Azərbaycan Diplomatik Akademiyasının Asiya və Afrika diplomatları üçün kursları başa çatmışdır

İlk dəfə Afrika və Asiyadan gəlmiş diplomatlar Azərbaycan Diplomatik Akademiyasının (ADA) "Xəzər hövzəsi ölkələrinin öyrənilməsi" proqramı üzrə on günlük kursda iştirak etmişlər.

Xarici işlər nazirinin müavini, Azərbaycan Diplomatik Akademiyasının rektoru Hafiz Paşayev dərslərin başa çatması münasibətilə kurs dinləyicilərini təbrik edərək bildirmişdir ki, proqram Afrika və Asiyadan gələn iştirakçılar üçün Azərbaycanın siyasi, iqtisadi nailiyyətləri, eyni zamanda mədəniyyəti, tarixi haqqında məlumat almaq baxımından yaxşı imkanlar yaratmışdır.

Nepallı diplomat Sharma Pokharel iştirakçılar adından bildirmişdir ki, Azərbaycan onların yaddaşında xüsusi iz buraxmışdır. O, burada aldıqları biliklərin səviyyəsini və insanların səmimiyyətini yüksək qiymətləndirmişdir.

Tədbirin sonunda proqram iştirakçılarına sertifikatlar təqdim olunmuşdur.

Xatırladaq ki, təlimə Haiti, Mali, Samoa, Banqladeş, Kamboca, Nepal, Myanma, Malayziya və digər ölkələrdən 14 diplomat qatılmışdır.

Azərbaycanda olduqları zaman xarici diplomatlar Xəzər dənizi regionunun tarixi və mədəni irsi, onun statusu və geosiyasəti, neft sənayesi, iqtisadiyyatı və investisiya imkanları, regionun gələcəyinə təhlükə yarada biləcək potensial təhdidlər, regional münaqişələrə dair məruzələri dinləmişlər. Diplomatlar qarşısında Azərbaycan Diplomatik Akademiyası, Xarici İşlər Nazirliyi, Dövlət Neft Şirkəti, Mərkəzi Bank və Azərbaycanda İxracın və İnvestisiyaların Təşviqi Fondunun nümayəndələri mühazirələr oxumuşlar.

Azərbaycanın mədəniyyəti və tarixi haqqında ətraflı məlumat almaq üçün xarici diplomatlar Qubaya, Qobustana səfər etmiş, Bibiheybət məscidində, Səngəçal terminalında olmuşlar.

AzərTAc

Azərbaycan.- 2011.- 30 iyul.- S. 2.