Avropa Parlamentində “Avropa İttifaqı-Azərbaycan münasibətləri: mədəniyyətlərarası dialoq” mövzusunda konfrans keçirilmişdir

Martın 17-də Brüsseldə Avropa Parlamentində parlamentin Almaniyadan olan üzvü İsmayıl Ərtuğun himayəsi və Azərbaycanın Belçikadakı səfirliyinin dəstəyi ilə Belçika-Azərbaycan Dostluq Cəmiyyəti tərəfindən “Avropa İttifaqı-Azərbaycan münasibətləri: mədəniyyətlərarası dialoq” mövzusunda konfrans keçirilmişdir.

Konfransa məruzəçi qismində Azərbaycan Respublikası Dini Qurumlarla İş üzrə Dövlət Komitəsinin sədr müavini Gündüz İsmayılov, Azərbaycan Mədəniyyət və Turizm Nazirliyinin qeyri-maddi irs şöbəsinin müdiri Yaşar Hüseynli, Qafqaz Müsəlmanları İdarəsinin nümayəndəsi Ziyad Əhmədov, Rus Pravoslav Kilsəsinin Bakı-Xəzəryanı yeparxiyası dini icmasının nümayəndəsi keşiş Mifodi, Azərbaycanın Dağ Yəhudiləri dini icmasının sədr müavini Semyon Şalmeyev, Avropa Aşkenaz Yəhudiləri dini icmasının Bakı nümayəndəliyinin sədr müavini Yevgeni Brenneysen və Azərbaycan Alban-udin xristian icmasının başçısı Robert Mobili dəvət olunmuşdular.

Millət vəkili İsmayıl Ərtuğ konfransı açaraq, ilk dəfə Avropa Parlamentində mədəniyyətlərarası dialoq mövzusunda keçirilən konfransa ev sahibliyi etməkdən şərəf duyduğunu qeyd etmiş və tədbirin işinə uğurlar diləmişdir. Azərbaycanın Belçikadakı səfiri və Aİ yanında missiyasının rəhbəri Emin Eyyubov Azərbaycanın din və mədəniyyətlərin birgə yaşadığı və tolerantlığın ən bariz nümunəsi olan nadir məkanlardan biri olduğunu qeyd etmişdir. Səfir demişdir ki, Azərbaycandan gəlmiş müsəlman, xristian, yəhudi və alban-udin dini icmalarının nümayəndələrinin konfransda iştirakı bunu bir daha sübut edir. Belçika-Azərbaycan Dostluq Cəmiyyətinin sədri Ayhan Dəmirçi azərbaycanlıların zəngin mədəni irsə sahib olduqlarını, fərqli mədəniyyətlərə və dinlərə hər zaman hörmətlə yanaşdıqlarını qeyd etmiş və konfransa ev sahibliyi etdiyi üçün İ.Ərtuğa və Azərbaycandan gəlmiş qonaqlara təşəkkür etmişdir.

Daha sonra məruzəçilər Azərbaycanda dini icmaların vəziyyəti, qeydə alınması və fəaliyyəti, dini dözümlülük və tolerantlıq mühitinin ümummilli lider Heydər Əliyevin din-dövlət konsepsiyasına uyğun olaraq möhkəmləndiyini və bu siyasətin Prezident İlham Əliyev tərəfindən davam etdirildiyini, böyük tarixə malik dini məbədlərin bərpası, bu sahədə YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın rəhbərlik etdiyi Heydər Əliyev Fondunun mühüm rolu barədə məlumat vermişlər.

Azərbaycanda tolerantlıq ənənələrinin tarixi kökləri, Azərbaycan torpaqlarında yəhudilərin sığınacaq tapmaları, xristianlığın ilk ardıcıllarının Azərbaycana pənah gətirmələri, dövlət səviyyəsində bütün dini icmalara göstərilən qayğı, kilsə və sinaqoqların fəalıyyəti, Alban-udin xristian icması, alban mədəniyyətinin və kilsələr də daxil olmaqla tarixi abidələrin erməniləşdirilməsi cəhdləri, işğal olunmuş ərazilərdə mədəni irsimizin ermənilər tərəfindən dağıdılması, Azərbaycan toponimlərinin erməniləşdirilməsi kimi məlumatlar dinləyicilərin geniş marağına səbəb olmuşdur.

Tədbirə qatılmış Avropa Parlamentinin bir sıra millət vəkilləri söz alaraq, Azərbaycanın doğrudan da tolerantlıq, dinlər və mədəniyyətlərarası dialoqda digər ölkələr üçün nümunə olduğunu və bu təcrübədən yararlanmağın vacibliyini qeyd etmişlər. Tədbirdə Avropa Parlamentinin üzvləri, Belçika millət vəkilləri, diplomatlar, KİV, ictimaiyyətin və yerli dini icmaların nümayəndələri iştirak etmişlər.

Sonda məruzəçilər konfrans iştirakçılarının suallarını cavablandırmışlar.

Əsgər Əliyev,

AzərTAc-ın xüsusi müxbiri

Paris

Azərbaycan.- 2011.-20 mart.- S. 7.