Azərbaycanın RF-dəki səfirliyi və Mədəniyyət və Turizm Nazirliyi Qarabağ turizm agentliyinin Moskvada, beynəlxalq sərgidə iştirak etmək cəhdinin qarşısını almışlar

Mayın 12-14-də Moskvada, “Qostinıy dvor” sərgi kompleksində “MITF-2011” beynəlxalq turizm sərgisi keçirilmişdir. Sərgidə dünyanın 40 ölkəsindən nümayəndə heyətləri iştirak etmişlər. Azərbaycan Respublikasını sərgidə Zakir Əliyevin rəhbərliyi ilə Bakı İnformasiya-Turizm Mərkəzi (BİTM) təmsil etmişdir.

Azərbaycanın stendi sərgiyə gələnlərin böyük marağına səbəb olmuşdur. Sərgi iştirakçılarına müxtəlif reklam-informasiya materialları paylanmışdır. Sərgi çərçivəsində BİTM Rusiyanın müxtəlif şəhərlərinin və bir sıra xarici dövlətlərin turizm-informasiya mərkəzləri ilə turizm sahəsində münasibətlərin inkişafına dair əməkdaşlıq haqqında 11 müqavilə imzalamışdır.

Sərgidə “Bakı şəhəri qonağının xəritəsi”nin təqdimatı keçirilmişdir. Xəritə fəxri qonaqlara və sərgiyə gələnlərə təqdim olunmuşdur. “Bakı şəhəri qonağının xəritəsi” BİTM-nin yeni layihələrindən biridir. Bakı MDB ölkələri arasında Mİnskdən sonra bu xəritəni buraxan ikinci şəhərdir.

Sərgidə “Turizmin inkişafı üzrə Qarabağ agentliyi” iştirak etməliydi. Azərbaycan Mədəniyyət və Turizm Nazirliyinin müdaxiləsindən və Azərbaycanın Rusiyadakı səfirliyinin sərginin təşkilatçılarına ünvanladığı məktubdan sonra “Turizmin inkişafı üzrə Qarabağ agentliyi” iştirakçılar siyahısından çıxarılmışdır.

Asya Hacızadə

AzərTAc-ın xüsusi müxbiri

Moskva

Azərbaycan.- 2011.-15 may.- S. 2.