Avropa təsisatları ilə əlaqələrin inkişafı Azərbaycanın xarici siyasətində əsas prioritetlərdəndir

İyulun 20-də Milli Məclisin Sədri Oqtay Əsədov Avropa Şurası Parlament Assambleyası (AŞ PA) Avropa Xalq Partiyasının üzvləri ilə görüşmüşdür. Avropa Xalq Partiyasının (AXP) təmsilçilərinin Azərbaycana səfərlərini yüksək dəyərləndirən Oqtay Əsədov bunun Milli Məclislə AŞ PA arasında əməkdaşlığın daha da möhkəmlənməsinə gətirib çıxaracağına ümid etdiyini bildirdi. O dedi ki, Azərbaycan Avropa strukturları ilə əlaqələrin inkişafına xüsusi önəm verir. Avropa təsisatları ilə əlaqələrin inkişafı Azərbaycanın xarici siyasətində prioritet istiqamətlərdən biridir. 10 ildən artıqdır ki, Azərbaycan Avropa Şurasının üzvüdür. Bu illər ərzində ölkəmizin demokratik inkişafında, qanunvericiliyin Avropa standartlarına çatdırılmasında Avropa Şurası böyük rol oynayıb.

Daha sonra Milli Məclisin Sədri Yeni Azərbaycan Partiyası ilə Avropa Xalq Partiyası arasında yaranmaqda olan əlaqələrdən söz açaraq dedi ki, YAP-la AŞ PA-da ən böyük partiya olan AXP arasında əlaqələr yaranıb. İstərdik ki, YAP müşahidəçi qismində AXP-də təmsil olunsun. Sosial-iqtisadi sferada Azərbaycan dünyanın ən sürətli inkişaf edən ölkələri sırasında yer alır. Hətta 2009-cu ildə zirvə nöqtəsinə çatan qlobal maliyyə böhranı zamanı Azərbaycanda ümumi daxili məhsul 9,3 faiz artıb. Demokratik sahədə də Azərbaycan sürətlə inkişaf edir.

Milli Məclisin Sədri Ermənistan-Azərbaycan, Dağlıq Qarabağ münaqişəsinə də toxunaraq bunun təkcə ölkəmizin yox, Avropanın təhlükəsizliyi üçün də hədə yaratdığını söylədi. Qeyd etdi ki, 20 ildən artıq davam edən münaqişənin dinc yolla həlli üçün BMT Təhlükəsizlik Şurasının, Avropa İttifaqının, Avropa Şurasının qətnamələri hələ də Ermənistan tərəfindən yerinə yetirilmir. Ermənistan bu qətnamələrə məhəl qoymur. Bununla beynəlxalq hüquqa, həmin qətnamələri qəbul edən təşkilatlara hörmətsiz yanaşdığını göstərir. Elə AŞ PA-nın yay sessiyasında qurumun Dağlıq Qarabağ münaqişəsi üzrə Alt Komitəsinin iclasına Ermənistan tərəfi qatılmaqdan imtina etdi. Bununla bir daha Avropa Şurasına qarşı hörmətsizlik etdiyini göstərmiş oldu.

AXP sədri Luca Volonte AŞ PA-nın demokratiya üçün böyük zəmin rolu oynadığını qeyd etdi. O, YAP-ın AXP-də müşahidəçi qismində təmsil olunacağına əminliyini söyləyərək bunun AXP-nin beynəlxalq əlaqələrinin inkişafına töhfə olacağını diqqətə çatdırdı. Daha sonra o, Azərbaycanda demokratiyanın daha da inkişafı, qanunların təkmilləşdirilməsi istiqamətində hansı işlərin görülməsi, dini tolerantlıq səviyyəsi ilə maraqlandı.

Bu məsələlərə aydınlıq gətirən Oqtay Əsədov Azərbaycanın Avropa Şurası qarşısında götürdüyü öhdəliklərin böyük əksəriyyətini yerinə yetirdiyini demokratik inkişaf istiqamətində səylərini davam etdirdiyini bildirdi. Ölkəmizdə dini tolerantlığın çox yüksək səviyyədə olduğunu qeyd etdi.

Görüşdə tərəfləri maraqlandıran digər məsələlər ətrafında da fikir mübadiləsi aparıldı.

Azərbaycan.-2011.-21 iyul.-S.2.