«Xocalıya ədalət» beynəlxalq kampaniyası çərçivəsində 2012-ci ildə bir milyona yaxın imza toplanacaqdır

"Xocalıya ədalət" beynəlxalq kampaniyası çərçivəsində 2012-ci ildə bir milyona yaxın imza toplanacaqdır. AzərTAc xəbər verir ki, bu sözləri Dialoq və Əməkdaşlıq Uğrunda İslam Konfransı Gənclər Forumunun (DƏ-İKGF) baş katibi Elşad İsgəndərov demişdir.

Baş katib vurğulamışdır ki, DƏ-İKGF tərəfindən "Xocalıya ədalət" beynəlxalq kampaniyası çərçivəsində soyqırımının 20-ci ildönümü ilə bağlı gələn il silsilə tədbirlər həyata keçiriləcəkdir. Kampaniya çərçivəsində beynəlxalq ictimaiyyətə faciə ilə bağlı sənədli filmin təqdim olunması və 50-dək xarici ölkədə kütləvi aksiyaların keçirilməsi planlaşdırılır.

İslam Əməkdaşlıq Təşkilatının üzvü olan 57 ölkədən 51-nin DƏ-İKGF-nin də üzvü olduğunu deyən E.İsgəndərov vurğulamışdır ki, Azərbaycan həqiqətlərinin dünyaya çatdırılması istiqamətində forum bir sıra proqramlar həyata keçirmişdir.

Azərbaycan.- 2011.- 23 noyabr.- S. 3.