Audronyus Ajubalis: 23 il uzun müddətdir. Sizin səbriniz, apardığınız izahat işləri regionda sabitliyə xidmət edir

ATƏT-in fəaliyyətdə olan sədri bu sözləri "Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyi idarə heyətinin üzvləri ilə görüşdə demişdir

ATƏT-in fəaliyyətdə olan sədri, Litvanın xarici işlər naziri Audronyus Ajubalis ölkəmizə səfəri çərçivəsində "Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyinin mərkəzi qərargahında qurumun idarə heyətinin üzvləri ilə görüşmüşdür.

İcmanın rəhbəri, Şuşa Rayon İcra Hakimiyyətinin başçısı Bayram Səfərov qonağı 75 minlik icma adından salamlayıb görüş iştirakçılarını təqdim etdikdən sonra münaqişə barədə məlumat vermiş, Ermənistanın işğalçılıq siyasəti, Dağlıq Qarabağı və ətrafdakı rayonları zəbt etməsi nəticəsində bir milyondan artıq günahsız azərbaycanlının insan hüquqlarının pozulduğunu, onların ev-eşiklərindən qovulub qaçqın və məcburi köçkünə çevrildiyini xatırlatmışdır. İcma rəhbəri demişdir: "Biz doğma yurdumuza qayıdıb 1992-ci ilə qədər Dağlıq Qarabağda yaşamış və Azərbaycan qanunlarına əməl etmək istəyən ermənilərlə, onların övladları ilə dinc yanaşı yaşamağa hazırıq. İstərdik ki, bu iş qan tökülmədən, sülh danışıqları vasitəsilə reallaşsın. Təəssüf ki, qarşı tərəfin qeyri-konstruktiv mövqeyi buna imkan vermir. Bunun nəticəsidir ki, 1992-ci ildən bəri ATƏT həmsədrlərinin səfərləri də səmərə vermir. Bu müddətdə Ermənistan BMT-nin, ATƏT-in, digər beynəlxalq qurumların münaqişə ilə bağlı qərar və qətnamələrini qulaqardına vurmuşdur. Biz bu təşkilatların təcavüzkara təsir göstərməsini istəyirik. Təəssüf ki, ikili standartlar, təcavüzkarla təcavüz qurbanını eyniləşdirmək cəhdi Ermənistanın daha da əl-qol açmasına rəvac verib. Artıq sərhəddə erməni snayperi günahsız uşağı qətlə yetirib. İşğalçının himayə olunmasının nəticəsidir ki, Dağlıq Qarabağa heç bir aidiyyəti olmayan 7 rayon da ermənilər tərəfindən işğal edilmişdir. Biz haqq səsimizin beynəlxalq aləmdə eşidilməsini, həqiqətin dəstəklənməsini istəyirik.

Akademik Vaqif Fərzəliyev beynəlxalq qurumların, böyük dövlətlərin müxtəlif münaqişələrə münasibət bildirdiyini, bəzi ölkələrə qarşı sanksiya tətbiq edildiyini xatırladıb sual vermişdir: Nə üçün işğalçı Ermənistana gözün üstə qaşın var deyən yoxdur, bu dövlət nəyə və kimə arxalanıb dünyaya meydan oxuyur? İnanırıq ki, ATƏT rəhbərliyi Azərbaycan xalqının narahatlığını başa düşüb anlayacaqdır.

Bakı Musiqi Akademiyasının rektoru xalq artisti Fərhad Bədəlbəyli qeyd etmişdir ki, hamımız münaqişənin sülh yolu ilə həllinin tərəfdarıyıq. Ancaq ortada heç bir nəticənin olmaması cəmiyyəti narahat edir. Xüsusilə gənclər arasında radikallıq artır, onları sakitləşdirməkdə, BMT Təhlükəsizlik Şurasının dörd qətnaməsinin kağız üzərində qalmasının səbəbini izah etməkdə çətinlik çəkirik. Xalqın səbir kasası dolmuşdur. Maraqlıdır, kasıb, günbəgün müflisləşən bir ölkə kimə arxayındır?

