Azərbaycan Diplomatik Akademiyası Afrika və Asiya ölkələrinin diplomatları üçün kurslar keçirir

İyulun 21-də Azərbaycan Diplomatik Akademiyası (ADA) ilk dəfə olaraq Afrika və Asiya ölkələrindən gəlmiş diplomatlar üçün kursların keçirilməsinə başlamışdır.

AzərTAc xəbər verir ki, "Xəzər hövzəsi ölkələrinin öyrənilməsi" proqramı üzrə keçirilən kurslarda Afrika və Asiya ölkələrindən 14 diplomat iştirak edir.

Kursların ilk günündə diplomatlar qarşısında çıxış edən xarici işlər nazirinin müavini, ADA-nın rektoru Hafiz Paşayev Azərbaycanın müstəqilliyini yenidən bərpa etdiyi son 20 ildə keçdiyi inkişaf yolundan, ölkəmizdə həyata keçirilən uğurlu iqtisadi islahatlardan, Dağlıq Qarabağ regionu və ətraf rayonların Ermənistan silahlı qüvvələri tərəfindən işğal olunması faktından söhbət açmışdır.

Kursların keçirilməsinin Azərbaycan həqiqətlərinin beynəlxalq siyasi dairələrə çatdırılması baxımından əhəmiyyətini vurğulayan H.Paşayev əsas məqsədin regionumuzda gedən proseslər barədə BMT-də çalışan diplomatlara dolğun məlumat vermək və onların ölkəmizlə bağlı siyasətlərinin gələcəkdə daha dəqiq informasiya əsasında formalaşdırılmasını təmin etməkdən ibarət olduğunu bildirmişdir.

Dərslərin gedişində diplomatlara Azərbaycan və Xəzər regionu haqqında ətraflı məlumatların veriləcəyini deyən rektor ölkəmizdə olduqları müddətdə qonaqların Bakı və ətraf regionlara səfər edəcəklərini, Azərbaycanın mədəniyyəti və tarixi ilə yaxından tanış olacaqlarını söyləmişdir.

Kursların davam edəcəyi 10 gün müddətində xarici diplomatlar Xəzər regionunun tarixi və mədəni irsi, dənizin statusu və geosiyasəti, neft sənayesi, investisiya imkanları, regionun gələcəyinə təhlükə yarada biləcək potensial təhdidlər, regional münaqişələrə dair məruzələr dinləyəcəklər.

Xarici İşlər Nazirliyinin, ADA-nın, Azərbaycan Respublikası Dövlət Neft Şirkətinin, Azərbaycanda İxracın və İnvestisiyaların Təşviqi Fondunun (AZPROMO) nümayəndələri iştirakçılara mühazirələr oxuyacaqlar.

Diplomatlar üçün Azərbaycanın müstəqilliyinin bərpasının 20-ci ildönümü ilə bağlı xüsusi təqdimat da keçiriləcəkdir.

Qonaqlar ölkəmizdə olduqları müddətdə Quba və Qobustanda olacaq, Səngəçal terminalını, Bibiheybət məscidini və digər mədəniyyət ocaqlarını və muzeyləri ziyarət edəcəklər.

Xatırladaq ki, iyunun 15-25-də ADA Latın Amerikası ölkələri və Karib adalarından 14 diplomat üçün də "Xəzər hövzəsi ölkələrinin öyrənilməsi" kursunu keçirmişdir.

Azərbaycan.- 2011.- 22 iyul.- S.2.