Bakıda "Davamlı inkişaf üçün fotosintez tədqiqatları" mövzusunda Beynəlxalq konfrans keçirilir

İyulun 24-də Azərbaycan Milli Elmlər Akademiyasında "Davamlı inkişaf üçün fotosintez tədqiqatları" mövzusunda Beynəlxalq konfrans işə başlamışdır.

AzərTAc xəbər verir ki, konfransın sədri Fotosintez Tədqiqatları üzrə Beynəlxalq Cəmiyyətin prezidenti, professor Ceyms Barber (Böyük Britaniya), fəxri sədri isə Azərbaycan Milli Elmlər Akademiyasının həqiqi üzvü Cəlal Əliyevdir. Hidrogen Enerjisi üzrə Beynəlxalq Assosiasiyanın prezidenti, professor Necat Vəziroğlu və professor Qari Brudviq (hər ikisi ABŞ-dan) konfransın həmsədrləri, biologiya elmləri doktoru, professor Süleyman Allahverdiyev (Rusiya) əlaqələndirici təyin olunmuşlar.

Konfransda 40 ölkədən 260-dək nümayəndə iştirak edir.

Konfransı giriş sözü ilə açan Ceyms Barber onun təşkilinə görə Azərbaycan hökumətinə minnətdarlığını bildirmişdir. O demişdir ki, belə bir mötəbər tədbirin Azərbaycanda keçirilməsi iştirakçılara həm də bu qədim ölkənin tarixini, mədəniyyətini, milli adət-ənənələrini daha yaxından öyrənməyə imkan verəcəkdir.

Fotosintezin çox geniş və dərin tədqiqat tarixi olduğunu vurğulayan alim bildirmişdir ki, konfransda iştirak edən mütəxəssislərin əksəriyyəti bu sahənin öyrənilməsində mühüm rol oynamışlar. Qarşımızda duran ən vacib məsələ Yer kürəsində durmadan artan əhalinin ərzaq problemini həll etməkdir.

Tədbirdə çıxış edən Azərbaycanın rabitə və informasiya texnologiyaları naziri, akademik Əli Abbasov demişdir ki, bu gün dünyanı üç qlobal problem ciddi narahat edir - enerji, ərzaq və ekoloji təhlükəsizlik problemləri. Siyasətçilər, iqtisadçılar, alimlər, ümumiyyətlə, dayanıqlı və xoşbəxt gələcək üçün düşünənlər bu məsələlərin həlli yollarını axtarırlar.

Enerji resurslarına olan müasir tələbatın təxminən 80 faizi karbohidrogen ehtiyatlarının hesabına ödənilir. Enerji daşıyıcılarının qiymətlərinin durmadan artması və resursların məhdudluğu hamıya məlumdur. Bu gün alternativ enerji növlərindən, əsasən də Günəş enerjisindən istifadə, o cümlədən fotosintez əsasında həyata keçirilən biotexnologiyalar vasitəsilə bioenerjinin alınması ümidverici istiqamətlərdəndir. Fotosintezin klassik problemləri ilə yanaşı, stres biologiyası, süni fotosintez və yanacaq problemləri kimi vacib məsələlər də gündəlikdədir. Alimlərin Yer üzündə təbii ehtiyatların tükənməsini gözləmədən, cəmiyyətin 100-200 il sonrakı taleyini düşünməsi, bu istiqamətdə çalışması təqdirəlayiqdir. Konfransın təşkilat komitəsinin tərkibinə dünyanın aparıcı ölkələrinin fotosintez tədqiqatları sahəsində çalışan nüfuzlu alimləri daxildir. Məhz belə bir irimiqyaslı elmi tədbirin Azərbaycanda ilk dəfə keçirilməsi akademik Cəlal Əliyevin fotosintezin tədqiqi sahəsində, həmçinin yaratdığı məktəbin əldə etdiyi böyük uğurların dünya elmi ictimaiyyəti tərəfindən ciddi qiymətləndirilməsi ilə bağlıdır. Akademik Cəlal Əliyev məktəbinin dünya elminə verdiyi töhfələr fotosintez prosesinin molekulyar-genetik səviyyədən başlayaraq bitki və əkinə qədər bütün mərhələ və formalarında öyrənilməsini əhatə edir.

Xüsusi olaraq qeyd edilmişdir ki, Azərbaycan hökumətinin elmin inkişafına verdiyi diqqət və qayğı Prezident İlham Əliyevin təsdiq etdiyi "2009-2015-ci illərdə elmin inkişafı üzrə Milli Strategiya"da və onun həyata keçirilməsi üzrə Dövlət Proqramında bir daha öz əksini tapmışdır.

Ə.Abbasov demişdir ki, dünya şöhrətli alimlərin iştirak etdikləri bu beynəlxalq konfrans fotosintez sahəsində yeni elmi nəticələrin əldə edilməsinə təkan verəcək, eyni zamanda, Azərbaycan elminin təbliğində, dünya elminə inteqrasiyasında çox önəmli rol oynayacaqdır.

Açılış mərasimində çıxış edən alimlər - Bill Rutherford (Fransa), Bob Blankenşip (ABŞ) və Süleyman Allahverdiyev (Rusiya) vurğulamışlar ki, belə konfranslar elmi biliklərin təkmilləşməsində və yeni təcrübə mübadiləsinin aparılmasında müstəsna rol oynayır.

İyulun 30-dək davam edəcək elmi forumda fotosintez prosesinin bütün istiqamətləri, o cümlədən hidrogenin alınması və süni fotosintez kimi problemlər barədə geniş müzakirələr aparılacaq, konfransın materialları beynəlxalq "Biochimica et Biophysica Acta (Bioenergetics)" və "Journal of Hydrogen Energy" jurnallarının xüsusi buraxılışlarında dərc olunacaqdır.

Azərbaycan.- 2011.- 26 iyul.- S. 4.