Azərbaycan Beynəlxalq Bankının Almaniya nümayəndəliyi Beynəlxalq iqtisadi forumda iştirak etmişdir

Bu yaxınlarda Polşanın Torun şəhərində İnteqrasiya və Əməkdaşlıq Birliyinin və Polşa Milli Təsərrüfat Bankının (MTB) təşkilatçılığı ilə Beynəlxalq iqtisadi forum keçirilmişdir. Forumun məqsədi Polşa şirkətləri, potensial idxalçı və ixracçılar arasında iqtisadi münasibətlərin inkişafına dəstək göstərməkdir.

Forum çərçivəsində Qafqaza dair diskussiya aparılmışdır. Müzakirələrdə Azərbaycan Beynəlxalq Bankı Almaniya nümayəndəliyinin başçısı Zaur Mahmudov çıxış etmişdir. O, forum iştirakçılarına Azərbaycanın iqtisadi inkişafından söz açmış, bank sektorunun inkişafı prosesləri və dinamikası, o cümlədən ABB-nin fəaliyyətini təhlil etmişdir. Polşa tərəfi regionumuza, xüsusən, Polşa məhsullarının Azərbaycana ixracı imkanlarına böyük maraq göstərmişdir.

Bankın nümayəndəsi Polşa İxrac Agentliyinin sığortası ilə bu ölkənin məhsullarının Azərbaycana ixracının maliyyələşdirilməsi sahəsində ABB-nin imkanları barədə məlumat vermişdir.

Azərbaycan.- 2011.-3 mart.- S. 6.