Dubayda çıxan "Əl-Bəyan" qəzetində "Azərbaycan Respublika Gününü bayram edir" başlıqlı məqalə dərc edilmişdir

Dubayda çıxan "Əl-Bəyan" qəzetinin 2011-ci il 17 may tarixli sayında "Azərbaycan Respublika gününü bayram edir" başlıqlı məqalə dərc edilmişdir.

Birləşmiş Ərəb Əmirliklərinin Dubay Əmirliyindəki "Azərbaycan" Cəmiyyətindən AzərTAc-a bildirmişlər ki, məqalədə ümummilli lider Heydər Əliyevin anadan olmasının 88-ci ildönümü və 28 May - Respublika Günü münasibətilə keçirilmiş tədbirdən bəhs edilir.

Bildirilir ki, dünyanın hər tərəfində olduğu kimi, BƏƏ-də yaşayan Azərbaycan diasporu da Azərbaycan müstəqilliyinin 20-ci ildönümünü qeyd etmişdir.

Məqalədə deyilir ki, Azərbaycan diasporunun rəhbəri Samir İmanov tədbirdə çıxış etmişdir. O bildirmişdir ki, 1918-ci il mayın 28-də Azərbaycan dövlət müstəqilliyini elan etmişdir. Bu müstəqillik 23 ay çəksə də, bu qısa dövr ərzində Azərbaycan xalqı parlaq bir mərhələ yaşamış, xarici müdaxilə və ya dominantlıq olmadan müstəqil siyasət həyata keçirmişdir.

Yazıda daha sonra deyilir ki, 1920-ci ilin aprel ayında keçmiş qırmızı ordu Azərbaycana daxil olduqdan sonra ölkədə sovet hakimiyyəti qurulmuş və 1991-ci ilin oktyabr ayına qədər Azərbaycan SSRİ-nin tərkibində qalmışdır. 1991-ci ildə Sovet İttifaqının dağılmasından sonra Azərbaycan öz suverenliyini bəyan etmişdir.

Beləliklə, Azərbaycan 1920-ci ildə itirdiyi müstəqilliyini bərpa etmiş və müasir tarixinin yeni bir dövrünə qədəm qoymuşdur.

Məqalədə qeyd edilir ki, Azərbaycanın əsas strateji sərvətlərindən sayılan neftin kəşfiyyatı, hasilatı və nəqli sahəsində dünyanın ən nəhəng şirkətləri ilə müqavilələr bağlamışdır.

Azərbaycan.- 2011.-18 may.- S. 10.