"İki sahil" qəzetinin 20
illik yubileyi qeyd edilmişdir
İyulun
19-da Bakı Əyləncə Mərkəzində "İki
sahil" qəzetinin 20 illik yubileyi ilə əlaqədar mərasim
keçirilmişdir.
Qəzetin
baş redaktoru Vüqar Rəhimzadə çıxış
edərək mətbu orqanın keçdiyi şərəfli
yoldan, əldə olunmuş uğurlardan
danışmış, bütün bu illərdə onun milli mətbuatımızın
ənənələrinə, dövlətə və dövlətçiliyə,
xalqa sədaqət yolu tutduğunu vurğulamışdır.
V.Rəhimzadə
3-cü dərəcəli "Vətənə xidmətə
görə" ordeni ilə təltif edildiyinə görə
Prezident İlham Əliyevə minnətdarlığını
bildirmiş, bunu dövlət başçısının qəzetin
kollektivinin əməyinə verdiyi yüksək qiymət kimi
səciyyələndirmişdir.
Sonra
qəzetin yaranma tarixi və fəaliyyəti ilə
bağlı film nümayiş etdirilmişdir.
Prezident
Administrasiyasının İctimai-siyasi məsələlər
şöbəsinin müdiri Əli Həsənov mərasimdə
çıxış edərək qəzetin kollektivini 20 illik
yubiley münasibətilə təbrik etmişdir. O demişdir
ki, "İki sahil" qəzeti müstəqil Azərbaycanın
mətbuat tarixində özünəməxsus yeri olan nəşrlərdən
biridir. Sağlam əqidə, milli özünüdərk
ruhunda köklənmiş insanları ətrafında birləşdirən
"İki sahil" qəzeti heç vaxt öz yolundan
çəkilməmiş, ümummilli lider Heydər Əliyevin
ideyalarını qətiyyətlə təbliğ etmişdir.
Ulu öndər "İki sahil" qəzetinin fəaliyyətini,
cəmiyyət qarşısındakı xidmətlərini
yüksək qiymətləndirmişdir.
Əli
Həsənov əmin olduğunu bildirmişdir ki, "İki
sahil" qəzeti bundan sonra da Azərbaycan cəmiyyətinə,
dövlətçiliyinə sədaqətlə xidmət edəcəkdir.
Azərbaycan
Respublikası Dövlət Neft Şirkətinin prezidenti, Milli
Məclisin deputatı Rövnəq Abdullayev də qəzetin
kollektivini təbrik edərək demişdir ki, qəzet cəmiyyətimizin
informasiya tələbatının ödənilməsində
mühüm rol oynamışdır.
R.Abdullayev
bildirmişdir ki, Dövlət Neft Şirkəti qəzetin bir
qrup əməkdaşının fəxri fərmanla təltif
olunması və mükafatlandırılması barədə
qərar qəbul etmişdir. ARDNŞ prezidenti fəxri fərmanları
və mükafatları sahiblərinə təqdim etmişdir.
Mərasimdə
çıxış edən YAP sədrinin müavini - icra
katibi, Milli Məclisin deputatı Əli Əhmədov
"İki sahil" qəzetinin Azərbaycan həqiqətlərinin
yayılmasında mühüm xidmətlər göstərdiyini,
öz missiyasını uğurla yerinə yetirdiyini
vurğulamışdır. Bildirmişdir ki, fəaliyyətə
başladığı dövrdə ulu öndər Heydər Əliyevin
ideyalarını, siyasi tezislərini cəmiyyətə
çatdırmaq üçün ziyalılar "İki
sahil" qəzetində çıxış edirdilər.
Ə.Əhmədov
YAP Siyasi Şurasının qəzetin kollektivinə
ünvanlandığı təbrik məktubunu V.Rəhimzadəyə
təqdim etmişdir.
Daha
sonra Mətbuat Şurasının sədri Əflatun
Amaşov, ARDNŞ-in vitse-prezidenti Xoşbəxt Yusifzadə və
başqaları qəzetin kollektivini təbrik etmiş, onlara
uğurlar arzulamışlar.
Mərasim
incəsənət ustalarının maraqlı konsert
proqramı ilə davam etmişdir.
AzərTAc
Azərbaycan.-
2011.- 20 iyul.- S.4.