Coğrafi məlumatlar sistemi üzrə treninqlər

Dövlət Torpaq və Xəritəçəkmə Komitəsinin struktur vahidlərində, yerli qurumlarında informasiya-kommunikasiya texnologiyalarından səmərəli istifadə edilir. Dövlət torpaq kadastrı xəritələri, digər tematik xəritələr bu sistemin ən son nailiyyətlərinin tətbiq edilməsi yolu ilə icra olunur.

Bu gün müasir dövrün tələblərinə uyğun olaraq, elektron kadastr xəritələrinin hazırlanmasını coğrafi informasiya məlumatlarının standartlaşdırılması və məlumat bazasının istifadəsinin tətbiq edilməsi olmadan təsəvvür etmək mümkün deyil. Odur ki, komitənin yerli qurumlarında bu işlə məşğul olan kadrların treninqlərə, praktiki və nəzəri məşğələlərə cəlb edilməsinə ciddi fikir verilir. Dövlət Yerquruluşu Layihə İnstitutunun bir qrup əməkdaşı üçün Heydər Əliyev Torpaq İslahatı Mərkəzində "Risk" Elm-İstehsalat Mərkəzinin təşkil etdiyi "Coğrafi informasiya sistemi" mövzusunda keçirilən təlimlər buna misaldır. Martın 9-dan başlamış və aprelin 1-dək davam edəcək təlimlərin keçirilməsinə məsul şəxs - Yerquluşu Layihə İnstitutunun texniki şöbəsinin müdiri Elçin Məhərrəmlinin sözlərinə görə, treninqə institutun şöbələrində və rayonlararası yerquruluşu idarələrində çalışan əməkdaşlar cəlb olunublar. Treninqlər əməkdaşların bilik səviyyəsinin, eyni zamanda lazımi proqramlarda işləmək bacarıqlarının artırılmasına xidmət edir.

Azərbaycan.- 2011.- 20 mart.- S. 5.