Dünya Bankı ilə ədliyyə sahəsində yeni kredit sazişi imzalanmışdır

Noyabrın 22-də Ədliyyə Nazirliyi ilə Dünya Bankı arasında ədliyyə sisteminin müasirləşdirilməsi layihəsinin əlavə maliyyələşdirilməsinə dair yeni kredit sazişinin imzalanması mərasimi keçirilmişdir.

Ədliyyə Nazirliyinin mətbuat xidmətindən AzərTAc-a bildirmişlər ki, sazişi Azərbaycan tərəfindən ədliyyə naziri Fikrət Məmmədov, Dünya Bankı tərəfindən bankın ölkə meneceri vəzifəsini icra edən Səadət Bağırlı imzalamışdır.

Mərasimdə çıxış edən nazir Prezident İlham Əliyevin rəhbərliyi ilə ədliyyə və məhkəmə sisteminin və infrastrukturunun müasirləşdirilməsi üzrə görülən işlər barədə məlumat vermiş, ötən həftə ölkəmizin başçısının Oğuz rayonunda layihə çərçivəsində inşa olunmuş ilk məhkəmə binasının açılışında iştirakını və görülən işləri təqdir etməsini bu sahəyə böyük diqqətin və etimadın əyani təzahürü olduğunu vurğulamışdır.

Dünya Bankının təmsilçisi çıxış edərək, bankın Ədliyyə Nazirliyi ilə əməkdaşlığını, ədliyyə sisteminin müasirləşdirilməsi layihəsi üzrə həyata keçirilən tədbirləri yüksək qiymətləndirmiş, qarşılıqlı fəaliyyətin daha da inkişaf etdirilməsinə hazır olduğunu vurğulamışdır.

Bildirilmişdir ki, Azərbaycanda aparılan məhkəmə islahatları nüfuzlu beynəlxalq qurumlar tərəfindən də dəstəklənir. Dünya Bankı bizə maliyyə və texniki dəstəyin göstərilməsi qərarına gəlmiş, ədliyyə sisteminin müasirləşdirilməsi üzrə birgə layihənin icrasına başlanılmışdır. Layihə çərçivəsində 20-dən çox yeni məhkəmə binaları və məhkəmə komplekslərinin layihələri hazırlanmış, habelə Bakı şəhərinin Yasamal, Gəncə şəhərinin Nizami, Gədəbəy rayon məhkəmələri üçün yeni binaların inşası başa çatmaq üzrədir. Həmçinin Konstitusiya və Ali Məhkəmə, Məhkəmə-Hüquq Şurası, Ədliyyə Nazirliyi müasir informasiya və kommunikasiya texnologiyaları (İKT) ilə təmin olunmuş, məhkəmə sisteminin vahid internet portalı yaradılmışdır.

Hazırkı sənədə əsasən, Dünya Bankı ilə birgə layihə çərçivəsində yeni məhkəmə və məhkəmə komplekslərinin tikintisi, qabaqcıl İKT-lərin geniş tətbiqi, məhkəmə qərarlarının icrası işinin və hüquqi yardım sisteminin təkmilləşdirilməsi, Ədliyyə Akademiyasının və Vəkillər Kollegiyasının potensialının gücləndirilməsi, ədliyyə işçiləri və hakimlərin peşəkarlığının artırılması və digər tədbirlərin həyata keçiriləcəyi vurğulanmış, birgə səylər nəticəsində bundan sonra da yüksək uğurlar əldə ediləcəyinə əminlik ifadə olunmuşdur.

Azərbaycan.- 2011.- 23 noyabr.- S. 4.