Milli Məclisin yaz sessiyası başa çatdı

Mayın 31-də Milli Məclisin 2011-ci ilin yaz sessiyasında sonuncu plenar iclası keçirildi. İclasda ilk olaraq "Azərbaycan Respublikasının İnzibati Xətalar Məcəlləsində dəyişiklik edilməsi haqqında" qanun layihəsi müzakirəyə çıxarıldı. Layihə ilə bağlı Milli Məclisin Hüquq siyasəti və dövlət quruculuğu komitəsinin sədri Əli Hüseynli məlumat verdi. Bildirdi ki, İnzibati Xətalar Məcəlləsinin 116.0.7-ci maddəsinə təklif olunan dəyişiklik yazılı bildiriş göndərilmədən qazın, elektrik enerjisinin və ya istilik enerjisinin verilməsinin dayandırılmasına görə müfəttişlərin məsuliyyətini nəzərdə tutur. Qanun layihəsi təsdiq olundu.

Əli Hüseynli "Yol hərəkəti haqqında" Azərbaycan Respublikasının Qanununda dəyişikliklər edilməsi barədə" qanun layihəsini müzakirəyə təqdim etdi. Bildirildi ki, dəyişikliklərdən biri şəxslərin yol hərəkəti qaydalarının pozuntusu ilə əlaqədar barələrində tətbiq edilən inzibati tənbeh haqqında qərarlarla və onların nəticələri (cərimələr və onların ödənilməsi, balların sayı və ya silinməsi) ilə bağlı rəsmi internet informasiya ehtiyatlarından məlumat almalarını təmin etməkdir. Həmçinin qanuna 85-1-ci maddənin əlavə edilməsi nəzərdə tutulur. "Yol hərəkəti qaydaları pozuntusunun aşkar edilməsi və məsuliyyətə cəlbetmə qaydası" adlanan bu maddəyə görə, inzibati cərimə növündə inzibati tənbeh tətbiq etmə haqqında qərarın qanuni qüvvəyə mindiyi gündən 30 iş günü müddətində inzibati xəta törətmiş şəxs cərimə bildirişi üzrə müvafiq məbləği banka ödəməlidir. Barəsində inzibati cərimə tənbeh növü tətbiq edilən şəxs qərarı dərhal və ya qərar qanuni qüvvəyə mindiyi gündən 3 iş günü müddətində icra edərsə, tətbiq olunan cərimənin 10 faizi miqdarında məbləğin ödənişindən azad edilir. İnzibati cərimə növündə inzibati tənbeh tətbiq etmə haqqında qərar qanuni qüvvəyə mindiyi gündən 30 iş günü müddətində cəriməni qanunla müəyyən edilmiş əsaslar olmadan ödəməyən şəxsə onun ödənilmədiyi hər növbəti gün üçün cərimə məbləğinin 2 faizi miqdarında dəbbə pulu tətbiq edilir.

Müzakirələr zamanı deputatlardan Elmira Axundova, Rafael Cəbrayılov, Xanhüseyn Kazımlı, Astan Şahverdiyev, Cavid Qurbanov, Aydın Mirzəzadə, Etibar Hüseynov, Zeynəb Xanlarova və Siyavuş Novruzov qanun layihəsini müsbət dəyərləndirdilər, nəzərdə tutulan dəyişikliklərin müasir dövrün tələblərinə cavab verdiyini, yol hərəkəti qaydalarının daha dəqiq tənzimlənməsinə xidmət etdiyini bildirdilər. Qanuna dəyişikliklərdə cərimə edilənin həvəsləndirilməsinin də nəzərdə tutulması təqdir edildi.

Bu məsələyə münasibətini bildirən Milli Məclisin Sədri Oqtay Əsədov Dövlət Yol Polisinin işində çox böyük irəliləyiş olduğunu dedi. Layihəni yüksək qiymətləndirən Oqtay Əsədov bu cür dəyişikliklərin yol polisinin fəaliyyətinin daha da yaxşılaşdırılmasına xidmət edəcəyini diqqətə çatdırdı.

Yekunda qanun layihəsi təsdiq olundu.

Gündəlikdə olan növbəti məsələ - "Azərbaycan Respublikasının İnzibati Xətalar Məcəlləsində dəyişikliklər edilməsi haqqında" qanun layihəsi ilə də bağlı Əli Hüseynli məlumat verdi. Onun sözlərinə görə, bu dəyişikliklər üzvi surətdə bundan əvvəl müzakirə olunan məsələ ilə bağlıdır. Belə ki, qanun layihəsinə əsasən İnzibati Xətalar Məcəlləsinə 159-1-ci maddənin əlavə edilməsi təklif olunur. Bu maddəyə görə, yol hərəkəti qaydaları əleyhinə olan inzibati xətaların törədilməsinə görə inzibati cərimə növündə inzibati tənbeh tətbiq etmə haqqında qərarın qanuni qüvvəyə mindiyi gündən 3 ay müddətində qanunla müəyyən edilmiş əsaslar olmadan icra edilməməsinə görə nəqliyyat vasitələrini idarə etmək hüququ 6 ay müddətinə məhdudlaşdırılır.

Qanun layihəsi təsdiq olundu.

İclasda "Azərbaycan Respublikasının Mülki-Prosessual Məcəlləsində dəyişiklik edilməsi haqqında" qanun layihəsi də müzakirə olundu. Qeyd edildi ki, bu məcəlləyə təklif olunan dəyişikliklər Azərbaycan Respublikası Ali Məhkəməsinin Plenumu tərəfindən ərizəyə baxılması ilə bağlı məsələləri özündə ehtiva edir. Deputatlar qanun layihəsinin lehinə səs verdilər.

İclasda son olaraq "Azərbaycan Respublikasının Cinayət Məcəlləsində dəyişikliklər edilməsi haqqında" və "Azərbaycan Respublikasının Cəzaların İcrası Məcəlləsində dəyişikliklər edilməsi haqqında" məsələlər müzakirəyə çıxarıldı. Qısa müzakirədən sonra hər iki qanun layihəsi təsdiqləndi.

Gündəlikdəki məsələlərin müzakirəsi yekunlaşandan sonra Milli Məclisin Sədri Oqtay Əsədov Azərbaycan Respublikası Milli Məclisinin 2011-ci il yaz sessiyasının başa çatdığını elan etdi. Azərbaycan Respublikasının Dövlət himni səsləndirildi.

Azərbaycan.- 2011.-1 iyun.- S. 1.