Bakı-Trabzon-Bakı aviareysi bərpa edilmişdir

Mayın 17-də "Azərbaycan Hava Yolları" Qapalı Səhmdar Cəmiyyəti (QSC) Bakı-Trabzon-Bakı marşrutunu bərpa etmişdir.

AzərTAc xəbər verir ki, Bakıdan gələn "ATR 42-500" sərnişin təyyarəsində QSC-nin nümayəndələrini Trabzonun beynəlxalq hava limanında aeroportun rəhbərliyi və şirkətin Türkiyə üzrə baş təmsilçisi İlham Əsədov qarşılamışdır.

"Azərbaycan Hava Yolları" QSC prezidentinin köməkçisi, xidmət rəisi Məhərrəm Səfərli son illər ölkəmizdə digər sahələrdə olduğu kimi, mülki aviasiyanın da sürətli inkişafı barədə məlumat vermişdir. Bildirmişdir ki, qurum Türkiyəyə yeni marşrutlar açmaqla iki qardaş ölkəni bir-birinə daha da yaxınlaşdırır. Trabzona uçuşların bərpası da bu yaxınlıqdan xəbər verir. Trabzon Türkiyədə uçuş etdiyimiz dördüncü şəhərdir. Gələn ay QSC Türkiyənin daha iki şəhərinə - Bodrum və Antalyaya mövsümi uçuşlar da təşkil edəcəkdir.

M.Səfərli QSC-nin bu yaxınlarda yeni "Aerobus-320" və "Boeing-767" sərnişin təyyarələri alacağını diqqətə çatdırmışdır. Gələn il yenidən "Boeing-767" və 2 yük təyyarəsinin alınması nəzərdə tutulur. 2014-cü ildə isə MDB-də ilk dəfə olaraq "Azərbaycan Hava Yolları" QSC "Boeing-787 drimlayner" təyyarələri alacaqdır. Bununla da, birbaşa Cənub-Şərqi Asiyaya, ABŞ-a və Avropanın bir neçə ölkəsinə uçuşlar həyata keçirmək mümkün olacaqdır.

Qonaqları salamlayan Trabzon beynəlxalq hava limanının baş direktoru Vedat Atabek marşrutun bərpasının əhəmiyyətindən danışmışdır.

Bakı-Trabzon-Bakı aviareysi üzrə uçuşlar həftənin çərşənbə axşamı və şənbə günləri reallaşacaqdır. "ATR 42-500" tipli sərnişin təyyarəsi ilə həyata keçiriləcək uçuşların bir tərəfə qiyməti 209 manat, iki tərəfə isə 310 manatdır. Uçuş müddəti 2 saat 10 dəqiqədır.

Azərbaycan.- 2011.-18 may.- S.8.