Mətbuat Şurasında Ümumdünya Mətbuat Azadlığı Günü ilə bağlı “dəyirmi masa” keçirilmişdir

Azərbaycan Mətbuat Şurasında 3 May - Ümumdünya Mətbuat Azadlığı Günü ilə bağlı “dəyirmi masa” keçirilmişdir.

AzərTAc xəbər verir ki, YUNESKO-nun Azərbaycan Respublikası üzrə Milli Komissiyasının və Beynəlxalq Mətbuat İnstitutunun ölkəmiz üzrə Milli Komitəsi ilə birgə təşkil edilmiş tədbirdə Mətbuat Şurasının sədri Əflatun Amaşov Ümumdünya Mətbuat Azadlığı gününün tarixi barədə məlumat vermişdir. Bildirilmişdir ki, Azərbaycan mətbuatı dünya mətbuatının bir parçası kimi uğurla inkişaf edir. Ölkəmizdə söz və mətbuat azadlığının təmin olunması istiqamətində ciddi addımlar atılır. Jurnalistikanın inkişafı ilə bağlı bir sıra uğurlu layihələr həyata keçirilir.

Ümumdünya Mətbuat Azadlığı gününün demokratik proseslərin inkişaf etdiyi, fikir və söz azadlığına önəm verildiyi ölkələrdə qeyd olunduğunu bildirən YUNESKO-nun Azərbaycan Respublikası üzrə Milli Komissiyasının birinci katibi Günay Əfəndiyeva demişdir ki, bu sahəyə ölkəmizdə də böyük diqqət göstərilir.

Kommunikasiya və informasiya sahəsinin YUNESKO-nun əsas prioritet istiqamətlərindən olduğunu qeyd edən G.Əfəndiyeva demişdir ki, Azərbaycan bu sahədə təşkilat ilə fəal əməkdaşlıq edir. O, təşkilatın bu sahədə Azərbaycan Dövlət Teleqraf Agentliyi (AzərTAc), Mətbuat Şurası ilə birgə reallaşdırılmış layihələri xüsusi qeyd etmişdir.

Ümumdünya Mətbuat Azadlığı Günü münasibətilə KİV nümayəndələrini təbrik edən G.Əfəndiyeva BMT-nin baş katibi Pan Gi Munun, təşkilatın insan hüquqları üzrə ali komissarı Navi Pillayın və YUNESKO-nun baş direktoru İrina Bokovanın bu gün münasibətilə birgə müraciətini oxumuşdur.

Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli də 3 May - Ümumdünya Mətbuat Azadlığı Günü münasibətilə jurnalistləri təbrik etmiş, söz və mətbuat azadlığının, demokratiyanın, şəffaflığın təmin olunmasında, vətəndaş cəmiyyəti quruculuğunda KİV-lərin rolunu yüksək qiymətləndirmişdir. Azərbaycanda dövlətin mətbuata göstərdiyi diqqət və qayğını xüsusi qeyd edən V.Səfərli demişdir ki, sovetlər ittifaqı dövründə ölkə mətbuatı üzərində senzura tətbiq olunmuşdu. Yalnız 1998-ci ildə ulu öndər Heydər Əliyev tərəfindən mətbuat üzərindən senzuranın götürülməsi ilə Azərbaycanda azad mətbuatın inkişafı prosesi başlandı.

Hər il dünyada Ümumdünya Mətbuat Azadlığı Gününün geniş qeyd olunduğunu vurğulayan Beynəlxalq Mətbuat İnstitutunun ölkəmiz üzrə Milli Komitəsinin rəhbəri Umud Rəhimoğlu isə jurnalist peşəsinin çətinliklərindən danışmışdır.

“Dəyirmi masa”da KİV nümayəndələri, jurnalist birliklərinin təmsilçiləri, media ekspertləri və ziyalılar iştirak etmişlər.

Azərbaycan.- 2011.-4 may.- S.7.