Lerik ölkənin ən perspektivli turizm diyarlarından birinə çevrilib

Yaxın keçmişədək Lerik Azərbaycanın ucqar, gözdən-könüldən uzaq dağ rayonu sayılırdı. Hətta ötən əsrin 60-cı illərində Lerik perspektivsiz rayon hesab olunaraq yaşayış məskəni kimi respublikanın coğrafi xəritəsindən silinmək təhlükəsi ilə üzləşmişdi. İndi cənub bölgəsinin bütün rayonlarına səpələnmiş əslən leriklilər məhz o dövrün müdhiş siyasətinin məcburi köçkünləridir.

Bu gün Lerik başqa aləmdir. İlk regional sosial-iqtisadi inkişaf dövlət proqramının icrası rayonun sosial-iqtisadi simasını büsbütün dəyişib. Lənkəran-Lerik avtomobil yolunun yenidən qurulması ilə başlanan inkişaf rayonun bütün sahələrini əhatə edib. İndi, xüsusən yayda Lerikə yolu düşən oradan ayrılmaq istəmir. Burada insan əməyi, dövlət qayğısı təbiətin füsunkarlığı ilə qovuşub. Təsadüfi deyil ki, Lerik bu gün həm də Azərbaycanın perspektivli turizm rayonu sayılır. İş adamlarının fəal iştirakı ilə salınan turizm obyektlərinin istənilən səviyyəli qonaqları qəbul etmək imkanları var.

Sözsüz ki, bütün bunlara rayonun sosial-iqtisadi inkişafını təmin etmədən nail olmaq mümkün deyildi. Bəli, Lerik həqiqətən son illər bu sahədə böyük uğurlara imza atır. O cümlədən, cari ilin ilk yarısının yekunları da istisna təşkil etmir.

Bu günlər rayon ictimaiyyəti Nazirlər Kabinetinin 2011-ci ilin 6 ayının yekunlarına həsr olunmuş iclasında dövlət başçısının nitqlərindən irəli gələn vəzifələri müzakirə etmişdir. Tədbirdə, həmçinin rayon üzrə ilin 6 ayında görülmüş işlərdən və qarşıda duran vəzifələrdən danışılmışdır. Qeyd olunmuşdur ki, hesabat dövründə adambaşına düşən gəlir 2010-cu ilə nisbətən 8,20 manat artaraq 232,4 manat təşkil etmiş, ümumi məhsul buraxılışının həcmi 2010-cu ilə nisbətən 3, adambaşına düşən ümumi məhsul buraxılışının həcmi 2,4, pərakəndə əmtəə dövriyyəsi 12, pullu xidmət 3,2, təmir-tikinti işləri 13 faiz çoxalmışdır. Rayon üzrə əhalinin orta aylıq nominal əməkhaqqı keçən ilin müvafiq dövrünə nisbətən 10,2 faiz artaraq 261,4 manata, əhalinin gəlirləri 5,2 faiz artaraq 17204,1 min manata çatmışdır.

İclasda qeyd olunmuşdur ki, "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nın icrası məqsədi ilə RİH tərəfindən tədbirlər planı hazırlanmışdır. Proqramın qəbulundan keçən vaxt ərzində rayonda 1582, o cümlədən cari ildə 343 yeni iş yeri açılmışdır. Əsasən rayonda aparılan tikinti-abadlıq işlərində işə cəlb edilmiş vətəndaşlardan 133, o cümlədən 2011-ci ilin II rübündə 102 nəfəri daimi işlə təmin edilmişdir. Ümumilikdə isə 2004-2011-ci illər ərzində 6334 nəfər rayon sakini özünə daimi iş yeri tapmışdır.

