R.Morninqstar: "ABŞ-Azərbaycan münasibətləri bütün sahələrdə, o cümlədən enerji əməkdaşlığı sahəsində sürətlə irəliləyir"

İyunun 7-də Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayev Bakıda keçirilən XVIII Beynəlxalq Xəzər neft, qaz, neft emalı, neft kimyası sərgi və konfransında iştirak etmək üçün Azərbaycana gəlmiş ABŞ-ın Avrasiya enerji məsələləri üzrə xüsusi nümayəndəsi Riçard Morninqstarın başçılıq etdiyi heyətlə görüşmüşdür.

Şirkətin mətbuat xidmətindən AzərTAc-a bildirmişlər ki, görüş Bakı Sərgi Mərkəzində ARDNŞ-in pavilyonunda keçirilmişdir. R.Abdullayev Azərbaycanla ABŞ arasında enerji sahəsində qurulan sıx əməkdaşlıq münasibətlərindən söz açmışdır. Amerika neft-qaz şirkətlərinin Azərbaycan enerji sektorunun inkişafına töhfə verdiyini xatırladan R.Abdullayev "Əsrin müqaviləsi"nin uğurla həyata keçirilməsində qarşılıqlı faydalı tərəfdaşlığın mühüm rol oynadığını qeyd etmişdir. O, Azərbaycan neft-qaz sənayesinin son illərdə əldə etdiyi nailiyyətlərdən bəhs edərək, neft və qaz hasilatında qazanılmış yüksək göstəricilər nəticəsində ölkəmizin Avropa enerji təhlükəsizliyinin təmin edilməsində əhəmiyyətinin getdikcə artmasını vurğulamışdır.

Sərginin yüksək səviyyədə təşkil edilməsindən məmnun qaldığını deyən R.Morninqstar Azərbaycanın öz enerji resurslarından səmərəli istifadə etməsi nəticəsində sürətlə inkişaf etdiyini, artıq 18 ildir ki, ənənəvi olaraq keçirilən neft-qaz sərgisinə böyük marağın məhz bu inkişafın və Azərbaycana beynəlxalq miqyasda artan diqqətin təzahürü olduğunu bildirmişdir. ABŞ-Azərbaycan münasibətlərinin bütün sahələrdə, o cümlədən enerji əməkdaşlığı sahəsində sürətlə irəlilədiyini deyən R.Morninqstar bu münasibətlərin keyfiyyətcə yeni səviyyəyə qədəm qoyması üçün bundan sonra da səylərini əsirgəməyəcəyini bildirmişdir.

Tərəfləri maraqlandıran digər məsələlər ətrafında fikir mübadiləsinin aparıldığı görüşdə ABŞ-ın ölkəmizdəki səfiri Mətyu Brayzə də iştirak etmişdir.

Azərbaycan.- 2011.-8 iyun.- S. 4.