Rayonumuzun tarixini özündə yaşadan qəzet

"Hacıqabul" qəzetinin yaranmasından 20 il keçir. Əslində, qəzetin tarixi belə qısa deyil. Təəssüf ki, Hacıqabul rayonunda bu haqda ətraflı məlumat yox dərəcəsindədir. Aparılan araşdırmalardan isə məlum olmuşdur ki, qəzet Qazıməmməd rayonu yarandığı vaxtdan nəşr olunmağa başlamışdır. O, əvvəllər "Qazıməmməd bolşeviki", sonralar "Kommunizm yolu" adlanmışdır.

"Qazıməmməd bolşeviki" 1940-cı ildən nəşr olunub. İki səhifəlik qəzetdə rəsmi materiallar, müxbir məktubları, tənqidi mövzular dərc edilirdi. 1941-ci ildə qəzetin 84 nömrəsi çıxmışdır. Müharibə dövründə isə qəzetin nəşri dayandırılmışdır.

Amma 1946-cı ildə "Qazıməmməd bolşeviki" Cavanşir Bağırovun məsul redaktorluğu ilə yenidən işıq üzü gördü. Həmin il qəzetin 14, 1947-ci ildə 28, 1948-ci ildə 20, 1949-cu ildə 27, 1950-ci ildə 32, 1951-ci ildə 35, 1952-ci ildə 60 nömrəsi çap olunmuşdur. 1952-ci ildə "Qazıməmməd bolşeviki"nin redaktoru M.Cəbrayılov, yazarları isə H.İsayev, Ə.Cəbrayılov və başqaları idi.

1953-cü ildən 1959-cu ilədək, yəni Qazıməmməd rayonu ləğv edilənə qədər "Kommunizm yolu" başlığı ilə çıxan qəzet 1991-ci ildə Hacıqabul rayonunun yaradılmasından sonra yenidən "Hacıqabul" adı altında nəşrini bərpa etdi.

Bu gün "Hacıqabul" redaksiya ilə oxucular arasında körpü yaratmağa nail olub, ziyalıların, rayon ictimaiyyətinin rəğbətini qazanıb. Qəzet öz səhifələrində istər rayon mərkəzində, istərsə də kəndlərdə baş verən yenilikləri, eləcə də mövcud problemləri işıqlandırır. "Hacıqabul" əvvəllər öz oxucuları ilə həftədə bir dəfə, indi isə ayda iki dəfə görüşə gəlir. Redaksiyamız yeni bina və inventarla təmin olunub. Bu işdə bizə rayon rəhbərliyi ilə yanaşı, Prezidentin yanında Kütləvi İnformasiya Vasitələrinə Dəstək Fondu maddi kömək edir. Kollektivimiz də bu qayğıya yüksək yaradıcılıqla cavab verməyə çalışır.

Məlahət ƏSGƏRQIZI,

"Hacıqabul" qəzetinin baş redaktoru

Azərbaycan.- 2011.- 12 iyun.- S. 7.