İl ildən uğurlu gəlir

İl yarı olub. 6 ayda görülən işlər artıq göz qabağındadır. İlkin yekunlar göstərir ki, Gədəbəy rayonunda həmişə olduğu kimi, cari ilin ötən aylarında da qarşıda duran vəzifələr uğurla yerinə yetirilir.

Nazirlər Kabinetinin 2011-ci ilin birinci yarısının sosial-iqtisadi inkişafının yekunlarına həsr olunmuş iclasının materialları müzakirə edilərkən bu barədə geniş söhbət getdi. İcra hakimiyyətinin başçısı Kamran Rzazadə Prezident İlham Əliyevin qarşıya qoyduğu vəzifələr barədə danışdı və həmin tələblər baxımından rayonun sosial-iqtisadi vəziyyətini ətraflı təhlil etdi, mövcud problemlərin həlli ilə bağlı fikirlərini bildirdi.

Sonra "Sukanal" idarəsinin rəisi Yaşar Hüseynovun, təhsil şöbəsinin müdiri Ramiz Məmmədovun, Poçtamtın rəisi Ramin Cəfərovun, Nərimankənd bələdiyyəsinin sədri Mirvari Alıyevanın və başqalarının çıxışları dinlənildi. Yekdilliklə qeyd olundu ki, Gədəbəy rayonunda regionların sosial-iqtisadi inkişafı Dövlət Proqramının tələblərindən irəli gələn vəzifələr hər sahədə uğurla yerinə yetirilir. Cari ilin birinci yarısında ÜDM istehsalının həcmi 51,7 milyon manat olmuşdur ki, bu da nəzərdə tutulduğundan xeyli çoxdur.

Kənd təsərrüfatı məhsulları istehsalında, pərakəndə əmtəə dövriyyəsində, xidmət və digər sahələrdə də ötən ilin müvafiq dövründəkinə nisbətən artım əldə olunub. Rayon üzrə orta aylıq əməkhaqqı artaraq 252 manata çatıb.

İlkin müşahidələr göstərir ki, maldarlıq üzrə, eləcə də kartof, buğda və qarğıdalı əkini sahələrində məhsuldarlıq keçən ildəkinə nisbətən yüksək olacaq. 6 ay ərzində rayon büdcəsinin mədaxili 11,9 milyon manata qarşı 13,2 milyon manat təşkil edib.

Toplantıda abadlıq və quruculuq işlərindən də danışıldı. Qeyd olundu ki, rayonun mərkəzində, eləcə də ən ucqar yaşayış məntəqələrində sosial obyektlərin, fərdi evlərin, inzibati binaların icrasına xüsusi əhəmiyyət verilir. Sərhəd kəndlərinin qazlaşdırılması proqramı uğurla yerinə yetirilir. Bu yaxınlarda Novosaratovka və Düz Rəsullu kəndlərində 577 mənzilə təbii qaz verilib. Şınıx magistral qaz kəməri xəttinin çəkilişi başa çatıb. Hazırda sərhəd zonasında yerləşən Göyəllidə, Hüseynqulularda, Kərməşöylüdə və Rəhimlidə kənddaxili daşıyıcı qaz xətləri çəkilir.

Rayonda sosial obyektlərin inşası məsələsi xüsusi diqqət mərkəzindədir. Bu günlərdə İsalı, Arabaçı kəndlərində poçt şöbələri üçün yeni binalar istifadəyə verilib. Bu barədə danışılarkən qeyd edildi ki, SSRİ-nin tərkibində olduğumuz 70 il ərzində poçt şöbələri üçün bir dənə də olsun bina tikilmədiyi halda, son 7 il ərzində ayrı-ayrı qəsəbə və kəndlərdə 8 poçt binası inşa edilib, rayonun 18 kəndində elektron ATS-lər istifadəyə verilib.

Gədəbəy məktəb binası tikintisi sahəsində də fərqlənir. Son illərdə 70-ə qədər məktəb binası tikilib, yaxud əsaslı təmir edilib. Bundan əlavə, Uşaq Gənclər İdman Məktəbi və Səmətkeçməz tam orta məktəbi üçün binalar inşa olunur, 2 saylı şəhər orta məktəbinin binası təmir edilir.

6 ay ərzində digər sahələrdə də xeyli işlər görülüb. Rüstəm Əliyev kəndində uzun illər təmirsiz qalan mədəniyyət evi yenidən qurularaq müasir avadanlıqlarla təchiz olunub, Çalburun kənd mədəniyyət evində, Qoşabulaq, Daryurd və Ağamalı kənd klublarında cari təmir işləri aparılıb, Böyük Qaramurad kəndində həkim məntəqəsi açılıb.

Aramsız yaz yağışlarının törətdiyi fəsadlar əsasən daxili imkanlar hesabına və müvafiq təşkilatların köməyi ilə həll edilib. Mis çayının ətrafında sel suları nəticəsində yuyulub dağılmış istinad divarları bərpa olunub. Yolların sahmanlanması, körpü-keçidlərin inşası üçün hazırda mütəxəssislərin köməyi ilə gərgin iş gedir. Qasımlı kəndinin yolunda körpü-keçidin inşası başa çatmaq üzrədir. Söyüdlü və Rüstəm Əliyev avtomobil yolları da əsaslı təmir edilir. Yaxın vaxtlarda isə Gədəbəy-Qaravəlilər yolunun asfaltlaşdırılmasına başlanacaq.

Rayon üçün xüsusi əhəmiyyətə malik olan 72 metrlik Fındıqlı körpüsü dövlət başçısının tapşırığı ilə yenidən qurulur. Bundan əlavə, rayon mərkəzində xatirə-abidə kompleksində əsaslı təmir işləri başa çatdırılıb, Şəhidlər xiyabanında abadlıq işləri davam etdirilir.

Gədəbəy ata-babadan kartofun vətənidir. Toplantıda qeyd olundu ki, əhalini ən çox narahat edən məsələlərdən biri kartofun alıcıya çatdırılması ilə əlaqədardır. Artıq bu məsələ də həll olunmaq üzrədir. Rayonda 10 min ton tutumu olan kartof saxlama və emalı müəssisəsi inşa olunur. İstər bu yeni obyektdə, istərsə də Aşıq musiqi məktəbində, habelə rayon məhkəməsinin inzibati binasında inşaat işləri də sürətlə davam edir.

Tənqid və özünütənqid şəraitində keçən toplantıda hesabat dövründə görülən dəyərli işlər qeyd edilməklə yanaşı, bir sıra sahələr üzrə iradlar söylənildi, arzu və təkliflər irəli sürüldü. Son vaxtlarda RİH tərəfindən səyyar qəbulların keçirilməsi müsbət qiymətləndirildi. Belə qəbullarda rayonun ayrı-ayrı bölgələrində, ən ucqar kəndlərində belə icra orqanlarının səlahiyyətli nümayəndələri ilə birlikdə əhalinin arzu və istəkləri öyrənilir. Son ayların səyyar qəbullarında 3 min nəfərdən çox adam iştirak etmiş, vətəndaşlar tərəfindən 99 təklif irəli sürülmüşdür. Qeyd olundu ki, bu təkliflərin icrası üçün operativ surətdə təsirli tədbirlərin görülməsi vacibdir.

Əhməd İSAYEV

Azərbaycan.-2011.-21 iyul.-S.5.