Fransanın nüfuzlu jurnalında Azərbaycan iqtisadiyyatından bəhs edən məqalə dərc olunmuşdur

Parisdə iqtisadiyyat məsələlərindən bəhs edən həftəlik "Yeni iqtisadçı" ("Le Nouvelle Economiste") jurnalının mayın 26-da işıq üzü görmüş son nömrəsində Azərbaycanın müstəqilliyinin bərpa edilməsinin 20 illiyinə həsr edilmiş "Avropanın sərhədində yerləşən və sürətlə inkişaf edən ölkə" sərlövhəli məqalə dərc olunmuşdur.

Ölkəmizin iqtisadi inkişafından bəhs edən 10 səhifəlik məqalədə bildirilir ki, Qərblə Şərqin və məşhur İpək yolunun üstündə, qədim ticarət yollarının kəsişməsində yerləşən Azərbaycanda təxminən bir əsr bundan əvvəl, 1918-ci ildə müsəlman Şərqində ilk demokratik respublika yaranmışdır. Bunun davamı olaraq vurğulanır ki, Azərbaycan 1991-ci ildə yenidən öz müstəqilliyini bərpa etmişdir.

Bu ölkədə hər il mayın 28-i Respublika Günü kimi qeyd olunur. Builki Respublika Gününün bayram edilməsi Azərbaycanın müstəqilliyinin bərpa edilməsinin 20 illik yubileyinə təsadüf etməsi, ölkəmizin öz zəngin mədəniyyəti və ənənələri ilə çox məşhur olması, müxtəlif sivilizasiyaların kəsişdiyi bir məkanda yerləşməsi məqalədə yer almışdır.

Daha sonra neft və qaz ehtiyatları ilə zəngin olan ölkə əhalisinin Azərbaycanın gələcək inkişafı ilə bağlı ümidlərinin ümummilli lider, təcrübəli dövlət başçısı Heydər Əliyevin doğrultduğu və respublikanın hərtərəfli inkişafının bu şəxsiyyətin adı ilə bağlı olduğu diqqətə çatdırılır.

Məqalədə vurğulanır ki, Prezident İlham Əliyevin təşəbbüsü ilə 2004-cü ildən etibarən Azərbaycan regionlarının sosial-iqtisadi inkişafı proqramları həyata keçirilir və bunun nəticəsində 930 min yeni iş yerləri yaradılmışdır, regionlarda bir sıra mühüm sosial və iqtisadi layihələr reallaşdırılır, müvafiq infrastruktur müasirləşdirilir, qeyri-neft sektoru dinamik templə inkişaf edir və müasir texnologiyalar bu sahələrə müvəffəqiyyətlə tətbiq olunur, xarici sərmayələrin cəlb edilməsi təşviq olunur.

Azərbaycan Respublikasının Prezidenti İlham Əliyevin bu ilin fevralında Fransanın nəqliyyat məsələləri üzrə dövlət katibi Tiyeri Mariyanini Bakıda qəbul edərkən söylədiyi fikirlər sitat gətirilərək qeyd edilir ki, Azərbaycan Fransa ilə nəqliyyat sahəsində, o cümlədən dəmir yolu, metro və yol nəqliyyatının inkişafı sahələrində əməkdaşlıqda maraqlıdır.

Jurnalda Azərbaycanın Fransadakı səfiri Elçin Əmirbəyovun, xarici işlər nazirinin müavini Mahmud Məmmədquliyevin, maliyyə naziri Samir Şərifovun, mədəniyyət və turizm naziri Əbülfəs Qarayevin, rabitə və informasiya texnologiyaları naziri Əli Abbasovun, Azərbaycan Respublikası Dövlət Neft Şirkətinin prezidenti Rövnəq Abdullayevin, Azərbaycanda İxracın və İnvestisiyaların Təşviqi Fondunun prezidenti Adil Məmmədovun, Azərbaycan İnvestisiya Şirkətinin icraçı direktoru Əfqan İsayevin və bir neçə özəl şirkətin nümayəndələrinin müsahibələri dərc edilmişdir.

Bu müsahibələrdə Azərbaycan ilə Fransanın enerji və qeyri-enerji sektorunda iqtisadi əməkdaşlığının inkişaf templəri haqqında, cari ilin sonunadək Azərbaycan-Fransa İkitərəfli İqtisadi Əməkdaşlıq Komissiyasının 6-cı iclasının keçirilməsinin nəzərdə tutulduğuna, bu yaxınlarda Azərbaycan-Fransa Biznes Şurasının yaradıldığına, iyunun 7-də Parisdə informasiya və kommunikasiya texnologiyaları üzrə Azərbaycan-Fransa biznes forumunun keçiriləcəyinə, Azərbaycanda bu ilin "Turizm ili" elan edildiyi nəzərə alınaraq ölkəmizdə fəaliyyət göstərən "Aleksandr Düma Qafqazda" mədəni-turizm marşrutuna diqqətin artdığına dair məlumat verilir. Fransanın iş adamları ilə birgə Azərbaycanda avtomobillərin, qatar və metro vaqonlarının istehsalı, həmçinin alternativ enerji, sənaye, informasiya və kommunikasiya texnologiyaları, turizm və digər xidmət sahələrində, habelə kənd təsərrüfatı, xüsusilə şərab istehsalı sahəsində müvafiq layihələrin həyata keçirilməsi imkanlarından bəhs edilir.

Bununla yanaşı, qeyd edilir ki, Azərbaycan və Fransa prezidentləri, nazirlər və digər yüksək vəzifəli məmurlar bugünədək müxtəlif sahələrdə əməkdaşlıq məsələlərinə dair 30-dan artıq hüquqi sənəd imzalamışlar. Bunun sayəsində də iqtisadi əməkdaşlıq üçün zəruri və zəngin hüquqi baza yaradılmışdır.

Ümumiyyətlə, məqalədə Azərbaycan və onun investisiya mühiti haqqında müsbət məlumat verilir və müstəqilliyin bərpa edilməsinin 20 illik dövrünün son 17 ilində ölkəmizin böyük iqtisadi nailiyyətlər qazandığı xüsusi vurğulanır. Bakı şəhərinin sürətli iqtisadi inkişaf dövrü yaşadığı və biznes mərkəzinə çevrildiyi bildirilir, həmçinin Azərbaycanın Avropa ilə Mərkəzi Asiya arasında körpü rolu oynadığı xatırlanır.

Xatırladaq ki, 1976-cı ildən çap olunan "Yeni iqtisadçı" jurnalı Avropanın ən məşhur həftəlik iqtisadi nəşrlərindən biridir və qitənin, xüsusilə Fransanın hökumət və biznes elitasının ən çox oxuduğu iqtisadi xəbərlər mənbəyidir. Jurnal Avropanın digər həftəlik nəşri olan "Financial Times" nəşrinin Fransada və fransızdilli ölkələrdə analoqu hesab edilir.

Əsgər ƏLİYEV,

AzərTAc-ın xüsusi müxbiri

Paris

Azərbaycan.- 2011.- 1 iyun.- S. 4.