Parisdə bu ilin aprelində Bakıda keçiriləcək Ümumdünya Mədəniyyətlərarası Dialoq Forumuna hazırlıq üzrə İşçi Qrupunun yekun iclası olmuşdur

Xəbər verdiyimiz kimi, Azərbaycan hökumətinin təşəbbüsü ilə bu il aprelin 7-dən 9-dək Bakıda miqyasının genişliyinə, iştirakçıların tərkibinə, tərəfdaş qismində cəlb olunan beynəlxalq qurumların sayına və formatına görə ilk dünya səviyyəli mədəniyyət tədbiri - Ümumdünya Mədəniyyətlərarası Dialoq Forumu keçiriləcəkdir.

Mədəniyyət və Turizm Nazirliyinin mətbuat xidmətindən Bakı Forumunun sənədlərinin müzakirəsi, iştirakçıların tərkibinin dəqiqləşdirilməsi, proqramın və sessiyaların mövzularının hazırlanması və digər məsələlər barədə müzakirələrin aparılması məqsədi ilə YUNESKO, Avropa Şurası (AŞ), BMT-nin Sivilizasiyalar Alyansı, AŞ-nin Şimal-Cənub Mərkəzinin ümumi razılığı ilə fevralın 27-28-də Parisdə Forumun İşçi Qrupunun yekun iclası olmuşdur.

YUNESKO-nun qərargahında keçirilmiş iclasda Azərbaycan tərəfdən mədəniyyət və turizm nazirinin müavini Sevda Məmmədəliyeva, Ümumdünya Mədəniyyətlərarası Dialoq Forumunun koordinatoru, nazirliyin beynəlxalq əlaqələr şöbəsinin sektor müdiri Vasif Eyvazzadə, Azərbaycan Respublikasının YUNESKO yanında daimi nümayəndəsi Eleonora Hüseynova, Azərbaycanın Avropa Şurası yanında daimi nümayəndəsi Arif Məmmədov, ölkəmizin Fransadakı səfirliyinin müşaviri Zaur Əhmədov və digər əməkdaşları iştirak etmişlər.

İclasın iştirakçıları arasında, həmçinin nüfuzlu beynəlxalq təşkilatların yüksək vəzifəli nümayəndələri, o cümlədən YUNESKO-nun sektor müdiri Katerina Stenu, Avropa Şurasının mədəniyyət, mədəni və təbii irs üzrə direktoru Robert Palmer, BMT-nin Sivilizasiyalar Alyansının müşaviri Jan-Kristov Bas, AŞ-nin Şimal-Cənub Mərkəzinin direktoru Denis Huber və ekspert Robin Vilson və digər rəsmi şəxslər də olmuşlar.

İclas zamanı Bakı Forumunun proqramının təfərrüatlı tərtibatı, moderator, məruzəçi və panelistlərin müəyyən edilməsi, hər bir beynəlxalq təşkilatın, eləcə də Ümumdünya Mədəniyyətlərarası Dialoq Forumuna ev sahibliyi edəcək Azərbaycan tərəfinin məsul olduğu sessiyaların düzgün şəkildə təşkili, yeni layihə və təşəbbüslərin təqdimatı üçün bağlanışdan əvvəl mərasimin təşkili və s. məsələlər əsas müzakirə mövzuları olmuşdur. Görüşdə, həmçinin Bakı Forumunun veb saytı iştirakçılara təqdim edilmişdir.

İşçi Qrupunun yekun iclasında mədəniyyət və turizm nazirinin müavini Sevda Məmmədəliyeva iştirakçılara Azərbaycan tərəfindən forumun təşkili üçün görülən işlər, ölkəmizin mədəniyyətlərarası dialoqun inkişafı üçün göstərdiyi səylər, həyata keçirdiyi tədbirlər barədə ətraflı məlumat vermişdir.

İclasda yuxarıda adları çəkilən beynəlxalq təşkilatların nümayəndələri forumun təşkili istiqamətində Azərbaycan hökumətinin səylərini yüksək qiymətləndirdiklərini və Bakıda keçiriləcək ilk dünya səviyyəli mədəniyyət tədbirinin uğurlu alınması üçün lazımi dəstəyi göstərəcəklərini bildirmişlər.

Aparılmış müzakirələr nəticəsində proqramın layihəsi müəyyən düzəlişlərlə tərtib olunmuş və panelistlər coğrafi və dini baxımdan balanslaşdırılmış qaydada müəyyən edilmişlər.

Bakı Forumunda 20-dən çox ölkənin nazirlərinin iştirak edəcəkləri nəzərə alınaraq hər bir sessiyada 3-4 nazirin çıxış etməsi üçün şəraitin yaradılması qərara alınmışdır. Həmçinin bütün çıxışlar üçün 3 dəqiqə vaxt məhdudiyyətinin qoyulması təklif olunmuşdur. Eyni zamanda, hər bir sessiyanın sədri, panelistləri və məruzəçiləri müəyyən edilmiş, hər bir sessiya üzrə müzakirə mövzularını əks etdirən bir səhifə həcmində arayışın hazırlanması razılaşdırılmışdır.

AzərTAc

Azərbaycan.- 2011.-4 mart.- S.3.