Küveytdə Azərbaycan Mədəniyyəti Günləri böyük müvəffəqiyyətlə keçmişdir

Mayın 10-dan 12-dək Küveyt Dövlətində müvəffəqiyyətlə keçən Azərbaycan Mədəniyyəti Günləri bu ölkədə geniş əks-səda doğurmuşdur.

Azərbaycanın Küveytdəki səfirliyindən AzərTAc-a bildirmişlər ki, ölkəmizin Mədəniyyət və Turizm Nazirliyi, Küveyt Dövlətinin Mədəniyyət və Ədəbiyyat Ali Şurası və buradakı səfirliyimiz tərəfindən təşkil olunmuş bu mədəniyyət bayramı böyük uğur qazanmışdır. Mədəniyyət günləri çərçivəsində Küveyt ictimaiyyətinə zəngin konsert proqramı, Azərbaycan milli geyimlərinin ekspozisiyası, ölkəmizin füsunkar təbiətini, tarixi və memarlıq abidələrini, günbəgün dəyişən respublikamızın müasir simasını əks etdirən fotosərgi təqdim olunmuşdur.

Azərbaycan Mədəniyyəti Günləri dost ölkənin ictimaiyyətinin böyük rəğbətini qazanmış, kütləvi informasiya vasitələrinin xüsusi diqqət mərkəzində olmuşdur.

Nümayəndə heyətinin üzvləri Küveyt Dövlət Televiziyasının KTV1 kanalının rəhbərliyi ilə görüşmüş, bu kanalda yayımlanan və ölkədə ən yüksək reytinqə malik "Sabahın xeyir, Küveyt" verilişində çıxış etmişlər. Eyni zamanda, Küveytin KTV2 televiziya kanalı mədəniyyət xadimlərimizin konsert proqramını tam şəkildə yayımlamış, sərginin ekspozisiyalarından dolğun reportajlar hazırlamışdır.

Azərbaycanın Küveyt Dövlətindəki səfiri Tural Rzayevin "Ər-Ray" televiziya və Küveyt radio kanallarında müsahibələri efirə getmişdir. Küveytin yüksək tirajlı və nüfuzlu "Əl-Qabas", "Vatan", "Əs-Siyasə", "Əl-Cəridə", "Əl-Vasat", "Ən-Nahar", "Əl-Ənbə" və "Əs-Sabah" qəzetlərində mədəniyyət günləri haqqında müfəssəl məlumat və məqalələr, fotoşəkillər dərc olunmuş, Azərbaycanın zəngin mədəniyyəti və cəlbedici turizm potensialından ətraflı bəhs edilmiş, iki ölkə arasında mədəniyyət və turizm sahəsində əməkdaşlığın dərinləşdirilməsinin əhəmiyyəti xüsusi vurğulanmışdır

Azərbaycan.- 2011.-14 may.- S. 7.