Aztəminatlı ailələr üçün "Özünədəstək" - ünvanlı sosial yardım layihəsinin tətbiqinə başlanılmışdır

Aztəminatlı ailələri yoxsulluq vəziyyətindən çıxarmaq üçün "Özünədəstək" - ünvanlı sosial yardım layihəsinə start verilmişdir.

Əmək və Əhalinin Sosial Müdafiəsi Nazirliyindən (ƏƏSMN) AzərTAc-a bildirmişlər ki, Azərbaycan Prezidentinin sərhədyanı bölgələrin əhalisinə göstərdiyi diqqət və qayğıya uyğun olaraq, layihənin ilkin mərhələdə Tovuz rayonunun Ermənistanla sərhəddə yerləşən Vahidli kəndində sınaqdan keçirilməsi qərara alınmışdır.

Martın 2-də nazirliyin yoxsulluq problemləri və ünvanlı yardım siyasəti şöbəsinin müdiri Natiq Qasımov və Tovuz Rayon Əhalinin Sosial Müdafiəsi Mərkəzinin məsul şəxsləri həmin kəndin əhalisi ilə görüşmüş, yeni layihənin mahiyyət və məqsədləri barədə məlumat vermişlər. Qeyd olunmuşdur ki, Vahidli kəndində ünvanlı yardım təyin olunan 52 ailədən 15-nin "Özünədəstək" layihəsinə cəlb edilməsi qərara alınmışdır. Layihəyə cəlb olunacaq ailələrin ünvanlı yardım almaq hüququnun olması, tərkibində uşaqlar və həmçinin əmək qabiliyyətli üzvünün olması, mal-qara saxlamaq üçün tövləsinin, yaxud əkib-becərmək üçün torpaq sahəsinin mövcudluğu və s. vacib şərtlərdəndir. Eyni zamanda, onlar veriləcək vəsaitlə ailə təsərrüfatlarında hansı işlərin görüləcəyi ilə bağlı ailə planı təqdim etməlidirlər.

Bildirilmişdir ki, belə ailələrin seçilməsində şəffaflığın və ədalətliliyin təminatı üçün həmin ailələr kənd icra və bələdiyyənin nümayəndələrindən, yerli ağsaqqallardan, seçiləcək fəaliyyət növü üzrə mütəxəssislərdən ibarət şura tərəfindən müəyyən ediləcək və əhalinin sosial müdafiəsi mərkəzi, QHT-lər, KİV-lər, həmkarlar ittifaqı və digər təşkilatların nümayəndələri bu qurumun işində müşahidəçi qismində iştirak edə biləcəklər.

Layihədə ünvanlı yardım təyin olunan ailəyə alınacaq mal və ya materialların qiymətindən asılı olaraq, ona həmin ünvanlı yardımın bir illik, yaxud altı aylıq ümumi məbləğinin əvvəlcədən birdəfəlik formada ödənilməsi nəzərdə tutulur. Həmin vəsaitlə ailəyə mal və materialların alınması şuranın iştirakı ilə həyata keçiriləcəkdir. Cari ildə Masallı, İsmayıllı və Quba rayonlarında da bu istiqamətdə pilot işləri aparılacaq və gələn ildən layihə ölkənin bütün rayonlarını əhatə edəcəkdir.

Azərbaycan.- 2011.- 4 mart.- S. 3.