Sənətkarlıq Paytaxtı İsmayıllıda infotur keçirildi

 

Azərbaycanın qeyri-maddi mədəni irsinin qorunması, bərpası, xalq yaradıcılığının təbliği istiqamətlərində aparılan islahatlara uyğun olaraq, Mədəniyyət və Turizm Nazirliyi tərəfindən təsdiq edilmiş "2010-2014- cü illər üçün Xalq Yaradıcılığı Paytaxtları" proqramı uğurla icra olunur. Diyarşünaslıq, folklor və sənətkarlıq nominasiyaları üzrə daxil olmuş təkliflər müvafiq namizəd şəhərlərin ümumi hazırlığı, tarixi ənənələri və digər amillər nəzərə alınmaqla təhlil edilmiş və 2010-cu ildən bəri Gəncə, Şabran əfsanələr, Şəki, İsmayıllı sənətkarlıq, Qazaxla Lənkəran isə folklor paytaxtları elan olunmuşdur.

 

Təsdiq edilmiş illik tədbirlər planına əsasən, "paytaxt" seçilmiş şəhərlərdə il ərzində nominasiyaya uyğun təntənəli mərasimlər, respublika və beynəlxalq səviyyəli elmi-praktik konfranslar, "dəyirmi masa"lar, konsertlər, müsabiqələr, festivallar, sərgilər və sair tədbirlər təşkil edilir.

2011-ci il üçün Azərbaycanın "Sənətkarlıq Paytaxtı" elan olunmuş İsmayıllı şəhərində də plana uyğun olaraq müntəzəm şəkildə tədbirlər keçirilir. Bu tədbirlər təkcə İsmayıllı rayonunun deyil, ümumilikdə Azərbaycanın qeyri-maddi mədəni irsinin dünyada tanıdılmasında mühüm rol oynamaqla yanaşı, çoxəsrlik mədəniyyətin, sənətkarlığın, tarixi irsin qorunmasına xidmət edir.

"Paytaxt ili" başlayandan İsmayıllının rayon mərkəzində və Lahıc qəsəbəsində sənətkarların əl işlərinin sərgisi təşkil edilərək yerli və xarici turistlərə nümayiş olunur. Suvenir çantalar, qələmlər, dəftərçə və açıqçalar da İsmayıllı sənətkarlığının təbliğində mühüm rol oynayır.

Bu günlərdə Mədəniyyət və Turizm Nazirliyinin xətti ilə "İsmayıllı - Azərbaycanın Sənətkarlıq Paytaxtı-2011" tədbirlər proqramı çərçivəsində İsmayıllı şəhərində növbəti infotur keçirilmişdir. Tədbirlərdə Mədəniyyət və Turizm Nazirliyinin məsul işçiləri Fikrət Babayev, Zöhrə Əliyeva, həmçinin kütləvi informasiya vasitələrinin 25 nəfərdən ibarət nümayəndə heyəti də iştirak etmişdir. İsmayıllı şəhərində Heydər Əliyev Mərkəzi ilə tanışlıqdan sonra rayon icra hakimiyyətinin başçısı Nizami Ələkbərov "İsmayıllı-Azərbaycanın Sənətkarlıq Paytaxtı-2011" proqramına uyğun olaraq görülmüş işlər barədə məlumat vermiş, jurnalistlərin suallarını cavablandırmışdır.

Tədbir iştirakçıları Aşıq Ələsgərin anadan olmasının 190 illiyi münasibəti ilə rayon mədəniyyət evində keçirilmiş "Sazlı-sözlü dünyam" ədəbi-bədii yubiley mərasiminə qatılmışlar. Rayon aşıqlarının geniş konsert proqramı maraqla qarşılanmışdır.

Heydər Əliyev adına Mədəniyyət və İstirahət Parkı və rayon tarix-diyarşünaslıq muzeyi ilə tanışlıqdan sonra "Hapıt" folklor kollektivinin çıxışları maraqlı olmuşdur.

Tədbirlər xalq yaradıcılığı klubunda sənətkarların əl işlərinə baxışla davam etdirilmiş, Lahıc folklor kollektivinin ifaları dinlənilmişdir. Daha sonra İvanovka qəsəbəsində folklor nümunələri ilə tanış olan qonaqlar buradan da xoş təəssüratla ayrılmışlar.

Tədbirlər günün ikinci yarısında Basqal qəsəbəsindəki kəlağayı sexində istehsal olunan məhsullarla tanışlıqla başa çatmışdır.

Telman NƏZƏRLİ

 

Azərbaycan.- 2011.- 26 noyabr.- S.6.