BMT-nin Avropa İqtisadi Komissiyası Azərbaycanda yeni layihələr həyata keçirəcəkdir

Rabitə və informasiya texnologiyaları naziri Əli Abbasov BMT-nin Avropa İqtisadi Komissiyasının icraçı baş katibi Yan Kubişlə görüşmüşdür.

Nazirlikdən AzərTAc-a bildirmişlər ki, Əli Abbasov "BakuTel 2011" 17-ci Beynəlxalq telekommunikasiya və informasiya texnologiyaları sərgisində iştirakına görə icraçı baş katibə minnətdarlığını bildirmiş, BMT-nin Avropa İqtisadi Komissiyası ilə Azərbaycan arasında yüksək əməkdaşlıq əlaqələrinin mövcudluğunu diqqətə çatdırmışdır.

"İnnovasiyalar üzrə fəaliyyətin icmalı" layihəsi haqqında məlumat verən Yan Kubiş bildirmişdir ki, bu layihədə BMT-nin Avropa İqtisadi Komissiyası və beynəlxalq ekspertlər müvafiq ölkələrdə araşdırmalar apararaq lazımi tövsiyələr verir. Y.Kubiş Azərbaycanda 2013-ci ildə belə bir pilot-layihənin hazırlanmasının məqsədəuyğun olduğunu bildirmişdir.

BMT-nin Avropa İqtisadi Komissiyasının üzv ölkələrində informasiya texnologiyaları üzrə yaradılan regional mərkəzlərin əhəmiyyətindən bəhs edən Yan Kubiş belə bir mərkəzin Azərbaycanda yaradılmasının faydalı olacağını qeyd etmişdir.

Əli Abbasov ölkəmizin bu layihəni dəstəklədiyini və layihənin icrası istiqamətində həyata keçirilən bütün işlərə lazımi köməyin göstəriləcəyini qeyd etmişdir.

Görüşdə region ölkələrinin inteqrasiyasının dəstəklənməsi və dünya iqtisadiyyatına qoşulmanın təşviq edilməsi, birgə səylərlə daha effektiv həll ediləcək prioritet məsələlərin maliyyələşdirilməsi olan BMT-nin "SPECA" (BMT-nin Mərkəzi Asiya iqtisadiyyatları üçün Xüsusi Proqramı) proqramı çərçivəsində əməkdaşlıq barədə fikir mübadiləsi aparılmışdır. BMT-nin Avropa İqtisadi Komissiyasının "Dövlət-özəl tərəfdaşlığ"ı istiqamətində fəaliyyətə başlaması məsələsi də müzakirə olunmuşdur.

Azərbaycan.- 2011.- 24 noyabr.- S. 5.