DİA-da elmi konfrans keçirilmişdir

Mayın 6-da Azərbaycan Respublikasının Prezidenti yanında Dövlət İdarəçilik Akademiyasında (DİA) professor-müəllim heyətinin iştirakı ilə ümummilli lider Heydər Əliyevin anadan olmasının 88-ci ildönümünə həsr edilmiş "Heydər Əliyevin milli inkişaf strategiyası fəaliyyətdədir" mövzusunda elmi konfrans keçirilmişdir.

DİA-nın birinci prorektoru professor Əlikram Abdullayev tədbiri açaraq iştirakçılara mövzu ilə bağlı geniş məlumat vermişdir. Öz dühası və fədakar fəaliyyəti ilə Azərbaycana sülh, əmin-amanlıq, firavanlıq gətirmiş böyük xilaskar, bütün dünyada tanınan görkəmli siyasətçi, müstəqil Azərbaycan dövlətinin memarı və qurucusu, həyatını xalqına, vətəninə həsr edən ulu öndər Heydər Əliyevin Azərbaycan tarixində demokratik və hüquqi dövlət quruculuğunda müstəsna rolundan danışmışdır. Natiq Heydər Əliyevin xalqını və vətənini ürəkdən sevən, onun uğrunda çox böyük fədakarlıqlar göstərmiş, adı və əməlləri ilə dünya durduqca yaşayacağını vurğulamış, onun həyat və fəaliyyətinin gələcək nəsillər üçün əsl nümunə olacağını qeyd etmişdir.

Sonra DİA-nın Geostrateji Araşdırmalar Mərkəzinin direktoru, AMEA-nın müxbir üzvü, iqtisad elmləri doktoru, professor Əli Nuriyev "Reallıqdan yaranan və müvəffəqiyyətlə davam etdirilən sosial-iqtisadi inkişaf strategiyası", professor Nigar Ələkbərova "Azərbaycan Respublikasında idarəçi kadrların hazırlanması Heydər Əliyevin milli inkişaf strategiyasının tərkib hissəsi kimi", dosent Fəxrəddin Nağıyev "Heydər Əliyev və Azərbaycan Respublikası Konstitusiya quruculuğu", dosent Eldar Azadov "Heydər Əliyev və Azərbaycanda yerli özünüidarəetmənin inkişafı", dosent Elçin Əhmədov "Heydər Əliyevin xarici siyasət kursu və Azərbaycanın uğurları" mövzularında məruzə etmişlər.

AzərTAc

Azərbaycan.- 2011.- 7 may.- S. 10.