər bir ölkədə demokratik proseslərin dərinləşməsində,
ictimai-siyasi proseslərin düzgün məcrada
inkişafında, insan hüquq və azadlıqlarının
qorunmasında jurnalistlərin xüsusi əməyinin
olduğunu qeyd edən Əli Əhmədov milli mətbuatın
keçdiyi şanlı yoldan söz açdı. Xüsusən
də Azərbaycan mətbuatı son 15 ildə sürətli
inkişaf yolu keçib, müasir jurnalistika prinsiplərini dərindən
mənimsəyib, cəmiyyət həyatına ciddi təsir
imkanları qazanıb. O həmçinin bildirdi ki, ölkə
iqtidarı demokratik proseslərin, o cümlədən siyasi
plüralizmin dərinləşdirilməsi, vətəndaşların
söz, fikir, əqidə azadlıqlarının təminatı
baxımından kütləvi informasiya vasitələrinin
rolunu və imkanlarını düzgün dəyərləndirir.
Azərbaycanda söz, fikir və mətbuat
azadlıqlarının maksimum səviyyədə təmini
üçün bütün zəruri tədbirlər həyata
keçirilir. Son 15 ildə ölkədə mətbuat
orqanlarının azad fəaliyyəti və inkişafı
yolunda süni maneələrin aradan qaldırılması,
qanunvericilik bazasının təkmilləşdirilməsi, qəzetlərin
maddi-texniki təchizatının
yaxşılaşdırılması sahəsində bir
sıra əməli tədbirlərin görülməsi deyilənləri
bir daha təsdiqləyir.
YAP sədrinin müavini - icra katibi daha sonra
vurğuladı ki, Azərbaycan jurnalistikası hələlik
inkişaf etmiş ölkələrin mediası səviyyəsinə
yüksələ bilməsə də, ötən illərdə
həm kəmiyyət, həm də keyfiyyət
baxımından nəzərəçarpacaq dərəcədə
inkişaf etmişdir. Onun sözlərinə görə, bəzi
kütləvi informasiya vasitələrində sivil peşə
etikası ilə uzlaşmayan yazılara, mübahisəli məsələlərə
geniş rast gəlinsə də, Yeni Azərbaycan
Partiyasının rəhbərliyi buna dözümlü
yanaşır. Bu cür fərqli fikirlərin, mövqelərin
olmasının özü ölkədə demokratiyanın
yüksək inkişaf səviyyəsindən, müstəqil
mətbuatın fəaliyyəti üçün münbit
şəraitin mövcudluğundan xəbər verir.
Azərbaycan iqtisadi sahədə sürətlə
inkişaf edir, modernləşir, bu pozitiv proses təkcə
insanların həyat tərzində, məişətində
deyil, ümumən düşüncə tərzində öz
dolğun əksini tapır. Odur ki, müasir cəmiyyətin
yüksək zövqlü insanını keyfiyyətli, dəqiq,
obyektiv, qərəzsiz informasiya ilə təmin etmək
baxımından medianın üzərinə böyük məsuliyyət
düşür. Azərbaycan mətbuatı cəmiyyətin
bu tələbinə, sosial məsuliyyət prinsipinə əməl
etməlidir.
Əli Əhmədov çıxışının
sonunda bildirdi ki, üzvlərinin sayı 550 mini ötən
Yeni Azərbaycan Partiyası siyasi mövqeyindən
asılı olmayaraq, bütün kütləvi informasiya vasitələri
ilə qarşılıqlı faydalı əməkdaşlığa
üstünlük verir. Ötən illərdə formalaşan
ənənəyə sadiq qalan partiya Azərbaycan mətbuatının
136-cı ildönümü münasibətilə müxtəlif
televiziya, radio, agentlik və qəzetlərdə
çalışan 25 jurnalisti mükafatlandırıb.
Sonda Əli Əhmədov mükafatları jurnalistlərə
təqdim etdi. Mükafatlandırılanlar sırasında qəzetimizin
müxbiri S.Mustafayev də var.
E.CƏFƏROV
Azərbaycan.- 2011.- 19 iyul.- S. 3.