Özbəkistan Prezidenti 2011-2015-ci illər üçün Özbəkistan və Azərbaycan hökumətləri arasında iqtisadi əməkdaşlığa dair Sazişi təsdiq etmişdir

AzərTAc Daşkənddə yayımlanan "gazeta.uz" saytına istinadla xəbər verir ki, Özbəkistan Prezidenti İslam Kərimov "2011-2015-ci illər üçün Özbəkistan Respublikası hökuməti və Azərbaycan Respublikası hökuməti arasında iqtisadi əməkdaşlıq haqqında Saziş"in təsdiq edilməsi barədə fərman imzalamışdır.

Dövlət başçısının digər fərmanı ilə "18 iyun 1997-ci ildə imzalanmış "Özbəkistan Respublikası hökuməti və Azərbaycan Respublikası hökuməti arasında Özbəkistan Respublikası və Azərbaycan Respublikası vətəndaşlarının vizasız gəliş-gedişi haqqında Saziş"ə dəyişikliklər və əlavələr edilməsi haqqında Protokol" təsdiqlənmişdir.

Hər iki sənəd 2010-cu il sentyabrın 27-də Azərbaycan Prezidenti İlham Əliyevin Özbəkistana rəsmi səfəri zamanı Daşkənddə imzalanmışdır.

Məlumatda deyilir ki, Özbəkistan Prezidenti bu sənədlərin imzalanması ilə bağlı Azərbaycan tərəfinə müvafiq məktubun göndərilməsi üçün Xarici İşlər Nazirliyinə göstəriş vermişdir.

Azərbaycan.- 2011.-10 mart.- S. 5.