Mərkəzi Asiya Regional İqtisadi Əməkdaşlıq Proqramı Bakıda enerji sektorunda əməkdaşlığı müzakirə edir

Mayın 23-də Bakıda Mərkəzi Asiya Regional İqtisadi Əməkdaşlıq (MARİƏ) Proqramının Enerji Sektorunun Koordinasiyası Komitəsinin (ESKK) iclası öz işinə başlamışdır. ESKK elektroenerji, enerji istehsalı və tələbatı, milli və regional enerji təhlükəsizliyi ilə bağlı məsələləri müzakirə edəcəkdir. İclasda elektrik stansiyalarının planlaşdırılması və onların fəaliyyəti kimi texniki mövzular, MARİƏ-yə üzv olan ölkələr arasında karbohidrogen ticarətinin maliyyələşdirilməsi imkanları da müzakirə olunacaqdır.

Asiya İnkişaf Bankının (AİB) Enerji Məsələləri üzrə mütəxəssisi Levan Mltçedişvili toplantını şərh edərək bildirmişdir ki, enerji sektorunun təhlükəsizliyi regiondakı enerji infrastrukturunun və təsisatlarının balanslı şəkildə inkişaf etdirilməsi vasitəsilə həyata keçirilməlidir. Regionun enerji sektoru ilə bağlı uzunmüddətli strategiya iqtisadi və maliyyə cəhətdən düşünülmüş sərmayə tədbirləri hesabına həyata keçirilməlidir, regiondakı bütün dövlətlərin maraqları nəzərə alınmalıdır. O, Azərbaycan hökumətinə bu cür vacib görüşə ev sahibliyi etdiyi üçün təşəkkürünü bildirmişdir.

Azərbaycanın sənaye və energetika nazirinin müavini Natiq Abbasov hökumətin MARİƏ-nin enerji əməkdaşlığı ilə bağlı təşəbbüslərini daima dəstəklədiyini və gələcəkdə də dəstəkləyəcəyini bildirmişdir.

ESKK-nın iclası mayın 25-də yekunlaşacaqdır. İclasda Əfqanıstan, Azərbaycan, Çin, Qazaxıstan, Qırğızıstan, Monqolustan, Pakistan, Tacikistan, Türkmənistan və Özbəkistan hökumət rəsmiləri ilə təmsil olunurlar.

Azərbaycan.- 2011.-24 may.- S. 5.