Hərbi qulluqçuların sosial müdafiəsi Ali Baş Komandanın daim diqqət mərkəzindədir

Hərbçilərin sosial müdafiəsi dövlət rəhbərliyinin daim diqqət mərkəzində olan əsas məsələlərdəndir. Azərbaycan Prezidenti İlham Əliyevin 24 iyun 2004-cü il tarixli sərəncamı ilə Azərbaycan Respublikası Müdafiə Nazirliyinin hərbi qulluqçularının və mülki işçilərinin sosial müdafiəsini gücləndirmək məqsədilə onların aylıq vəzifə maaşları 2004-cü il iyulun 1-dən orta hesabla 1,5 dəfə artırılmışdır. Yeri gəlmişkən, 2004-cü ildə müdafiə xərclərinə ümumi daxili məhsulun 2,3 faizi ayrılsa da, sonrakı illərdə bu rəqəm mütəmadi olaraq ilbəil artırıldı, təkcə hərbi qulluqçulara deyil, həm də hərbi xidmətlə bağlı digər şəxslərə də bir sıra imtiyaz və güzəştlər tətbiq edildi. Belə ki, dövlət başçısının imzaladığı digər sərəncamlarla Azərbaycanın milli qəhrəmanlarının, o cümlədən 20 Yanvar şəhidlərinin ailələrinin sosial müdafiəsi gücləndirildi.

Prezidentin "Azərbaycan Respublikasının Müdafiə Nazirliyinin hərbi qulluqçularının sosial müdafiəsinin gücləndirilməsi haqqında" 23 yanvar 2006-cı il tarixli sərəncamı hərbi peşə sahiblərinə dövlət qayğısının ən bariz təzahürlərindəndir. Bu sərəncamla Müdafiə Nazirliyi hərbi qulluqçularının rütbə maaşları 2006-cı il yanvar ayının 1-dən iki dəfə artırıldı. Eyni zamanda, hərbi qulluqçuların vəzifə maaşlarının, dövlət icbari şəxsi sığorta məbləğlərinin artırılmasına, onların güzəştli ipoteka kreditləri ilə təmin olunmasına dair təkliflərin hazırlanması üçün Nazirlər Kabinetinə tapşırıqlar verildi. Bundan bir il sonra ölkə başçısı hərbi qulluqçulara güzəştli ipoteka kreditlərinin verilməsi qaydaları haqqında fərman imzaladı. Bu fərmana görə, hərbçilərə verilən ipoteka kreditlərinin illik faizi 4 faizdən yuxarı olmamalıdır. Silahlı Qüvvələrdə üç ildən az olmayaraq xidmət edən hərbi qulluqçular üçün maksimal müddət isə 30 il müəyyənləşdirildi. Bu isə hərbi qulluqçuların yalnız özlərinin deyil, həm də onların ailə üzvlərinin sosial müdafiəsinin gücləndirilməsi, maddi rifahının yaxşılaşdırılması istiqamətində həyata keçirilən mühüm tədbirlərə rəvac verdi. Azərbaycan Prezidentinin təşəbbüsü ilə 2006-cı ilin iyul ayında respublikamızın hərbi qanunvericilik aktlarına əlavələr və dəyişikliklər edildi. Bu əlavələr hərbi qulluqçulara hər il növbəti məzuniyyətə çıxarkən əlavə olaraq bir aylıq vəzifə maaşı məbləğində pul təminatının verilməsini, müvəqqəti mənzil kirayəsi üçün ödənilən kompensasiyanın hərbi qulluqçular üçün hər ay konkret məbləğdə müəyyənləşdirilməsini, onların hər bir ailə üzvü üçün isə həmin məbləğin 50 faizinin müəyyən edilməsini nəzərdə tutur. Bundan başqa, müvafiq sənədlərdə xidməti mənzillərin tikintisinin dövlət büdcəsindən ayrılan vəsait hesabına həyata keçirilməsi də öz əksini tapıb. Son bir neçə il ərzində hərbi təhsil ocaqlarında təhsil alan kursantların pul təminatı yaxşılaşdırılmışdır. 2008-ci ildə isə hərbçilərə ərzaq əvəzinə ödənilən kompensasiyaların məbləği ölkə başçısının müvafiq sərəncamı ilə iki dəfə artırılmışdır.

Dövlətin ordu quruculuğu sahəsində apardığı ardıcıl və məqsədyönlü siyasət Azərbaycan Silahlı Qüvvələrini qısa zaman kəsiyində Cənubi Qafqazın yüksək döyüş hazırlığına malik, ən mobil və intizamlı silahlı qurumuna çevirmişdir. Dövlət büdcəsinin ordu quruculuğu ilə bağlı kifayət qədər ciddi statistikası müvafiq sahəyə ayrılan xərclərin ildən-ilə artırılması ilə müşayiət olunur. Təkcə onu demək kifayətdir ki, son 7 il ərzində bu xərclər 14 dəfəyədək artırılmışdır. 18 iyun 2010-cu il tarixdə Milli Məclisin növbədənkənar sessiyasında müdafiə və təhlükəsizlik xərclərinin daha 400 milyon manat artırılması isə cari ilin bütün hərbi xərclərinin 2 milyard 150 milyon dollaradək yüksəlməsi demək idi ki, bu da işğalçı Ermənistanın bütün dövlət büdcəsindən çoxdur.

