Mərkəzi Seçki Komissiyası vahid seçicilər siyahısının yenidən tərtib edilməsi prosesinə yekun vurmuşdur

Mayın 18-də Məzahir Pənahovun sədrliyi ilə Mərkəzi Seçki Komissiyasının (MSK) növbəti iclası keçirilmişdir.

Əvvəlcə MSK-nın 2 fevral və 24 fevral 2011-ci ildə keçirilmiş iclaslarının protokolları təsdiq edilmişdir.

MSK-nın mətbuat xidmətindən AzərTAc-a bildirmişlər ki, sonra Azərbaycan Respublikası üzrə seçicilərin daimi siyahısının tərtibinə dair məsələ müzakirə olunmuşdur. Məzahir Pənahov bildirmişdir ki, seçicilərin daimi siyahısı yanvar ayından başlayaraq məntəqə seçki komissiyaları tərəfindən müvafiq seçki məntəqələri üzrə yenidən tərtib edilərək fevralın 5-dək dairə seçki komissiyalarına verilmişdir. DSK-lar isə seçki dairələri üzrə yenidən tərtib edilmiş seçici siyahılarını aprelin 5-dək Mərkəzi Seçki Komissiyasına təhvil vermişlər. Seçici siyahılarının yenidən tərtib edilməsində Daxili İşlər və Ədliyyə nazirliklərinin müvafiq yerli qurumlarının, yerli icra hakimiyyəti orqanları və bələdiyyələrin köməyindən istifadə olunmuşdur. Aprelin 5-dən etibarən isə Azərbaycan Respublikası üzrə seçicilərin siyahısı Mərkəzi Seçki Komissiyası tərəfindən dövlət avtomatlaşdırılmış informasiya sistemi vasitəsilə yenidən tərtib edilmişdir. İlin əvvəlindən başlayaraq davamlı olaraq aparılan bu irimiqyaslı proses artıq yekunlaşmışdır. Bu günə olan məlumata görə, ölkə üzrə vahid seçicilər siyahısında 4 873 642 seçicinin adı vardır.

Sonra MSK üzvləri daimi seçici siyahılarının yenidən tərtib edilməsi, təsdiq olunması və ictimailəşdirilməsi barədə qərarın layihəsi ilə tanış olmuşlar. Komissiya qərara almışdır ki, cari ilin daimi seçici siyahılarının tərtib edilməsi və dəqiqləşdirilməsi işi başa çatmış hesab edilərək siyahılar məntəqə seçki komissiyaları tərəfindən təsdiq edilməsi üçün müvafiq dairə seçki komissiyalarına göndərilsin. MSK respublika üzrə seçicilərin daimi siyahısının dövlət avtomatlaşdırılmış informasiya sistemi vasitəsilə tərtib edilərək Mərkəzi Seçki Komissiyasının internet saytında yerləşdirməklə ictimailəşdirilməsi barədə qərar qəbul etmişdir.

Azərbaycan.- 2011.-19 may.- S. 8.