Milli Qəhrəmanın ekran həyatı

Beynəlxalq Mətbuat Mərkəzində torpaqlarımızın azadlığı uğrunda şəhid olmuş Azərbaycanın ilk Milli Qəhrəmanı Aqil Quliyevin döyüş yoluna həsr edilmiş sənədli filmin təqdimat mərasimi keçirildi.

Azərbaycan Respublikası Prezidenti yanında qeyri-hökumət təşkilatlarına dövlət dəstəyi şurasının maliyyə dəstəyi ilə ekranlaşdırılmış filmin təqdimat mərasimini tanınmış hərbi diktor Şəmistan Əlizamanlı açdı. Filmin qəhrəmanı haqqında tamaşaçılara ətraflı məlumat verərək bildirdi ki, belə igidlər haqqında ekran əsərlərinin yaradılması çox vacibdir. Gənclərimizin hərbi vətənpərvərlik tərbiyəsində bu filmlərin rolu əvəzsizdir.

Ehtiram İlhamın ssenari müəllifliyi, Mahir Dərvişin rejissorluğu ilə ərsəyə gələn filmin gənclərə hərbi vətənpərvərlik duyğularının aşılanmasında təsiri sözsüzdür. 35 dəqiqəlik filmdə Milli Qəhrəmanın cəbhə dostları, doğmaları, onun şəxsi insani məziyyətlərindən, həm də bir komandir kimi döyüş məharətindən bəhs etdilər. Milli Məclisin üzvü Musa Quliyev, vaxtilə Aqildən müsahibə almış telejurnalist Qulu Məhərrəmli qəhrəmanının daxili keyfiyyətlərindən, şücaətindən rəğbətlə söz açdılar.

Təqdimat mərasimində respublikanın tanınmış ziyalıları, Milli Qəhrəmanın ailə üzvləri, doğmaları və döyüş yoldaşları iştirak edirdilər. Qəhrəmanlıq tariximizin yaşaması və unudulmaması, eləcə də gələcək nəsillərə daha mükəmməl çatdırılması baxımından bu filmin əhəmiyyəti böyükdür. Rejissor Mahir Dərviş filmin ingilis, rus və başqa dillərə tərcümə olunacağını da bildirdi. 1992-ci il fevralın 26-da Xocalıda son damla qanına qədər vuruşaraq Vətən uğrunda şəhid olan Aqil Quliyevin şərəfli həyat yolu hələ də müharibə şəraitində yaşayan bir ölkənin vətəndaşı kimi bizlərə nümunədir.

Şəmistan Əlizamanlı bildirdi ki, həyatlarını doğma yurd uğrunda qurban verən qəhrəman oğulların şücaəti hələ bundan sonra da ekranlaşdırılacaq. Bu vacib və böyük işin davamı olaraq Aqil Quliyev kimi şəhidlik zirvəsinə yüksəlmiş Milli Qəhrəman Fəxrəddin Nəcəfovla da bağlı sənədli filmin çəkiləcəyi vurğulandı.

Vaxtilə böyük Səməd Vurğunun söylədiyi misralar Aqil kimi Vətən oğullarının xarakterini səciyyələndirmək baxımından bu gün də dillər əzbəridir: "Biz sizdən öyrəndik qəhrəmanlığı..."

Nilufər VƏLİYEVA,

Sahilə MUSAZADƏ,

BDU-nun jurnalistika fakültəsinin

tələbələri

Azərbaycan.- 2011.- 20 iyul.- S.5.