2010-cu il sentyabrın 20-də ölkə başçısının imzaladığı növbəti sərəncama əsasən, Azərbaycan Respublikasının Müdafiə Nazirliyi, o cümlədən digər güc strukturlarının dövlət büdcəsindən maliyyələşdirilən qurumlarında çalışan hərbi qulluqçuların, xüsusi rütbəsi olan əməkdaşların və dövlət qulluqçusu olmayan mülki işçilərin sosial müdafiəsinin gücləndirilməsi məqsədilə onların aylıq vəzifə maaşları sentyabrın 1-dən orta hesabla 10 faiz artırılmışdır.

2010-cu il iyunun 23-də "Azərbaycan Respublikası Müdafiə Nazirliyinin həqiqi hərbi xidmət hərbi qulluqçularının sosial müdafiəsinin gücləndirilməsi barədə" Azərbaycan Respublikasının Prezidenti İlham Əliyevin imzaladığı sərəncama əsasən, xidməti mənzilə və mənzil şəraitinin yaxşılaşdırılmasına ehtiyacı olan hərbi qulluqçular üçün xidməti yaşayış evlərinin tikilməsinə 5 milyon manat əlavə vəsait ayrılmışdır. Hazırda Azərbaycan Prezidentinin göstərişi ilə müxtəlif hərbi qarnizonlarda sosial, mədəni və məişət obyektləri ilə birlikdə 5 hərbi şəhərcik kompleksi inşa edilir. Hərbi qulluqçular üçün ümumilikdə 627 mənzilli yaşayış binaları yaxın vaxtlarda təhvil veriləcəkdir.

Bu gün Silahlı Qüvvələrimizdə intensiv quruculuq işləri uğurla həyata keçirilir. Gəncə şəhərindəki hərbi şəhərcikdə 690 və 300 yerlik müasir tələblərə cavab verən 3 mərtəbəli əsgər yataqxanaları şəxsi heyətin istifadəsinə verilməsi üçün tam hazırlanmışdır. 300 yerlik 3 mərtəbəli əsgər yataqxanası binasında müasir tipli mebel inventarları quraşdırılmışdır. 3 mərtəbəli 690 yerlik əsgər yataqxanası binasında isə mebellərin quraşdırılması işləri aparılır.

Şəxsi heyətin yüksək keyfiyyətli qidalanmasının təmin olunması məqsədi ilə bir sıra hərbi hissələrdə müasir tələblərə cavab verən əsgər yeməkxanaları tikilmişdir. Yeməkxanalarda yüksək keyfiyyətli qida hazırlanması üçün müasir avadanlıqlar quraşdırılmışdır. Həmçinin yeməkxana binasının zirzəmisində quraşdırılan çörəkbişirmə sexi şəxsi heyətin və yaxınlıqda yerləşən digər hərbi hissələrin çörək təminatını tam ödəmək qabiliyyətindədir. Zirzəminin qalan hissəsində ərzaq və əşya anbarları hazırlanmışdır.

Gəncədəki digər hərbi şəhərcikdə qarnizon hospitalının bəzi bölmələrinin yerləşdirilməsi üçün yoluxucu xəstəliklər, müalicə korpusu, qərargah, mətbəx-yeməkxana, camaşırxana, transformator yarımstansiyası binaları əsaslı təmir olunaraq istifadəyə verilmişdir. Həmin ərazidə artezian quyusu qazılmışdır ki, bu da bina və qurğuları fasiləsiz su ilə təmin edəcəkdir. Hal-hazırda həmin bina və qurğular mebel avadanlıqları ilə təchiz olunur və Novruz bayramı ərəfəsində hospitalın şəxsi heyətinin həmin binalarda yerləşdirilməsi planlaşdırılır.

Gəncə qarnizonunda xidmət edən zabit və gizir heyətinin məişət şəraitinin yaxşılaşdırılması məqsədi ilə Gəncə və Şəmkir şəhərlərinin hər birində 1 ədəd 50 mənzilli yaşayış binaları tikilir və bu ilin sonunadək həmin binalar zabit və gizir heyətinin ailələrinin istifadəsinə veriləcəkdir. Bu binalar avtonom istilik, isti su və su ilə təchiz olunur. Hər bir mənzilin sahəsi 100 kvadratmetrdən az deyil. İşlərin davamı olaraq, bu il ərzində Gəncə və Şəmkir şəhərlərinin hər birində 1 ədəd yeni 5 mərtəbəli 50 mənzilli yaşayış binasının tikintisinə başlanması planlaşdırılır.