Milli Məclisin deputatı Elman Məmmədov xatırlatmışdır ki, ötən əsrin 90-cı illərinin əvvəlində Azərbaycan rəhbərliyi, ölkə iqtisadiyyatı zəif idi, ordu formalaşmamışdı. Bundan istifadə edən Ermənistan silahlı qüvvələri himayədarlarının köməyi ilə Azərbaycan torpaqlarını işğal etdilər. Azərbaycan kəndlərində ermənilər tərəfindən kütləvi qırğınlar törədilmişdir. Xocalı soyqırımı gözlərim qarşısında baş verib, orada əzizlərimi, o cümlədən anamı itirmişəm. O zaman hegemon dövlətlər "sülh", "haqq-ədalət" sözlərini yada salmadılar. Bu gün Azərbaycan güclüdür, amma müharibə etmək istəmir. Bununla belə, öz ərazisində yuva salmış terrorçulara qarşı antiterror əməliyyatı keçirmək hüququna malikdir. İyirmi üç ildir torpaqlarımız işğal altındadır. Təəssüf ki, Dünya birliyi, həmsədr dövlətlər cırtdan Ermənistanı yerində oturda bilmirlər. Belə vəziyyətdə Azərbaycan nə etməlidir?

Azərbaycan Prezidenti yanında Dövlət İdarəçilik Akademiyasının dosenti Həvva Məmmədova Xankəndidən didərgin düşmüş və respublikanın 48 rayonuna səpələnmiş soydaşlarımızın bugünkü vəziyyəti barədə məlumat verdikdən sonra ATƏT sədrindən xahiş etmişdir ki, 9 yaşlı uşağın erməni snayperi tərəfindən öldürülməsi məsələsinə ciddi diqqət yetirsin.

Şuşa Mərkəzi Rayon Xəstəxanasının baş həkimi Ramiq Məhərrəmov konkret sualla kifayətlənmişdir: "ATƏT-in Minsk qrupunun həmsədrləri nəticəsiz danışıqlardan yorulmayıblarmı?"

Bakı Slavyan Universitetinin rektoru, AMEA-nın müxbir üzvü Kamal Abdullayev Azərbaycan və Ermənistan ziyalılarının bir neçə il əvvəlki görüşünü xatırlatmış və qeyd etmişdir ki, əksər erməni ziyalılar da münaqişənin həllini istəyir, ancaq bunu ölkədə hökm sürən hərbi diktatura səbəbindən dilə gətirməyə qorxurlar.

Xocavənd Rayon İcra Hakimiyyətinin başçısı Eyvaz Hüseynov da sualla kifayətlənmişdir: "Bir milyondan çox azərbaycanlının insan hüquqları pozulmuşdur. Azərbaycan beynəlxalq qurumların qərarlarına hörmətlə yanaşır, bəs bu qurumların Azərbaycanın haqq işinə münasibəti necədir?"

Audronyus Ajubalis ətraflı məlumat üçün təşəkkür etmiş və bildirmişdir ki, keçirəcəyi görüşlərdə cəbhə xəttindən snayperlərin çıxarılmasını təklif edəcəkdir. "Digər tədbirlər də təklif edəcəyəm. Düzdür, bunlar xırda tədbirlərdir, münaqişəni həll etmir, ancaq xüsusilə cəbhə xəttində gərginliyi azalda bilər", - deyə qonaq vurğulamışdır. O qeyd etmişdir ki, münaqişənin həllində ATƏT-ın Minsk qrupunu yaradan ölkələrdən çox şey asılıdır. Bu qrupa dəstək vermək lazımdır.

Natiq ATƏT-in Minsk qrupunun fəaliyyətində gözə görünməyən nəticələrin olduğunu vurğulayıb demişdir: "İyirmi üç il uzun müddətdir. Sizin səbriniz, apardığınız izahat işləri regionda sabitliyə xidmət edir".

AzərTAc

Azərbaycan.- 2011.-15 mart.- S. 4.