Bakı şəhəri bədii özfəaliyyət kollektivlərinin 28 May - Respublika Gününə həsr olunmuş festivalı keçirilir

Bakı Şəhər Mədəniyyət və Turizm İdarəsinin təşəbbüsü ilə Xətai Rayon Mədəniyyət Mərkəzində bədii özfəaliyyət kollektivlərinin 28 May - Respublika Gününə həsr olunmuş festivalının baxış-müsabiqəsi keçirilmişdir.

Mədəniyyət mərkəzindən AzərTAc-a bildirmişlər ki, festivalın məqsədi mədəniyyət müəssisələrində fəaliyyət göstərən bədii özfəaliyyət kollektivlərinin, mədəni-maarif müəssisələrinin işinin daha da möhkəmləndirilməsi, Azərbaycan milli musiqisinin, folklor və rəqs janrının inkişaf etdirilməsidir.

Festivalın baxış-müsabiqəsində Bakı Şəhər Mədəniyyət və Turizm İdarəsinin şəbəkəsinə daxil olan mədəniyyət evlərinin bütün bədii özfəaliyyət kollektivləri iştirak etmişlər.

Çıxışları 6 nəfərdən ibarət münsiflər heyəti qiymətləndirəcəkdir. Tədbirin şərtlərinə görə, mədəniyyət müəssisələrinin bədii özfəaliyyət kollektivlərinin festivalında xalq çalğı alətləri və instrumental ansambllar, milli və müasir rəqs kollektivləri, muğam üçlüyü iştirak edəcəklər.

Ansamblların ifasında 1 rəng, 1 xalq mahnısı, 1 bəstəkar mahnısı dinləniləcəkdir. Rəqs kollektivlərinin ifasında 1 milli rəqs, 1 müasir rəqs nömrələri nümayiş olunacaqdır. Muğam üçlüyünün ifasında isə ən yaxşı muğam ifası qiymətləndiriləcəklər.

Festivala mayın 25-də Badamdar qəsəbə mədəniyyət evində yekun vurulacaqdır.

Qaliblərə Bakı Şəhər Mədəniyyət və Turizm İdarəsinin müxtəlif dərəcəli diplomları və qiymətli hədiyyələri təqdim ediləcəkdir.

Azərbaycan.- 2011.-25 may.- S. 4.