Turizmin Lerikdə yeni sahə olmasına baxmayaraq, artıq rayonda 9 turizm-istirahət mərkəzi fəaliyyət göstərir. Bu mərkəzlərdə eyni vaxtda 700 nəfərdən artıq turistin qalması və istirahət etməsi üçün ən müasir standartlara uyğun hər cür şərait yaradılmışdır. Lerik şəhərində tikinti-abadlıq işlərinin aparılması, küçələrin yenilənməsi, şəhərdə yeni muzeylərin, ticarət obyektlərinin tikintisi də turistlərin rayona axınını artırmışdır. "Relax" turizm istirahət mərkəzində yaradılan "AKVA-park" istirahət meydançasının istifadəyə verilməsinə az qalıb. Burada gələcəkdə kanat yolların tikintisi də nəzərdə tutulur.

Lerik şəhərində 1052 yaşayış evinə qaz xətti çəkilmişdir. İyun ayında isə rayonun 6 kəndinə qaz verilmiş, 500-dən yuxarı abonent mavi yanacaqla təmin edilmişdir. Amma 155 yaşayış məntəqəsi hələ də yanacaq kimi meşə ağaclarından istifadə edir. Rayonun Kiravud, Ərdəbilə, Gürdəsər, Əliabad, Camaşair, Soru, Bilnə, Hıramo, Noda kəndlərinə qaz xəttinin çəkilməsi üçün "Azəriqaz" İstehsalat Birliyinə müraciət edilmişdir. "Azəriqaz" İB müraciətə müsbət cavab vermişdir.

Bundan əlavə, rayon ərazisində mövcud olan 496 km kəndarası yolların əsaslı təmirinə ciddi ehtiyac var. Azərbaycan Respublikası Prezidentinin Administrasiyasının tapşırığına əsasən, əhalinin daha çox istifadə etdiyi Xanagah, Lerik-Kəlvəz yolu barədə ilkin məlumatlar toplanmış, smeta sənədləri hazırlanmışdır. Bütün sənədlər müvafiq qərar qəbul olunması üçün əlaqədar icra orqanlarına təqdim edilmişdir.

Keçən ilin fevral və mart aylarında çayların daşması, çaylarda sululuğun artması, aylıq normadan artıq yağış və qarın yağması səbəbindən Lerik-Kəlvəz və Lerik-Mastayıl yollarında əhalinin gündəlik intensiv istifadə etdiyi körpülər qəza vəziyyətinə düşmüşdü. Rayon icra hakimiyyəti tərəfindən Nazirlər Kabinetinə, Fövqəladə Hallar və Nəqliyyat nazirliklərinə edilmiş müraciətlərdən sonra qısa vaxt ərzində daha müasir körpülər tikilərək əhalinin istifadəsinə verilmişdir. Bununla yanaşı, kənd sakinlərinin maliyyə dəstəyi ilə bir neçə ərazidə kəndarası yollarda təmir işləri aparılmışdır.

İclasda qeyd olundu ki, Qarabağ müharibəsi əlilləri və şəhid ailələri üçün 2010-cu ildə 16 mənzilli yeni yaşayış evi, ərazilərdə isə 4 nəfər Qarabağ müharibəsi əlili üçün fərdi yaşayış evi tikilmişdir. 2011-ci ildə daha 6 fərdi yaşayış evinin tikintisi üçün tələb olunan ilkin sənədlər hazırlanmış, mənzil şəraitinin yaxşılaşdırılmasına ehtiyacı olan Qarabağ müharibəsi əlilləri müəyyən edilmişdir. Lerik şəhərində Qarabağ müharibəsi əlilləri və şəhid ailələri üçün yeni 16 mənzilli kommunal binanın tikintisinə görə Əmək və Əhalinin Sosial Müdafiəsi Nazirliyinə müraciət olunmuşdur.

İclasda bir vacib məsələdən də danışıldı. Bildirildi ki, Lerik şəhərinin su təchizatının yaxşılaşdırılması və kanalizasiya sisteminin yaradılması ilə bağlı ilkin layihə sənədlərinin hazırlanması üçün Dünya Bankı rayonda işlərə başlamış, tender elan olunmuşdur. Yaxın günlərdə tikilinin başlanması gözlənilir.

Seyran CAVADOV

Azərbaycan.-2011.-21 iyul.-S.5.