Milli Aviasiya Akademiyasında faşizm üzərində böyük Qələbənin 66-cı ildönümü qeyd olunmuşdur

Faşizm üzərində böyük Qələbənin 66-cı ildönümü ərəfəsində Milli Aviasiya Akademiyasının (MAA) Mülki Aviasiya Muzeyində tədbir keçirilmişdir.

Tədbirdə MAA-nın müəllim-tələbə heyəti və Nərimanov rayonundakı 201 nömrəli məktəbin şagirdləri iştirak etmişlər. Mülki Aviasiya Muzeyinin direktoru, əməkdar mədəniyyət işçisi Firəngiz Hüseynova 1941-1945-ci illər müharibəsində Qələbənin əldə edilməsində layiqli xidməti olan Azərbaycan xalqının, o cümlədən cəsur döyüşçülərimizin rəşadətindən ətraflı danışmışdır. Sonra mərasim iştirakçılarına 1941-1945-ci illər müharibəsi cəbhələrində igidlik göstərmiş azərbaycanlı təyyarəçilərdən bəhs edən slayd-mühazirə təqdim edilmişdir.

Qələbə gününə həsr olunmuş tədbir "Qafqaz qartalının uçuşu" sənədli filminin nümayişi ilə başa çatmışdır. Xatırladaq ki, 1941-1945-ci illər müharibəsinin iştirakçısı, əfsanəvi təyyarəçimiz Hüseynbala Əliyevə həsr edilmiş bu film Azərbaycanın "Salnamə" və Sankt-Peterburqun "Lennauçfilm" studiyaları tərəfindən istehsal olunmuşdur.

AzərTAc

Azərbaycan.- 2011.- 7 may.- S. 11.