Naxçıvanda kardioloji konfrans keçirilib

Naxçıvan Dövlət Universitetində ümummilli lider Heydər Əliyevin anadan olmasının 88-ci ildönümünə həsr olunmuş "Ürək-damar xəstəliklərinin müalicəsinin bugünü və gələcəyi" mövzusunda elmi-praktiki konfrans keçirildi.

Naxçıvan MR Səhiyyə Nazirliyi, Naxçıvan Dövlət Universiteti, Azərbaycan Respublikası Dövlət Neft Şirkətinin Sosial İnkişaf İdarəsi və Azərbaycan Kardiovaskulyar Cərrahlar Assosiasiyasının təşkilatçılığı ilə gerçəkləşdirilən konfransa Naxçıvanın kardioloqları və digər həkimləri, universitetin tibb fakültəsinin müəllim və tələbələri qatılmışdı. Əvvəlcə dahi öndərin Naxçıvan şəhərindəki abidəsi ziyarət edildi, ümummilli liderin xatirəsi ehtiramla yad olundu. Konfrans Azərbaycanın dövlət himninin səsləndirilməsi ilə öz işinə başladı.

Universitetin rektoru akademik İsa Həbibbəyli, Naxçıvan MR səhiyyə naziri Niyazi Novruzov, Mərkəzi Neftçilər Xəstəxanasının Ürək və Damar Xəstəlikləri Mərkəzinin rəhbəri, Azərbaycan Kardiovaskulyar Cərrahlar Assosiasiyasının sədri, tibb elmləri namizədi Rəşad Mahmudov, ARDNŞ-in Sosial İnkişaf İdarəsi Səhiyyə Departamentinin rəisi tibb elmləri namizədi Fuad Əlizadə ümummilli liderin Azərbaycanda səhiyyənin inkişafında, yüksək ixtisaslı tibb kadrlarının hazırlanmasında misilsiz xidmətlərindən, bu sahədə əldə olunan mühüm nailiyyətlərdən danışdılar.

Qeyd olundu ki, muxtar respublikada səhiyyənin, eləcə də kardiologiyanın inkişafında böyük uğurlar əldə edilmişdir. Mərkəzi Neftçilər Xəstəxanasının kardiocərrahiyyə briqadası 2007-ci ildən bugünə kimi 4 il ərzində Naxçıvanda 500-dən çox xəstə üzərində angeoqrafiya, angeoplastika, eləcə də 200-ə qədər insan üzərində cərrahiyə əməliyyatları həyata keçiriblər. MNX ÜDXM-in rəhbəri, tanınmış kardiocərrah Rəşad Mahmudov, həmin mərkəzin Ürək-damar cərrahiyyəsi bölməsinin müdiri tibb elmləri namizədi Seymur Musayev, G.Abdullayev adına Elmi-Tədqiqat Kardiologiya İnstitutunun aspirantı Vüsal Məmmədov, Naxçıvan Müalicə Diaqnostika Mərkəzinin Ürək-damar cərrahiyyəsi şöbəsinin müdiri İntiqam Fətullayev müxtəlif mövzularda məruzələrlə çıxış etdilər. Məruzələrdə ürəyin işemik xəstəliyinin cərrahi yolla müalicəsi, uğurlu cərrahiyyə əməliyyatları, anadangəlmə ürək qüsurları, ürək-damar xəstəliklərinin düzgün diaqnozu, profilaktikası, muxtar respublikada 4 il ərzində kardiocərrahiyyənin inkişafı kimi məsələlərə toxunuldu, slayd və videogörüntülər nümayiş etdirildi.

Müzakirələrdən sonra NDU-nun rektoru akademik İsa Həbibbəyli tədbirə yekun vuraraq konfransın əhəmiyyətini, bu sahənin gələcək inkişafında böyük rol oynayacağını vurğuladı, birgə əməkdaşlığın gələcək perspektivlərindən bəhs etdi. Sonda konfrans iştirakçılarına sertifaktlar təqdim olundu.

Qeyd edək ki, Heydər Əliyev Fondunun təşəbbüsü, ARDNŞ-in dəstəyi ilə Mərkəzi Neftçilər Xəstəxanasının Ürək və Damar Xəstəlikləri Mərkəzinin 35 nəfərlik heyətdən ibarət yüksək ixtisaslı kardiocərrahiyyə briqadası ümummilli liderin anadan olmasının 88-ci ildönümü münasibətilə may ayının 3-dən başlayaraq Naxçıvanda növbəti humanitar aksiya keçiriblər. Mərkəzin rəhbəri Rəşad Mahmudovun başçılığı ilə 8 gün ərzində Naxçıvan Müalicə Diaqnostika Mərkəzində 20 xəstə üzərində açıq ürək əməliyyatı aparılması nəzərdə tutulub. Universitetin tibb fakültəsinin tələbələri, internatura keçən gənc həkimlər anadangəlmə ürək qüsuru olan körpə uşaqlar, o cümlədən 1-2 yaşlı körpələr üzərində aparılan açıq ürək əməliyyatlarında iştirak edib, kardiocərrahiyyənin son yenilikləri ilə praktiki tanış olmaq fürsəti qazanıblar.

Mehriban SULTAN

Azərbaycan.- 2011.-11 may.- S. 11.