İsveçrənin Xarici İşlər Federal Departamenti Azərbaycan səfirliyinin etiraz notasına cavab vermişdir

İsveçrənin Xarici İşlər Federal Departamenti Azərbaycan səfirliyinin etiraz notasına cavab vermişdir.

Azərbaycanın İsveçrə Konfederasiyası və Lixtenşteyn Knyazlığındakı səfirliyindən AzərTAc-a bildirmişlər ki, aprelin 29-da Cenevrədə 25-ci Beynəlxalq Kitab və Mətbuat Sərgisinin açılış mərasimində Ermənistana aid stendlərdə ölkəmizin ərazi bütövlüyünü təhrif edən müxtəlif materiallar nümayiş etdirilmişdir. Bununla əlaqədar səfirlik tərəfindən İsveçrənin Xarici İşlər Federal Departamentinə göndərilmiş etiraz notasına cavab verilmişdir. Cavab notasında sərgidə ermənilər tərəfindən təhrif olunmuş materialların nümayiş etdirilməsinin təəssüf doğurduğu bildirilir.

Federal Departamentin cavab notasında materiallara görə stend sahiblərinin məsuliyyət daşıdığı, hüquqi təminatın yalnız İsveçrənin qanunları pozulduğu halda mümkün ola biləcəyi qeyd edilmişdir. Məsələ ilə bağlı sərginin təşkilatçıları Federal Departament tərəfindən məlumatlandırılmışdır. Sərginin təşkilatçıları erməni stend sahiblərini inandırmaq üçün əllərindən gələni etmişlər.

Məktubda vurğulanmışdır ki, sərgidə ermənilər tərəfindən təhrif olunmuş materialların nümayiş etdirilməsi Azərbaycan Respublikasının işğal edilmiş Dağlıq Qarabağ regionu və ətraf rayonları ilə bağlı İsveçrə hökumətinin mövqeyi ilə ziddiyyət təşkil edir. Xüsusi qeyd olunmuşdur ki, Federal Departamentinin rəsmi internet səhifəsində İsveçrə Konfederasiyasının vətəndaşlarına Azərbaycanın işğal olunmuş Dağlıq Qarabağ regionuna və ətraf rayonlara səfər etməmək tövsiyə edilmişdir.

Azərbaycan.- 2011.- 7 may.- S. 11.