II Beynəlxalq muğam festivalı çərçivəsində “Azərbaycan muğamının dostları” adlı görüş-konsert olmuşdur

Martın 19-da Azərbaycan Dövlət Muğam Teatrında “Azərbaycan muğamının dostları” adlı görüş-konsert keçirilmişdir.

AzərTAc xəbər verir ki, “Muğam aləmi” II Beynəlxalq muğam festivalı çərçivəsində keçirilən konsert İraq muğam musiqiçilərinin ifası ilə açılmışdır. İraqın “Anğam Al Rafidain” ansamblının ifasında İraq muğamı, milli mahnı - xoyrat, türkməncə Qarabağ haqqında mahnı, “Nəhamət” muğamı tamaşaçılar tərəfindən maraqla qarşılanmışdır. Ansamblın solisti Məhəmməd Rauf Dərzidir.

Sonra amerikalı musiqiçi Cefri Verbok, fransalı Julyan Vays və digər xarici qonaqlar öz məharətlərini göstərmişlər.

Azərbaycan xalq mahnısı “Evləri var xana-xana”nı özünəməxsus tərzdə tamaşaçılara çatdıran Rəşad Qaraxanoğlunun ifası alqışlarla qarşılanmışdır. Xanəndəni tarda Altay Niftəliyev, kamançada Araz Ağaverdiyev müşayiət etmişlər.

Sonda azərbaycanlı və xarici musiqiçilər “Ay bəri bax, bəri bax” xalq mahnısını birgə ifa etmişlər

Azərbaycan.- 2011.-20 mart.- S. 11.