Azərbaycan və Sloveniya arasında müdafiə sahəsində əməkdaşlıq haqqında saziş imzalanmışdır

Ölkəmizdə rəsmi səfərdə olan Sloveniya Respublikasının müdafiə naziri xanım Lyubitsa Yelusiçin martın 2-də Azərbaycanın müdafiə naziri, general-polkovnik Səfər Əbiyevlə görüşmüşdür.

Sloveniyalı qonağın Müdafiə Nazirliyində təntənəli qarşılanma mərasimi keçirilmiş, hər iki ölkənin dövlət himnləri səsləndirilmişdir.

Müdafiə Nazirliyinin mətbuat xidmətindən AzərTAc-a bildirmişlər ki, görüş zamanı sloveniyalı həmkarı ilə hərbi əməkdaşlıq məsələləri barədə ətraflı fikir mübadiləsi aparan müdafiə naziri Səfər Əbiyev bölgədə mövcud hərbi-siyasi vəziyyəti və Ermənistan-Azərbaycan, Dağlıq Qarabağ münaqişəsinin yaratdığı problemləri onun diqqətinə çatdırmışdır. Nazir qeyd etmişdir ki, münaqişənin dinc şəkildə həll olunmasına maneçilik törədən işğalçı Ermənistan öz təcavüzkar siyasətindən əl çəkmək istəmir. Nazir demişdir ki, bu zaman ərazilərini azad etmək üçün Azərbaycanın öz suveren hüquqlarından istifadə etməsi qaçılmaz olacaqdır. Bu da bütövlükdə regionda daha gərgin vəziyyətin yaranmasına rəvac verəcəkdir.

Görüş zamanı nazirlər digər mühüm məsələlər barədə də fikirlərini bölüşmüşlər.

Səfər zamanı “Azərbaycan Respublikasının Müdafiə Nazirliyi və Sloveniya Respublikasının Müdafiə Nazirliyi arasında müdafiə sahəsində əməkdaşlıq haqqında saziş” imzalanmışdır.

Azərbaycan.- 2011.-3 mart.- S. 3.