Bakıda "Azərbaycan muğamı və Orta Şərq musiqisi" mövzusunda elmi simpozium işini davam etdirmişdir

Martın 16-da Azərbaycan Bəstəkarlar İttifaqında "Muğam aləmi" II Beynəlxalq muğam festivalı çərçivəsində keçirilən "Azərbaycan muğamı və Orta Şərq musiqisi" mövzusunda elmi simpozium öz işini bölmə iclasında davam etdirmişdir.

AzərTAc xəbər verir ki, gün ərzində keçirilən bölmə iclaslarına amerikalı alim Uilyam Samtsin, rusiyalı sənətşünas Ramilla Canizadə, Azərbaycan Milli Elmlər Akademiyasının müxbir üzvü, əməkdar incəsənət xadimi Zemfira Səfərova və türkiyəli bəstəkar Ozan Yarman sədrlik etmişlər.

İlk olaraq YUNESKO-nun nümayəndəsi, Paris Milli Elmi Araşdırmalar Mərkəzinin professoru Jan Dürinq "Qafqaz və İran mühitində Azərbaycan muğamlarının yeri" mövzusunda məruzə ilə çıxış etmişdir.

J.Dürinq demişdir ki, hazırladığı məruzə əsasən İran və Qafqazdan ibarət regional mühitdə Azərbaycan muğamlarının tədqiqinə yönəlmişdir.

Alim məruzəsində regionda muğamın yayılma coğrafiyasını, bu sənət növünün keçdiyi tarixi inkişaf yolunu və onun müasir mədəni sivilizasiyada rolunu aydın şəkildə iştirakçıların diqqətinə çatdırmışdır.

Sonra Beken Münir "Makam musiqi ənənəsində formanın və səsin qarşılıqlı əlaqəsi", Salih Turan "Azərbaycan zərb muğamları və türk musiqisində analoji janrlar" (Türkiyə), Rəna Məmmədova "Azərbaycan və türk musiqisində məqam düsturlarının müqayisəli təhlili haqqında", Ariz Abdullayev "Şərq ənənəvi professional musiqisində bayatı muğamı", Cəmilə Həsənova "Azərbaycan musiqisində məqamların qarşılıqlı əlaqələrinin tədqiqi məsələləri" (Azərbaycan), Araş Mohafez "Musiqi eyniliyinin iki təzahürü: Azərbaycan muğamında və İran dəsgahında təsnif nümunəsi", Ehsan Xezrlou "Azərbaycan muğam intervalları: neytralların yox olma prosesi" (İran), Sergey Lebedev "Muğamın rus musiqişünaslığına inteqrasiyası: problemlər və perspektivlər" (Rusiya), Yürger Elsner "Müasir muğamın struktur və formalaşması haqqında qeydlər" (Almaniya), Rüstəm Boltayev "Xorezm tanbur və dutar makomlarının bəzi xüsusiyyətləri haqqında" (Özbəkistan) və Yasin Muhpul "On iki Uyğur mukamlarının Azərbaycan muğamları ilə müqayisəli tədqiqi" (Çin) mövzusunda məruzələri dinlənilmişdir.

Məruzələrdə bir daha muğam musiqisinin dünya xalqları tərəfindən böyük maraqla dinlənildiyi və bu sənət növünün sərhəd tanımaması barədə fikirlər səslənmişdir. Bildirilmişdir ki, yarandığı vaxtdan uzun bir inkişaf yolu keçən Azərbaycan muğamları tarixin müxtəlif məqamlarında yeniləşməyə doğru meyillənsə də, daim öz keçmiş ənənəsini qoruyub saxlamışdır.

Alimlər araşdırdıqları məsələləri əyani vasitələrlə diqqətə çatdırmışlar.

Məruzələr ətrafında geniş fikir mübadiləsi aparılmışdır.

Simpozium öz işini martın 17-də başa çatdıracaqdır.

Azərbaycan.- 2011.-17 mart.- S. 2.