Ürəklərdə yaşayır

Əlli ilə yaxın təsərrüfat işlərində çalışmışam. El-oba arasında az-çox hörmətim olub. Deputat seçilmişəm. Müxtəlif məclislərdə, görüşlərdə iştirak etmişəm. Sosialist Əməyi Qəhrəmanı adını almışam. Həyatımda əlamətdar günlər az olmayıb. Amma ulu öndər Heydər Əliyevlə olan görüşləri ömür boyu unuda bilmərəm.

1976-cı il sentyabrın ilk günləri idi. Respublikamızın rəhbəri Heydər Əliyev rayonumuza gəlmişdi. Onda Samux indiki Göygöl rayonu ilə bir inzibati ərazi idi. Əvvəlcə bizim üzüm sahələrimizə baxdı. Hər yan tər-təmiz, yaşıl cərgələr göz işlədikcə uzanırdı. Salxım-salxım sallanan gilələr bal dadırdı. Heydər Əliyev sahələri diqqətlə nəzərdən keçirdi. Üzümçülərlə söhbət etdi. Sonra da gülə-gülə dedi ki, deyəsən, bizə ən seçmə yerləri göstərirsiz.

- Yoldaş Əliyev - dedim. - Bizdə hər yan belədir. Məhsula söz ola bilməz.

Sonra "Bolqarıstan" sovxozunda Səmayə İsgəndərovanın üzüm bağlarına baxanda məmnunluqla gülümsədi. Sanki mənim sözümü təsdiq etdi. Səmayə təcrübəli işçi idi. Sinəsini çoxlu orden və medal bəzəyirdi. Səkkiz uşaq böyütmüşdü. Oğlu Nadir mexanizator işləyirdi. Respublika Ali Sovetinə deputat seçilmişdi.

Heydər Əliyev göz oxşayan yaşıl cərgələrə baxdı:

- Nə qədər məhsul götürürsüz?

- Keçən il 290 sentner olub.

- Bəs bu ilə vədiniz?..

Səmayə İsgəndərova inamla dedi:

- Azı üç yüz sentner!

Heydər Əliyev özünəməxsus təbəssümlə gülümsündü:

- Çox gözəl - dedi. - Deputatın anası, bax, belə olar!

Umud Əliyarovun sahəsi, deyəsən, ölkə başçısının daha çox xoşuna gəldi. Üzümçü alim Famil müəllimlə birgə "çoxmərtəbəli" cərgələr yaratmışdı.

Heydər Əliyev yarızarafatla:

- Elə bil - dedi - salxımlar əllə düzülüb.

Umud da hazırcavab adam idi:

- Yoldaş Əliyev, - dedi - bizim torpağımız çox abaddır. Tənəkləri lap altı mərtəbəyə də qaldırsaq, yenə məhsul verməyə gücü çatacaq.

Heydər Əliyev onun iş üsulunu bəyəndi:

- Bu təcrübəni yaymaq lazımdır, - dedi.

Həmin il Umud Əliyarovun sahəsindən rekord məhsul yığıldı. Heydər Əliyevin təşəbbüsü ilə ona dövlət mükafatı verildi, "Volqa" maşını bağışlandı.

Ölkə başçısı hər işlə maraqlanırdı. O vaxt Rusiya şəhərlərinə çoxlu süfrə üzümü yola salınardı. Yaxın-uzaq ellərə məhsul qablanan yeşikləri nəzərdən keçirdi. Qutulardan birinin üstündəki etiketi götürdü. Ani olaraq nə fikirləşdisə, üzünü Dövlət Üzümçülük və Şərabçılıq Komitəsinin sədri Yunis Rzayevə tutdu:

- Bunları təzələyin - dedi. - Başda iri hərflərlə "Azərbaycan" sözünü yazın. Sonra rayonun və təsərrüfatın adı olsun. Qoy hər yerdə bilsinlər ki, Azərbaycanın bu cür qiymətli məhsulu var.

Heydər Əliyev üzümçülərlə, mexanizatorlarla çox səmimi söhbət edirdi. Bizim bir şairə qızımız var idi. Elmira xanım bu xoş ovqatdan fərəhləndi.

- Sizin gəlişinizə, yoldaş Əliyev, bir şeir həsr eləmişəm, - dedi.

Heydər Əliyev maraqla soruşdu:

- Nə, şeir, yəni, sən şeir də yazırsan? Oxu görüm.

Elmira xanım həvəslə, şövqlə oxudu:

Sevinin, a dostlar, sevinin - gülün.

Qayğıkeş, mehriban bir insan gəlib.

Yurdumun fəxridir, iftixarıdır,

Biz ata bilmişik ilk gündən onu,

Sinəsi ulduzlu qəhrəman gəlib.

Onun sayəsində zəfər çalmışıq,

Əlçatmaz, ünyetməz zirvələrdəyik.

Neçə ulduz, neçə bayraq almışıq.

Təbiət də əlvan nura bələnib,

Gül-çiçək bürüyüb keçdiyi yolu.

Samuxa xoş gəlib, xoş gəlib ellər -

Qəhrəman xalqımın, qəhrəman oğlu.

Heydər Əliyev üzümçü şairənin yaşayışı, dolanışığı ilə maraqlandı. Elmira:

- Hər şey yaxşıdır, - dedi. - Gəncədə oluruq...

- Yol uzaq deyil ki, çatdıra bilirsinizmi?

- Avtobus işləyir, ərim Sayad mexanizatordur. Birgə gedib-gəlirik, narahatlıq yoxdur.

Bir azdan eşitdik ki, ölkə başçısı üzümçü-şairə Elmira Məmmədovaya "Jiquli" bağışlayıb.

Möhtərəm Heydər Əliyevlə bir görüşdən min bir xatirə yarandı. Onun ulu adı, müqəddəs əməlləri, saralmaz-solmaz ömür yolu hamıya və hər kəsə əbədi nümunədir.

Rayonun mərkəzində ulu öndərin abidəsi ucaldılıb, zəngin bir muzey düzəldilib, geniş bir sahədə Heydər parkı salınıb. Hərdən ziyarət edirəm. Bir dəstə gül-çiçək aparır, ötənləri, keçənləri yada salıram. Deyirəm, nə yaxşı xalqımızın Heydər Əliyev kimi yolgöstərəni olub. İndi də onun layiqli davamçısı İlham Əliyevin rəhbərliyi ilə yaşayır, yaradırıq.

Allah sənə qəni-qəni rəhmət eləsin, ulu öndər!

Dilşad YOLÇUYEVA,

Samux rayonundakı Qovlarsarı

kəndinin sakini, Sosialist Əməyi

Qəhrəmanı, Prezident təqaüdçüsü

Azərbaycan.- 2011.- 11 may.- S. 9.