Qafqaz universitetləri birliyinin ilk beynəlxalq simpoziumu

Naxçıvan Dövlət Universitetində Qafqaz Universitetlər Birliyinin Birinci Naxçıvan Beynəlxalq Gənclik Simpoziumu keçirilmişdir. Simpozium iştirakçıları öncə ümummilli lider Heydər Əliyevin Naxçıvan şəhərindəki heykəlini və muzeyini, Türkiyə Cümhuriyyətinin qurucusu Mustafa Kamal Atatürkün heykəlini ziyarət etmiş, Naxçıvan Muxtar Respublikası Ali Məclisinin Sədri Vasif Talıbovun qəbulunda olmuşlar. Qonaqlar Naxçıvan şəhərinə ekskursiya etmiş, universitetlə yaxından tanış olmuşlar. Universitetin müəllim və tələbələrinin memarlıq, rəsm, kitab sərgisi xüsusi maraq doğurmuşdur.

Naxçıvan Muxtar Respublikası Ali Məclisinin Sədri Vasif Talıbov simpoziumda çıxış edərək elm və təhsilin bütün dövrlər üçün inkişafın yeganə hərəkətverici qüvvəsi olduğunu, hər bir xalqın elmi, intellektual və mənəvi potensialının etalonu sayıldığını vurğulamışdır. Ali Məclisin Sədri təhsili milli maraqlara yönəldən, ölkənin gələcək strateji məqsədlərinə uyğunlaşdıran Azərbaycan xalqının ümummilli lideri Heydər Əliyevin təhsil siyasətinin uğurlarından danışaraq Azərbaycanda son illər bu sahədə ən yüksək göstəricilərin əldə olunduğunu, milli təhsilin dünya təhsil sisteminə uğurla inteqrasiya etdiyini, tədrisin forma və məzmunca müasirləşdiyini, təhsilə ayrılan dövlət büdcəsinin ilbəil artdığını, milli kadr yetişdirilməsi, maddi-texniki bazanın gücləndirilməsi istiqamətində uğurlar qazanıldığını bildirmişdir. Qeyd olunmuşdur ki, Azərbaycanda təhsilə göstərilən qayğının real bəhrələridir ki, son 20 ildə Naxçıvan Muxtar Respublikasında 189 ümumtəhsil məktəb binası, ali və orta təhsili müəssisələri üçün 20-dən artıq təhsil korpusu və obyektləri, 17 uşaq bağçası, 21 uşaq musiqi məktəbi tikilərək və ya yenidən qurularaq istifadəyə verilmiş, təhsil ocaqları müasir informasiya-kommunikasiya texnologiyaları ilə təchiz olunmuşdur. Naxçıvan Muxtar Respublikası Ali Məclisinin Sədri Vasif Talıbov simpoziumun elm, təhsil sahəsində təcrübə və biliklərin dəyərləndirilməsi, Qafqaz regionundakı ölkələr arasında elm, təhsil mübadiləsinin inkişafı, dostluq əlaqələrinin möhkəmləndirilməsi baxımından əhəmiyyətini vurğulamış, simpoziumun işinə uğurlar arzulamışdır.

Universitetin rektoru, akademik İsa Həbibbəyli ölkəmizdə, o cümlədən muxtar respublikada elmin, təhsilin inkişafına göstərilən diqqət və qayğıdan, təhsilin səviyyəsinin yüksəldilməsi, elmin inkişafı istiqamətində qazanılan müvəffəqiyyətlərdən danışmışdır. Rektor bildirmişdir ki, hazırda AMEA-nın 2 həqiqi, 5 müxbir üzvünün çalışdığı bu ali təhsil ocağında 40-a yaxın elmlər doktoru, 200 fəlsəfə doktoru fəaliyyət göstərir. Beynəlxalq əlaqələr sahəsində də böyük uğurlar əldə olunmuşdur. Dünyanın 4 qitəsində yerləşən, 50-dən çox universitet ilə tərəfdaşlıq edən Naxçıvan Dövlət Universiteti Avropa Rektorlar Klubu, Asiya Universitetlər Assosiasiyası, İpək yolu və Qafqaz Universitetləri Cəmiyyətlərində, Qara Dəniz Ölkələri Birliyində milli ali təhsilimizi layiqincə təmsil edir. Dünyanın 10 ölkəsindən 200-ə yaxın tələbənin təhsil aldığı universitet Avropa Birliyi ölkələrinin TEMPUS proqramının və dıgər beynəlxalq təşkilatların layihələrində uğurla təmsil olunur. Akademik İsa Həbibbəyli demişdir ki, qədim tarixə malik, dünyaya Heydər Əliyev kimi böyük siyasətçi bəxş etmiş Naxçıvan son illər beynəlxalq siyasi əhəmiyyətli tədbirlərə ev sahibliyi edir. Qafqaz Universitetlər Birliyinin Birinci Naxçıvan Beynəlxalq Gənclik Simpoziumunun keçirilməsi isə 2009 -cu ildə Naxçıvanda keçirilən Türkdilli ölkələrin dövlət başçılarının IX zirvə görüşündə qəbul olunmuş bəyannamənin gerçəkləşdirilməsi istiqamətində atılan mühüm addımdır. Simpozium Qafqazda yaşayan, ortaq coğrafiyanı və mədəniyyətləri paylaşan Azərbaycan-türk-gürcü xalqlarının elmi-intellektual inkişafında, onların tələbə gəncləri arasında elmi-mədəni tərəfdaşlığın möhkəmlənməsində böyük rol oynayacaq.

