Rusiya Gənclərinin İctimai Palatasının nümayəndələri seminarlarda iştirak
etmişlər
Rusiyanın Azərbaycanlı Gənclər
Təşkilatının sədri, Heydər Əliyev Fondunun
vitse-prezidenti Leyla Əliyevanın dəvəti ilə
Bakıya gəlmiş Rusiya Gənclərinin İctimai
Palatasının nümayəndələri iyulun 20-də
"Park İnn" otelində iki seminarda iştirak etmişlər.
AzərTAc xəbər verir ki, seminarlar
"Beynəlxalq münasibətlərin nəzəriyyə və
praktikasında konfliktin tənzimlənməsi: Azərbaycanın
Dağlıq Qarabağ bölgəsində münaqişənin
siyasi və hüquqi aspektləri" və "Azərbaycanın
təqdimatı: ölkə haqqında informasiyanın (tarix, mədəniyyət,
adət-ənənə) yayılması" mövzularına
həsr olunmuşdur.
Dağlıq Qarabağ münaqişəsi
ilə bağlı seminarda Milli Məclisin deputatı, politoloq
Rasim Musabəyov geniş məlumat vermişdir. O, Qarabağ
münaqişəsinin uzun müddət dondurulmasının
qonşu ölkələrin də siyasi və iqtisadi əlaqələri
üçün münasib olmadığını diqqətə
çatdırmışdır. Politoloq, eyni zamanda, Rusiya və
Azərbaycan arasında sıx iqtisadi əməkdaşlığın
mövcud olduğunu, Xəzərin statusu ilə bağlı
Azərbaycan, Rusiya, Qazaxıstan arasında razılıq əldə
edildiyini xatırlamışdır. O, həmçinin Azərbaycanın
Qafqaz regionunda sabitliyin saxlanmasında həlledici rolunu
vurğulamışdır. Rasim Musabəyov Dağlıq
Qarabağ münaqişəsinin həllinin Rusiyanın da
siyasi və iqtisadi maraqlarına uyğun olduğunu diqqətə
çatdırmışdır.
Azərbaycanın təqdimatı ilə
bağlı seminarda Azərbaycan Respublikası Prezidenti
Administrasiyasının siyasi təhlil və informasiya təminatı
şöbəsinin sektor müdiri Fərhad Məmmədov
ölkəmizin tarixi, xalqımızın milli
özünüdərkinin formalaşması və
inkişafı prosesi haqqında məlumat vermişdir. Natiq
sovet dövründə ölkəmizin ictimai-siyasi, iqtisadi, mədəni
durumunda dönüş mərhələsinin məhz 1969-cu
ildən - ulu öndər Heydər Əliyevin Azərbaycanda
hakimiyyətə gəlişindən sonra
yarandığını vurğulamışdır.
Bildirmişdir ki, müstəqilliyin ilk
illərində xalqın təkidli tələbi ilə
ümummilli lider Heydər Əliyevin hakimiyyətə
qayıdışından sonra ölkəmizin qədim mədəniyyətinin
və uğurlarının dünya ictimaiyyətinə
çatdırılması istiqamətində mühüm
işlər görülmüşdür. O, ümummilli lider
Heydər Əliyevin siyasətinin bu gün də Azərbaycan
Prezidenti İlham Əliyev tərəfindən uğurla davam
etdirildiyini, dövlətin siyasətində gənclərə
xüsusi diqqət ayrıldığını söyləmişdir.
Seminarların gedişində
qonaqları maraqlandıran suallar
cavablandırılmışdır.
Xatırladaq ki, seminarlarda iştirak edən
rusiyalı qonaqlar arasında Xarici İşlər Nazirliyinin əməkdaşları
Yelena Arxipova, Aleksandr Suxanov, "Sankt Peterburq Gənclər
evi"ndən ("Dom molodyoj Sankt Peterburqa") Aleksandra
Smirnova, Ural Federal Universitetinin məzun və tələbələri
olmuşlar.
Azərbaycan.-2011.-21
iyul.- S.6.