Azərbaycanın iqtisadi inkişaf naziri Almaniyaya səfəri çərçivəsində Bavariyada olmuşdur

Mayın 6-da Azərbaycanın iqtisadi inkişaf naziri Şahin Mustafayevin başçılıq etdiyi nümayəndə heyəti Almaniyaya səfəri çərçivəsində Bavariya Əyalətinin paytaxtı Münhen şəhərində olmuşdur.

Şahin Mustafayev Bavariya Federal Torpağının Federal və Avropa məsələləri üzrə dövlət naziri E.Müller ilə görüşmüşdür. Görüşdə Bavariya əyaləti ilə Azərbaycan Respublikası arasındakı iqtisadi münasibətlərin hazırkı səviyyəsi, inkişaf potensialı olan sahələr, bununla bağlı tərəflərin üzərinə düşən vəzifələr və qarşılıqlı maraq doğuran digər məsələlər müzakirə olunmuşdur.

Daha sonra Bavariya Federal Torpağının İqtisadiyyat, İnfrastruktur, Nəqliyyat və Texnologiyalar Nazirliyinin Azərbaycanın Almaniyadakı səfirliyi ilə əməkdaşlıq çərçivəsində təşkil etdiyi iqtisadi forum öz işinə başlamışdır. Forumda çıxış edən Şahin Mustafayev Azərbaycanın inkişaf edən iqtisadiyyatı, Prezident İlham Əliyevin apardığı iqtisadi kurs və ölkədə daş verən müsbət dəyişikliklər barədə iştirakçılara məlumat vermişdir. Bundan əlavə, Azərbaycan nümayəndə heyətinin tərkibinə daxil olan digər məruzəçilər - AZPROMO-nun prezidenti A.Məmmədov, Azərbaycan İnvestisiya Şirkətinin icraçı direktoru Ə.İsayev potensial alman investorları üçün maraqlı ola biləcək əməkdaşlıq sahələri barədə təqdimatlar etmişlər. Müzakirələrdə şirkətləri maraqlandıran məsələlər, o cümlədən birgə əməkdaşlıq imkanları müzakirə olunmuş, ikitərəfli görüşlər keçirilmişdir. Məhsuldar iş şəraitində keçən forumda Bavariya əyalətini təmsil edən 25-dən artıq alman şirkətinin və 60-dan artıq Azərbaycan şirkətinin nümayəndələri iştirak etmişdir.

Forum çərçivəsində Azərbaycan İnvestisiya Şirkəti və Almaniyanın HİPP şirkəti arasında “Azərbaycanda uşaq qidası istehsalının təşkili ilə bağlı layihənin həyata keçirilməsi haqqında xidməti müqavilə” imzalanmışdır. Bu layihənin reallaşdırılması nəticəsində Azərbaycanda ən müasir tələblərə cavab verən uşaq qidasının istehsalı təmin olunacaq, istehsal prosesində müasir alman texnologiyası və avadanlığı tətbiq ediləcəkdir. Bu isə Azərbaycan iqtisadiyyatının şaxələndirilməsinə, qeyri-neft sektorunun inkişafına, qeyri-neft məhsullarının ixracının artmasına töhfəsini verəcəkdir. Bu müəssisə regionda uşaq qidası istehsal edən ilk müəssisə olacaqdır.

Bununla yanaşı, forumda çörəkbişirmə müəssisəsi üçün avadanlığın alınmasına dair “Werner & Pfleiderer Bachverfahren Technik GmbH” şirkəti ilə Azərbaycanın “Delta Group” şirkəti arasında müqavilə imzalanmışdır. Müqavilənin həyata keçirilməsi Azərbaycanda ən müasir tələblərə cavab verən çörək istehsalını təmin edəcəkdir.

Vüqar Seyidov,

AzərTAc-ın xüsusi müxbiri

Berlin

Azərbaycan.- 2011.-8 may.- S. 5.