İtaliyada buraxılmış musiqi diskində xanəndə Qoçaq Əsgərov və onun rəhbərlik etdiyi “Turan” ansamblının ifası yer almışdır

İtaliyada Azərbaycan mədəniyyətinin təbliğinə həsr edilmiş diskin işıq üzü görməsi ilə bağlı mətbuat konfransı keçirilmişdir.

AzərTAc xəbər verir ki, tədbirdə çıxış edən YUNESKO-nun qeyri-maddi mədəni irs üzrə eksperti, sənətşünas Sənubər Bağırova bildirmişdir ki, ötən il dekabrın 15-də “Azərbaycanı kəşf edək!” layihəsi çərçivəsində ölkəmizin Mədəniyyət və Turizm Nazirliyi ilə İtaliyanın “Felmay Corso Moncalieri” şirkəti arasında müqavilə imzalanmışdır. Müqavilənin müddəalarına əsasən, İtaliyada mədəniyyətimizin təbliği ilə əlaqədar “Azərbaycanın ənənəvi musiqisi” adı altında altı kompakt diskdə musiqi albomlarının hazırlanması və satışının həyata keçirilməsi planlaşdırılır.

Azərbaycanın zəngin musiqi nümunələrinin Avropada təbliğinin genişləndirilməsi məqsədi ilə layihə çərçivəsində artıq birinci – “Muğam - Azərbaycanın müqəddəs musiqisi” – diski işıq üzü görmüşdür.

Turin şəhərindəki Şərq İncəsənəti Muzeyində yeni diskin təqdimatı keçirilmişdir. Diskə geniş səs diapazonuna malik tanınmış xanəndə Qoçaq Əsgərovun ifasında “Zabul segah” dəstgahı, “Bayatı Şiraz” muğamı və təsnifi, “Mahur” muğam kompozisiyası, “Dilkeş” təsnifi və iki xalq rəqs havası daxil edilmişdir. İfalar lentə alınarkən bütün müasir muğam ansambllarının özəyini təşkil edən kamança, tar, qaval, balaban və nağara kimi milli musiqi alətlərimizdən istifadə olunmuşdur.

S.Bağırova bu ilin mayında İtaliyanın Turin şəhərindəki Şərq İncəsənəti Muzeyində “Darbar” adı altında mühazirə və konsert proqramının təşkilindən və bunların maraqla qarşılanmasından da geniş söz açmışdır.

Bildirmişdir ki, ölkəmizi belə möhtəşəm tədbirdə xanəndə Qoçaq Əsgərov və onun rəhbərliyi ilə “Turan” ansamblı çox yüksək səviyyədə təmsil etmişlər.

Tədbirdə xanəndə Qoçaq Əsgərov və “Turan” ansamblının üzvləri jurnalistləri maraqlandıran sualları cavablandırmışlar.

Azərbaycan.- 2011.- 3 iyun.- S. 7.