Azərbaycan-Tatarıstan əlaqələri uğurla inkişaf edir

Martın 2-də Milli Məclisin Sədri Oqtay Əsədov ölkəmizdə səfərdə olan Rusiya Federasiyası Tatarıstan Respublikasının Prezidenti Rüstəm Minnixanov ilə görüşmüşdür.

Qonağı parlamentdə salamlayan spiker Oqtay Əsədov Azərbaycan və Tatarıstan arasında əlaqələrin tarixi köklərinin olduğunu bildirdi. Bu səfər ölkələrimiz arasında əməkdaşlığın daha da genişlənməsinə öz töhfəsini verəcəkdir. Əlaqələrin intensivləşməsində hökumətlərarası komissiyanın böyük rol oynayacağını bildirən parlamentin sədri əlavə etdi ki, iki ölkə arasında iqtisadi sahədə əməkdaşlığın dərinləşdirilməsi üçün böyük potensial var.

Azərbaycan və Tatarıstan arasında mədəni sahədə əməkdaşlığın da inkişaf etdiyini deyən parlamentin sədri Rusiyada keçirilən Azərbaycan mədəniyyət günlərini xatırlatdı. Bildirdi ki, tədbirin ikinci gününün Kazan şəhərində keçirilməsi buna əyani misal ola bilər.

Parlamentlərarası əməkdaşlığa gəlincə, spiker Oqtay Əsədov iki ölkənin parlamentarilərinin qarşılıqlı səfərlərinin təşkil edilməsini vacib saydı.

Tatarıstan Respublikasının Prezidenti Rüstəm Minnixanov Azərbaycana səfərindən məmnun qaldığını bildirdi. Azərbaycanın son illərdə sosial-iqtisadi sahədə əldə etdiyi uğurları təqdir edən Tatarıstan Prezidenti səfəri zamanı ölkəmizdə aparılan böyük tikinti-quruculuq işlərinin bir daha şahidi olduğunu bilirdi. Tatarıstan Prezidenti iqtisadi sahədə mövcud olan potensialdan daha geniş istifadə olunmasını zəruri saydı.

Sonda tərəflər qarşılıqlı maraq doğuran digər məsələlər ətrafında da fikir mübadiləsi apardılar.

Azərbaycan.- 2011.-3 mart.- S. 1.