Qusar rayonu ərazisindəki hərbi şəhərcikdə də 690 yerlik iki və 300 yerlik bir əsgər yataqxanası tikilərək istifadəyə verilməsi üçün hazırlıq işləri aparılır. Hərbi şəhərciyin binalarının istilik və isti su ilə təmin olunması üçün qazanxana, camaşırxana və hamam kompleks binası tikilərək istifadəyə verilmişdir. Qazanxana vasitəsilə bina və qurğular fasiləsiz isti su və istiliklə təmin olunur. Camaşırxana binasında Türkiyə istehsalı olan iki 100 kq-lıq və bir 80 kq-lıq yuma-sıxma, qurutma maşınları quraşdırılmışdır. Şəxsi heyətin təmizliyinin təmin olunması üçün isə hamam istifadəyə verilmişdir.

Qusar qarnizonunda xidmət edən zabit və gizir heyətinin məişət şəraitinin yaxşılaşdırılması məqsədi ilə 1 ədəd 75 mənzilli yaşayış binası tikilib zabit və gizir heyəti ailələrinin istifadəsinə verilməsi üçün tam hazırlanmışdır. Həmin binanın avtonom istilik, isti su və su ilə təchiz olunması üçün qazanxana, transformator yarımstansiyası, binanın su təminatı üçün 250 kubmetrlik 2 su anbarı (nasosxana qurğusu ilə) inşa olunmuşdur.

Kürdəmirdəki hərbi şəhərcikdə də quruculuq işləri uğurla həyata keçirilir. Bu ərazidə müasir tələblərə cavab verən 2 ədəd 3 mərtəbəli əsgər yataqxanası, 3 mərtəbəli qərargah, 2 mərtəbəli tibb məntəqəsi tikilərək hərbi hissənin şəxsi heyətinin istifadəsinə verilməsi üçün hazırlanmışdır.

Burada şəxsi heyətin yüksək keyfiyyətli qidalanmasının təmin olunması məqsədi ilə müasir tələblərə cavab verən 1300 yerlik yeməkxana binası tikilmişdir. Binada yüksək keyfiyyətli qida hazırlanması üçün müasir tipli Avropa istehsalı olan avadanlıqlar quraşdırılmışdır. Həmçinin yeməkxana binasının zirzəmisində çörəkbişirmə sexi fəaliyyət göstərir.

Göytəpə qəsəbəsindəki hərbi hissələrin ərazisində də quruculuq işləri davam etdirilir. Burada 1 ədəd 3 mərtəbəli müasir tələblərə cavab verən əsgər yataqxanası istifadəyə verilmiş, 1 ədəd 3 mərtəbəli əsgər yataqxanasında isə son tamamlama işləri aparılır və əlavə olaraq 1 ədəd 3 mərtəbəli əsgər yataqxanası binasında tikinti işləri yerinə yetirilir. Həmçinin 2500 yerlik əsgər yeməkxanası inşa olunur.

Göytəpə qarnizonunda xidmət edən zabit və gizir heyətinin məişət şəraitinin yaxşılaşdırılması məqsədilə 1 ədəd 50 mənzilli yeni yaşayış binası tikilib, zabit və gizir heyətinin ailələrinin istifadəsinə verilməsi üçün hazırlanmışdır.

Bakı şəhərində Mərkəzi Hərbi Klinik Hospitalın ərazisində də son illər ərzində böyük quruculuq işləri aparılmış və hal-hazırda bu iş sürətlə davam etdirilir. Belə ki, hospitalın ərazisində 8 mərtəbəli 300 çarpayılıq cərrahiyyə korpusu inşa olunaraq istismara verilmişdir. Həmin binada Avropada istehsal olunan yüksək keyfiyyətli tibb avadanlıqları quraşdırılıb. Burada 4 mərtəbəli inzibati bina, 2 mərtəbəli klub-yeməkxana, 3 mərtəbəli cərrahiyyə şöbəsinin binası əsaslı təmir olunaraq istismara verilmişdir. Hal-hazırda 8 mərtəbəli müalicə korpusu binası inşa olunub, mühəndis-kommunikasiya xətlərinin quraşdırılması işləri aparılır. Ərazidaxili mühəndis - kommunikasiya xətləri yenidən qurulur və ərazinin tam abadlaşdırılması işləri yerinə yetirilmək üzrədir.

Heydər Əliyev adına Ali Hərbi Məktəbin ərazisində isə müdavimlər üçün 1 ədəd 5 mərtəbəli yataq korpusunun əsaslı təmiri başa çatdırılmış və istifadəyə təhvil verilmişdir. Hal-hazırda 1 ədəd 4 mərtəbəli və 1 ədəd 5 mərtəbəli tədris korpusu binalarının əsaslı təmir işləri yekunlaşmaq üzrədir.

Yuxarıda qeyd olunanlar görülən ümumi işlərin yalnız bir hissəsidir. Bu gün Silahlı Qüvvələrimizin bütün sahələrində əsaslı quruculuq tədbirləri həyata keçirilir. Azərbaycan dövlətinin bu muhum və vacib sahəyə göstərdiyi diqqət və qayğı müvafiq istiqamətdə daha böyük uğurların əldə olunacağına əsaslı zəmin yaradır.

İbrahim RÜSTƏMOV,

əməkdar jurnalist

Azərbaycan.- 2011.-2 mart.- S.10.