Qubada elmi-praktik konfrans keçirilib

Qubada İqtisadi İnkişaf Nazirliyinin və Azərbaycan Milli Elmlər Akademiyasının təşkilatçılığı ilə "Regionlarda ixracyönümlü məhsul istehsalı: mövcud potensial və perspektivlər" mövzusunda elmi-praktik konfrans keçirilmişdir. Konfransda müvafiq dövlət qurumlarının, Quba-Xaçmaz regionu üzrə yerli icra hakimiyyəti orqanlarının nümayəndələri, elmi-tədris müəssisələrinin məsul şəxsləri və sahibkarlar iştirak etmişlər.

Tədbirdə çıxış edən Quba RİH-in başçısı Rauf Həbibov son illər regionların sürətlə inkişaf etdiyini, dövlət başçısının regionların inkişafına göstərdiyi xüsusi diqqət və qayğının nəticəsində yerlərdə yeni istehsal və xidmət müəssisələrinin, müasir sosial infrastruktur obyektlərinin yaradıldığını, təzə iş yerlərinin açıldığını diqqətə çatdırmışdır. Bildirmişdir ki, həyata keçirilən məqsədyönlü tədbirlər nəticəsində sahibkarlar ölkə iqtisadiyyatının aparıcı qüvvəsinə çevrilir, regionların iqtisadi mənzərəsinin dəyişməsində, istehsal prosesinin modernləşməsində regional dövlət proqramlarının icrası mühüm əhəmiyyət daşıyır.

İqtisadi inkişaf nazirinin müavini Niyazi Səfərov da ölkədə uğurla həyata keçirilən sosial-iqtisadi siyasət nəticəsində iqtisadiyyatda davamlı inkişafın təmin olunduğunu bildirmişdir. Regionların inkişafının iqtisadi siyasətin prioritetlərindən olduğunu deyən natiq eləcə də yoxsulluğun azaldılması, ərzaq təhlükəsizliyinin təmin edilməsi və digər dövlət proqramlarının uğurlu icrasından danışmış, qeyri-neft sektorunun daha da inkişaf etdiyini, ölkə iqtisadiyyatına investisiya qoyuluşunun artdığını, sahibkarlıq fəaliyyətinin genişləndiyini vurğulamışdır. Niyazi Səfərov qeyri-neft ixracının artırılması istiqamətində kənd təsərrüfatı məhsullarının istehsalı və emalının beynəlxalq standartlar səviyyəsində təşkilinin və qabaqcıl təcrübənin tətbiq olunmasının xüsusi əhəmiyyət daşıdığını da nəzərə çatdırmışdır.

Ekologiya və təbii sərvətlər nazirinin müavini Firdovsi Əliyev, İqtisadi İnkişaf Nazirliyinin regionların inkişafı və dövlət proqramları şöbəsinin müdiri Sahib Məmmədov, sahibkarlığın inkişafı siyasəti şöbəsinin müdir müavini Hüseyn Paşayev, iqtisadi siyasət, təhlil və proqnozlaşdırma şöbəsinin müdir müavini Nizami Qasımov, Azərbaycan Sahibkarlar (İşəgötürənlər) Təşkilatları Milli Konfederasiyasının baş katibi Məmmədəli Əfəndiyev ölkə rəhbərliyi tərəfindən aparılan məqsədyönlü və düşünülmüş iqtisadi siyasət nəticəsində regionların investisiya potensialının artdığını, sahibkarlığın inkişafına kompleks dövlət dəstəyi tədbirlərinin genişləndiyini, dövlət proqramlarının uğurla icra olunduğunu, yerlərdə infrastruktur, sosial-mədəni, istehsal və emal obyektlərinin yaradıldığını, regionların inkişafında sahibkarlığın rolunun artdığını söyləmişdir. Natiqlər bildirmişlər ki, hazırda "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nın icrası uğurla davam etdirilir. Prezident regionlar kimi, Bakıətrafı qəsəbələrin inkişafına da daim diqqət göstərir. Bu sahədə işlərin kompleks şəkildə davam etdirilməsi məqsədilə dövlət başçısının 4 may 2011-ci il tarixli sərəncamı ilə "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı" təsdiq edilmişdir. Dövlət Proqramında nəzərdə tutulan tədbirlərin yüksək keyfiyyətlə, vaxtında və tam icrası işlərinin təşkili üçün İqtisadi İnkişaf Nazirliyində və Bakı Şəhər İcra Hakimiyyətində işçi qrupları və monitorinq qrupları yaradılmışdır.

İqtisadi İnkişaf Nazirliyinin xarici ticarət siyasəti və Ümumdünya Ticarət Təşkilatı şöbəsinin müdiri Bəxtiyar Alışov isə konfrans iştirakçılarına regionlarda fəaliyyət göstərən sahibkarların potensial ixrac bazarlarına çıxış imkanları, qeyri-neft məhsullarının xarici bazarlara çıxarılmasında "GSP+" proqramının əhəmiyyəti və sahibkarların maarifləndirilməsi istiqamətində görülən işlər barədə məlumat vermişdir.

Akademik Əli Nuriyev, Azərbaycan Milli Elmlər Akademiyasının birinci vitse-prezidenti Arif Həşimov, AMEA-nın İqtisadiyyat İnstitutunun direktoru İsa Alıyev və İqtisadi İnkişaf Nazirliyinin İqtisadi İslahatlar Elmi-Tədqiqat İnstitutunun direktoru Vilayət Vəliyev elmi-tədqiqatların nəticələrindən istifadə etməklə innovasiyalı sahibkarlığın inkişafı və Quba-Xaçmaz iqtisadi rayonunun potensialı barədə məlumat vermiş, ölkənin təbii və əmək potensialından səmərəli istifadə etməklə qeyri-neft sektorunun sürətli inkişafının təmin edilməsi üçün elmi araşdırmaların zəruriliyini vurğulamışlar. Çıxış edənlər bildirmişlər ki, aparılan tədqiqatların praktiki əhəmiyyətinin artırılması üçün elmi-tədqiqat və layihə institutları ilə təsərrüfat subyektləri arasında əlaqələrin daha sıx qurulmasının təmin edilməsi xüsusi önəm kəsb edir.

Konfransda İqtisadi İslahatlar Elmi-Tədqiqat İnstitutunun baş elmi işçisi Həzi Eynalov "Ekoloji təmiz kənd təsərrüfatı, əsas prinsipləri və ixracyönümlülüyü" mövzusunda təqdimatla çıxış etmişdir.

Sonda tədbirdə səsləndirilən təkliflərlə bağlı müzakirələr aparılmış, iştirakçıların sualları cavablandırılmışdır.

Azərbaycan.- 2011.- 7 iyun.- S.10.