Sonra universitetin Tələbələr Azad Sahibkarlıq Fəaliyyətində (SİFE) komandasının təqdimatı olmuşdur. İki dəfə milli çempion olmuş, 2010-cu ildə ABŞ-ın Kaliforniya ştatının Los-Anceles şəhərində keçirilən dünya çempionatında ölkəmizi uğurla təmsil etmiş, 2011-ci ildə isə Malayziyanın paytaxtı Kuala Lumpur şəhərində keçirilən SİFE Dünya Çempionatında qrup mərhələsində III yer tutmuş komandanın fəaliyyəti haqqında məlumat verilmişdir.

Ərdəhan Universitetinin rektoru, professor-doktor Ramazan Qorxmaz Qafqaz Universitetlər Birliyinin rəhbəri kimi 2009-cu ildə yaradılan, Türkiyə, Azərbaycan, Gürcüstan, İran və Rusiyadan 21 universitetin təmsil olunduğu birliyin qısa müddətdə keçdiyi inkişaf yolundan danışmışdır.

Axalsx Universitetinin prorektoru, professor-doktor Roin Kavrelişvili ilk dəfə Naxçıvanda gerçəkləşdirilən simpoziumun gələcək elmi əlaqələrin inkişafına böyük təkan verəcəyini söyləmişdir.

Türkiyə Cümhuriyyəti Ali Təhsil Şurasının sədri, professor-doktor Yusif Ziya Özcan Türkiyədə ali təhsilin müasir inkişaf səviyyəsindən danışmış, Qafqaz Universitetlər Birliyinin fəaliyyətini, ilk simpoziumu ölkələrin tarixlərinin, mədəniyyətlərinin, habelə ali təhsil təcrübələrinin öyrənilməsi, universitetlərarası elmi təcrübə mübadiləsi, birgə elmi tədqiqat layihələrinin, ortaq elmi araşdırmaların həyata keçirilməsi baxımından yüksək dəyərləndirmişdir.

Türkiyə Cümhuriyyəti Ali Təhsil Şurasının sədri, professor-doktor Yusif Ziya Özcana Naxçıvan Dövlət Universitetinin fəxri doktoru diplomu təqdim olunmuşdur.

Plenar iclasın sonunda universitetin xarici tələbələrinin də iştirakı ilə rəngarəng konsert proqramı təqdim olunmuşdur.

Simpozium "Beynəlxalq münasibətlər", "Mədəniyyət", "İqtisadiyyat", "Tarix", "Ədəbiyyat", "Dilçilik", "Təhsil" üzrə bölmə iclasları ilə işini davam etdirmişdir. Naxçıvanın dövlət və özəl ali məktəblərinin, Bakı Qafqaz Universitetinin, Türkiyənin Ərdahan, Ərzurum Atatürk, Qars, Giresun, Fateh Sultan Mehmet, Trabzon Qara Dəniz Texniki universitetlərinin, İran İslam Respublikasının Mərənd Pəyam Nur və Azad İslam universitetlərinin, Gürcüstanın Axalsx və Kutaisi, İlia dövlət universitetlərinin tələbələrinin, Türkmənistan, Qazaxıstan kimi türkdilli dövlətlərin təmsilçilərinin mühazirələri dinlənilmişdir.

Yekun iclasdakı çıxışlarda xalqların qədim və zəngin tarixi, mədəniyyətləri, ədəbiyyatları, eyni zamanda elm, təhsil sahəsində qazandıqları təcrübələrin, ölkələrin ali təhsil sistemi, universitetlərin strukturu və fəaliyyəti haqqında məlumatların öyrənilməsi, gələcək birgə fəaliyyət istiqamətlərinin müəyyənləşdirilməsi baxımından simpoziumun işi yüksək qiymətləndirilmişdir.

Simpozium çərçivəsində Naxçıvan Dövlət Universiteti ilə Ağrı İbrahim Çeçen Universiteti arasında əməkdaşlıq müqaviləsi imzalanmışdır.

Mehriban SULTAN

Azərbaycan.- 2011.- 17 noyabr.- S. 7.